Auauna Atu e pei ona Sa Faia e le Faaola

Saunia e Eric B. Murdock

Mekasini a le Ekalesia

A o e faia le mea sili e fesoasoani ai i isi, o le a tatala e le Faaola ou fofoga e vaai atu ai ma le alofa ma le agaalofa.

Ua tatou maitauina uma lava se uo o loo feagai ma se aso faigata po o se tasi e tuuatoatasi pe taufaalili i ai i le aoga. Atonu ua e faalogo e uiga i se tasi i lau uarota po o le paranesi o feagai ma se luitau ogaoga. I taimi faapenei, o le a se mea e mafai ona e faia?

O nisi taimi e faigata ai ona iloa auala e mafai ona e fesoasoani ai. E mafai ona foliga mai e faigofie atu le faatali i se isi tagata e faia le faatinoga, ae o loo tele mea e mafai ona e faia, e tusa lava pe tau ina faailoa atu ia i latou o siomia oe e te alofa. O loo siomia i tatou e avanoa, ma o soo se taimi lava e te faaali atu ai le alofa, manatu popole, ma le fiafia i isi, o loo ua e [faia] se auaunaga.

O Se Auaunaga Patino

Auaunaga. Atonu ua e faalogo soo lata mai nei i lena upu i le lotu. I aso ua mavae, e masani ona tatou talanoa e uiga i le Faaola po o perofeta ma aposetolo o faia se auaunaga, ae pe ua e mafaufau ea pe o i ai sau auaunaga patino.

Ina ia auauna atu o lona uiga, ia alofa ma tausia isi ma fai ituaiga mea e ono faia e le Faaola pe anafai o loo soifua o Ia faatasi ma i tatou i aso nei. O le auaunaga o se auala e fesoasoani ai i isi ia lagona le alofa o le Tama Faalelagi ma faafetaia’ia o latou manaoga faaleagaga ma faaletino.

E “le’i sau [Iesu] ina ia auauna mai tagata ia te ia, a ia auauna atu” (Mataio 20:28). Sa auauna atu o Ia, ao Ia “femaliuai ma agalelei” (Galuega 10:38). I le avea ai ma Ona soo, ua faatonuina i tatou ia mulimuli i Lana faataitaiga? O loo i ai sa tatou auaunaga patino!

Ae e le tau manaomia ai ona faatulaga se galuega faatino tele e auauna atu ai. Na saunoa Peresitene M. Russell Ballard, Sui Peresitene o le Korama a Aposetolo e Toasefululua: “O nisi avanoa faaleauaunaga e aloaia—i totonu o o tatou aiga, o tatou valaauga i le Ekalesia, ma lo tatou auai i faalapotopotoga mo auaunaga i le lotoifale. …

“[Ae] e tele foi avanoa e auauna atu ai e le aloaia—e aunoa ma se tofiga—ma e oo mai a o tatou aapa atu i isi tatou te feiloai ai i le faigamalaga o le olaga.”¹

E masani lava, o le auaunaga faaKeriso e faia i se faatinoga laitiiti ma faamaoni e te faia i aso uma.

Taitoatasi

Ina ua faaali atu le Faaola i tagata sa Nifae, sa Ia fetalai atu i tagata e o mai ma tagotago i faailoga i Lona itu ma i Ona lima ma vae. “Ma sa latou faia lenei mea, i le o atu i luma taitoatasi seia oo ina latou o atu uma” (3 Nifae 11:15; ua faaopoopo le faamamafa).

Ona Ia valaaulia lea o i latou e aumai tagata uma o e sa mama’i, manunu’a, pe “puapuagatia i soo se ala … ma sa ia faamaloloina i latou uma taitoatasi ina ua aumaia i latou ia te ia” (3 Nifae 17:7, 9; ua faaopoopo le faamamafa). Ina ua mavae lenei mea, sa Ia “ave a latou fanau laiti taitoatasi, ma faamanuia i latou ma tatalo atu i le Tama mo i latou” (3 Nifae 17:21; ua faaopoopo le faamamafa).

Sa le o se vaega o ni tagata toalaiti lenei. Ua tau mai e tusitusiga paia ia i tatou e tusa ma le 2,500 tagata sa i ai iina (tagai 3 Nifae 17:25). Ae sa faaaoga lava e le Faaola le taimi e faamalolo, faamafanafana, faamalosiau, ma faaali atu ai le alofa i tagata taitoatasi.

Ua aoao mai Elder Ronald A. Rasband o le Korama a Aposetolo e Toasefululua: “O loo i ai iina se savali patino e sili ona o’oo’o ma maaleale. Sa auauna atu Iesu Keriso i, ma alofa ia i tatou uma lava, taitoatasi.”² O le alofa ua faaali atu e Iesu i le [tagata e] tasi o le faamoemoega moni lena o le auaunaga.

Mata e Vaai

Sa fesoasoani le Faaola ia i latou sa siomia o Ia. Sa saunoa mai Jean B. Bingham, Peresitene Aoao o le Aualofa, e faapea sa Ia “ataata foi i [isi], talanoa i [isi], savavali ma [isi], faalogo atu i [isi], faaavanoa se taimi mo [isi], faamalosiau atu, aoao atu, fafaga, ma faamagalo atu. Sa Ia auauna atu i aiga ma uo, tuaoi ma tagata ese foi, ma sa Ia valaaulia ē masani ma ē pele ia olioli i faamanuiaga silisili o Lana talalelei.”³

Sa i ai fofoga o Iesu Keriso e silasila ai i manaoga o tagata uma sa siomia o Ia, ma sa Ia aapa atu ia i latou uma lava! E mafai ona tatou mulimuli i Lana faataitaiga ma aapa atu ia i latou o e manaomia foi la tatou fesoasoani.

