“O le A le Mea Tou Te Mananao Matou te Faia?!”

Michael Magleby

Faatonu o Atiina Ae o Mataupu Aoaoina

A o fesili atu le vaega o le atiina ae o mataupu aoaoina a le Ekalesia i le au paia e siaki ai le mataupu aoaoina fou o le Sau, Mulimuli Mai ia te A’u o le mataupu aoaoina mo le 2019, sa matou faalogo pea lava pea i le fesili lenei, faapea ai ma faamatalaga e pei o le: “Sa ou manatu i le taimi muamua, ‘Ta’i ese lenei mea!’ Ou te lei mautinoa pe o le a aoga.” Peitai, sa faifai malie lava ona suia nei uluai atugaluga i le faamautinoaga e faapea “ua matuai sui atoa a matou suesuega i tusitusiga paia” po o le “E aoga!”

Aisea e taua ai o latou aafiaga ia te oe? Talu ai ona o le mataupu aoaoina fou e mo oe ma lou aiga i le fale, ae le mo na’o lou faiaoga i le lotu.

I le fautuaga a le Au Peresitene Sili, o le lomiga o le masina lenei ua iloilo ai mataupu faavae o aofia ai i lenei vaega fou lava o le mataupu aoaoina Sau, Mulimuli Mai ia te A’u—lea e sosoo atu lava i le toe faafouga o le mataupu aoaoina a le autalavou lea na faalauiloa atu i le 2013, o le Aoao Atu i le Ala a le Faaola i le 2016, ma le mataupu aoaoina a le Perisitua Mekisateko ma le Aualofa lea na faalauiloa i le 2018.

E amata atu i le itulau e 20, o loo tuuina atu ai e Elder Jeffrey R. Holland, o le na tuuina atu le taitaiga i le galuega atiina ae o mataupu aoaoina, ni malamalamaaga loloto afai e faaaogaina e mafai ona suia ai i tatou i ni auala sili ma faavavau. Ua le na’o se mataupu aoaoina ae o se auala i le aoaoina ma le ola ai i le talalelei i aso uma.

A o ou maitauina perofeta, tagatavaai, ma talifaaaliga o taitaia le atiina ae o lenei mataupu aoaoina fou e faatotonugalemu i le aiga, ua lagolagoina e le Ekalesia, ou te maofa i lona fetaui tonu lava ma le agaigai atu o le Ekalesia i se faiga e tau le faatonua o le ola i le talalelei, ae ua valaaulia i tatou e talia ni tiutetauave sili atu mo lo tatou lava tuputupu ae patino faaleagaga. A o tatou faia o lea mea, ua faatalitonuina au e faapea, ona o le a tatou maua le malamalama ma upumoni silisili o le a faapea ona faateleina lo tatou iloa e mulimuli ai ia Iesu Keriso ma lafoai le tiapolo (tagai MF&F 93:29–40), ma aumaia ai le filemu i o tatou olaga ma le lelei i le lalolagi.