O Se Kerisimasi Suamalie

Wilson Correia dos Santos

Pernambuco, Pasila

Na fai e lo’u aiga le Kerisimasi ia avea o se mea e manatuaina pea mo se umi lava e mafai ona ou manatuaina ai. Ina ua ou alu i le Misiona a Pasila Porto Alegre i Saute, ou te le’i iloaina le faigata o le a i ai lo’u fai Kerisimasi ese mai ia i latou mo le taimi muamua lava.

I le taimi o la’u Kerisimasi muamua i totonu o le misiona, sa ou matuai moomoo e faatasi ma lo’u aiga, ae peitai sa na’o i ma’ua ma la’u soa. Sa faaosofaia a’u e se lagona o le faanoanoa mo a’u lava ma le faavauvau.

I le aso a o lumanai le Kerisimasi, sa valaaulia ai i ma’ua ma la’u soa e se aiga pele matou te fai ‘aiga i le afiafi. Sa manaia le matou afiafi, ae o le fiafia o lenei aiga sa atili faamanatu mai ai ia te a’u, sa ou toesea mai lo’u lava aiga. Sa ma o i le fale i lena po, ma sa ou taumafai ou te moe ma faagalogalo ai o le aso na sosoo ai o le Kerisimasi. Ma mo le uluai taimi i lo’u olaga, sa ou lagonaina ai le toafilemu ina ua uma atu le Kerisimasi.

O se tausaga mulimuli ane, sa ou manatunatu ai i le Kerisimasi na muamua atu, ma sa ou mafaufau e uiga i mea e mafai ona ou faia ia maua ai se Kerisimasi lelei atu i totonu o le misiona. Sa ou iloaina o o’u lagona o le faanoanoa i le tausaga na muamua atu, sa oo mai mai lo’u taulai ia te a’u lava ae le o le Faaola. Sa ou iloaina ai foi, o le Kerisimasi o se taimi e manatua ai le soifua mai o le Faaola, ma e tatau ona ou fiafia e auauna atu ia te Ia i le avea ai ma Ona sui.

I le talanoa ai ma la’u soa, sa tonu ia i ma’ua e faatau ni lolelaau e avatu i le au paia, tagata sailiili, tamaiti, ma soo se tasi matou te fetaui i ai i le Aso o le Kerisimasi. Sa ma faataitaia foi ni viiga o le Kerisimasi e usu. Sa lofia lo’u loto i le olioli i le Aso o le Kerisimasi a o matou feiloai ma tagata, usuina viiga, ma tufa atu lolelaau.

A o ma toe foi atu i le fale i lena afiafi, sa matou feiloai ai ma se toeaina matua o saofai i autafa o le auala savali. Sa ma fesili atu i ai pe na maua sana meaalofa o le Kerisimasi i lena aso. Sa fai mai o ia, ioe—sa talanoa i le telefoni i lana fanau o e sa nonofo mamao ese.

“E i ai le isi ma meaalofa e tasi e avatu ia te oe,” sa ma fai atu ai. Sa ma tuuina atu ia te ia se lolelaau.

“O le a le gata ina faasuamalie e lenei mea lo’u gutu,” sa ia fai mai ai, “ae o le a faasuamalie foi e lenei mea lo’u agaga.”

Sa ou maua se Kerisimasi sili ona le manaia i la’u misiona ona sa ou mafaufau ia te a’u lava ia. Sa ou maua foi le Kerisimasi aupito sili ona manaia ina ua ou taulai atu i le Faaola. Ou te iloa, a tatou taulai atu ia te Ia, o le a Ia aumaia le suamalie matagofie i o tatou agaga i le aso o le Kerisimasi ma aso uma o le tausaga.