Peitai o le Faaola e atoatoa. E mafai faapefea ona tatou iloa manaoga o isi ma auauna atu e pei ona Ia faia? Ua saunoa mai Peresitene Ballard: “I au tatalo o le taeao i aso fou taitasi, ole atu i le Tama Faalelagi e taiala oe ia iloa se avanoa e auauna atu ai i se tasi o Ana fanau faapelepele. Ona e faagasolo lea i le aso faatasi ma lou loto ua faatumulia i le faatuatua ma le alofa, e saili mo se tasi e fesoasoani i ai. … Afai e te faia lenei mea, o le a faateleina lou nofouta faaleagaga ma o le a e mauaina ni avanoa e auauna atu ai, ia e te lei iloaina muamua e mafai.”⁴

Faatino Uunaiga

Vaai faalemafaufau i le tulaga lenei: Ua e vaai i lau uo i le aoga, ma e foliga mai e fai si ona faanoanoa. Ua e lagona e tatau ona e faia se mea mo ia, ae e te popole ina ne’i e faalavelave ia te ia pe faamaina o ia po o oe lava. Ona amata lea ona e popole pe mata o se uunaiga faaleagaga po o oe lava.

O nisi taimi e faigata ai ona iloa pe o e maua se uunaiga faaleagaga e auauna atu pe ua na o ou lava mafaufauga, ae ua aoao mai Mamona ia i tatou i auala e iloa ai uunaiga faaleagaga: “O le mea ua mai le Atua, e valaau ma faatosina mai ia faia mea lelei e le aunoa; o le mea lea, o mea uma e valaau mai ma faatosina mai ia faia mea lelei, ma alofa i le Atua, ma auauna atu ia te ia, ua musuia e le Atua” (Moronae 7:13).

Na saunoa mai Peresitene Thomas S. Monson (1927–2018), “Afai tatou te nofouta ma mataala, ma afai tatou te faatinoa uunaiga e oo mai ia i tatou e mafai ona tatou ausia mea lelei e tele.”⁵

O Le Auaunaga e Mo Tagata Uma

I le taimi o le konafesi aoao ia Aperila 2018, na fofogaina mai ai e Peresitene Russell M. Nelson: “Ua faia e le Alii ni fetuunaiga taua i le auala tatou te tausia ai le tasi ma le isi. Tuafafine ma uso e—tagata matutua ma talavou—o le a auauna atu le tasi i le isi i se auala fou ma paia atu.”⁶ O lenei mea e aofia ai avanoa e auauna atu i auaunaga faalesoa, ae o le auaunaga e le na’o se mea tatou te faia i le Aso Sa po o le taimi o gaoioiga a le Mutuale. E le na’o se tiutetauave e o mai faatasi ma ni valaauga faapitoa. O le auaunaga e mo tagata uma. E mo taimi uma.

Pe a papatisoina i tatou, tatou te folafola atu ia “tauave avega a le tasi, ina ia māmā; ioe, ma [ia] loto e fanoanoa faatasi ma e e faanoanoa; ioe, ma faamafanafana atu ia te i latou o e e manaomia le faamafanafanaga” (Mosaea 18:8–9). O le auauna atu i isi o se vaega o le mea ua tatou folafola atu e fai.

Na saunoa mai Bonnie L. Oscarson, o le sa avea ma Peresitene Aoao o Tamaitai Talavou, “E finagalo le Alii e te vaavaai solo i lau tupulaga ona auauna atu lea e pei ona Ia faia.”⁷ A o e faia lea mea, o le a Ia tatalaina ou mata e vaai atu ai ma le alofa ma le agaalofa i auala e auauna atu ai i isi. O le a Ia le tuua oe e taumatemate e uiga i mea e tatau ona e faia. O le a Ia taialaina oe i le auala sili e mafai ona e auauna atu ai ia te i latou.

O Auaunaga e Aumaia ai Faamanuiaga

Ua saunoa mai Peresitene Nelson e faapea, “O i tatou i le avea ai ma auauna [a le Alii] o le a auauna atu i le tasi, e pei lava ona sa Ia faia.”⁸ O lenei mea e le gata ina manuia ai isi; ae e manuia ai foi i tatou.

Ua saunoa mai Elder Dieter F. Uchtdorf, o le Korama a Aposetolo e Toasefululua: “Ao aapa atu o tatou lima ma loto i le alofa faaKeriso i isi, o le a tupu ia i tatou se mea matagofie. O le a faamaloloina, ma toe faaleleia, ma sili atu ona malosi o tatou lava agaga. O le a sili atu ona tatou fiafia, sili atu ona toafilemu, ma sili atu ona mataala ma iloa musumusuga a le Agaga Paia.”⁹

Ua faaali mai e Iesu Keriso se ala i se olaga faamanuiaina ma sili atu le faamalieina. O auaunaga e pei ona Ia faia o le a aumaia ai le fiafia moni ma se lagona o le filemu ma le olioli i lou olaga.