O Atatosi o le Faatuatua
Blanca Solis
Asunción, Parakuei
Ina ua gasegase le tane a Blanca faapea foi ma lona tina, ma le mafai ona la tausia i laua lava, o lea na nofo ai o ia mai lana galuega e tausi i laua. O le liliu atu i le Alii, na maua ai e Blanca le malosi e sili atu nai lona lava malosi.
Cody Bell, le pueata
Na oo mai tofotofoga aupito sili ona faigata o le matou aiga ina ua ma’i tigaina lo’u toalua. E fa masina o i ai o ia i le potu o gasegase tigaina o le falema’i. O masina na o le loto tiga! Sa le mafai e lo’u toalua ona tausia o ia lava ina ua ma te’a mai le falemai. A o le taimi lava foi lea, sa pagatia ai lo’u tina i le faama’i o le galogalo o mea, ma sa tatau ai ona nofomau i le moega.
Sa i ai sau galuega mautu o se tausisoifua lesitalaina, ma sa ou tausia lo’u toalua ma lo’u tina i le taimi lava e tasi. Sa oo ina ou lotovaivai i le faataotolia uma o i laua i moega. Sa tele ni po o le leai o se moe ona sa tatau ona ou faia mea uma mo i laua. Sa pei i laua o ni pepe se lua. O le tausia o laua ma le faigaluega i le taimi lava lea, sa ou lagonaina ai faapei sa lua ni au galuega. Sa le mafai ona ou tausia i laua e pei ona sa tatau ai ona ou faia, o lea sa tatau ai ona ou tuua la’u galuega.
Ou te mafaufau i nei aso o aso aupito faigata ia o lo’u olaga. Sa faigata ia te a’u le suia mai le ola tutoatasi i le matuai leai o se mea e maua. Sa amata ona ou popole i mea tautupe. Sa ou le iloa se mea e fai, e taulima ai a matou tupe faaalu uma. Sa amata ona ou mafaufau po o le a se mea e mafai ona ou faia. Sa ou ole atu i le Alii e fesoasoani mai ia ou toe faigaluega ma mafai pea ona ou tausia lo’u aiga.
Sa ma talanoa ma lo’u atalii ma sa ia fautua mai ou te tago e fai ma faatau atu ni empanada. Sa ou fefe ona sa ou le iloa le ala e fai ai lenei mea, peitai sa i ai se mea na faamanuiaina ai au. Sa ou auai i nisi o kosi o le ola tutoatasi mai le Ekalesia. O se tasi o kosi sa ou fiafia i ai o le kosi o le “Amataina ma le Faateleina o La’u Pisinisi”. A o ou auai i ai, sa ou lagonaina le mea sa i lo’u lumanai. Ua auina mai e le Alii lenei kosi ina ua uma ona ou ole atu ia te Ia mo se fesoasoani. Sa ou ole atu ia te Ia mo se galuega, ma ua Ia tuuina mai ai ia te au se avanoa.
Sa ou galue seia oo i le leva o le po i le amataina o le pisinisi. Na tausaga atoa faatoa alualu lelei ai le pisinisi. Sa amata ona ou faatauina atu empanadas i uo ma tuaoi, ma sa amata ona ou mafaufau e mafai ona ou tuuto atoa atu i lenei galuega, ina ia mafai ai ona ou tausia lo’u aiga. Sa matou fiafia ina ua oo i le taimi na tatala ai se pisinisi manaia faaleaiga. Ae peitai, sa lei umi lo matou fiafia.
Sa amata ona ou faalogoina foi lo’u ma’i. Sa ou alu i le fomai ma faailoa mai ai ua ou maua i le kanesa o le susu. Sa fai lo’u taotoga, kimo, ma isi mea uma e tetee atu ai i le ma’i. Ona o nei mea uma ua tutupu, sa tatau lona ou lafoaia le pisinisi a le matou aiga lea ua leva ona ou faatalitali i ai. I le va o o’u togafitiga ma le tausiga o lo’u tina ma la’u toalua ausage, sa ou le maua ai le malosi faaletino e faatautaia ai le pisinisi.
I le taualumaga o taimi, sa faasolosolo malie ai ona manuia le ola maloloina o lo’u toalua, ae o le taimi lena ua maliu lo’u tina. O le taimi lenei, ua ou tuuto atu a’u lava i o’u togafitiga.
Ou te le’i vaivai i le tatalo ma ole atu i le Alii mo le fesoasoani e faaauau ona ou agai ai i luma. Ou te tatalo ia te Ia i taimi uma. O le mea na aafia ai lo’u aiga ua fesoasoani ou te iloa ai sa ma savavali faatasi ma le Alii i mea uma. Ua Ia tuuina mai ia te au le avanoa ou te toe tulai ae ai. E matuai maoae le tele o le malosi ua tuuina mai e le Alii ia te au.
Ou te lei fesili lava ia te au faapea, “Aisea ea ua tupu ai ia te a’u?” Sa ou mafaufau lava i taimi uma, sa i ai se pogai mo lea mea. Sa ou faatuatuaina le Alii ma talia mea sa Ia auina mai ia te a’u. Sa Ia lagolagoina a’u a o ou uia taimi sili ona faigata ma ua faamalosia ai a’u.
E ui sa o se luitau le tuua o lana galuega ae tausi lona tina ma’i faapea lona toalua ma’i, ae sa faia e Blanca ma le loto i ai. “Sa ou manao i le mea sili ona lelei mo i laua” o lana tala lea. “E alagatatau lea mo lo’u tina, ma e faapena foi mo la’u tane.”
Sa auai Blanca i nisi o kosi a le Ekalesia mo le ola tutoatasi e fesoasoani e maua ai se tupemaua mo ia ma lona aiga. E faafetai o ia mo mea ua ia aoaoina. Na fai mai o ia, “Ua auina mai e le Alii lenei kosi ina ua uma ona ou ole atu ia te Ia mo se fesoasoani.”
O le luasefulu tolu tausaga talu ona auai i laua ma lana tane o Anibal i le Ekalesia sa fai mai Blanca, “Talu mai lo’u papatisoga, na ou lagonaina lava, ua ou i ai i le nofoaga sa’o, i le Ekalesia moni.”
Ua faafetai lava Blanca i le vaaia o le faasolosolo manuia o le soifua maloloina o lana tane. E faafetai foi o ia mo le avanoa na ia maua e tausi ai i lona tina, o le ua maliu.
Fai mai Blanca semanu e le mafai ona ia taulimaina nao ia ona luitau. “Sa ma savavali faatasi ma le Alii i ia mea uma,” sa ia fai mai ai. “E matuai maoae le tele o le malosi ua tuuina mai e le Alii ia te au.”