Fausia o Alalaupapa [Sootaga]
O seneturi ua mavae, sa fesili atu ai se faitulafono faasaulala i le Faaola:
“Le Aoao e, o le fea poloaiga o i le tulafono ua sili?
“Ona fetalai atu ai lea o Iesu ia te ia, E te alofa atu i le Alii lou Atua ma lou loto atoa, ma lou agaga atoa, ma lou manatu atoa.
“O le poloaiga muamua lena ma le sili.
“E faapena foi lona lua, E te alofa atu i le lua te tuaoi, ia pei o oe lava ia te oe.
“O na poloaiga e lua ua autu ai le tulafono uma ma le au perofeta.”1
Ma i le 1831 foi, sa faaalia mai ai lenei aoaoga i le Perofeta o Iosefa Samita, ina ua fetalai mai le Alii, “Ma ia taitasi le tagata ma manatu taua i lona uso e pei o ia lava ia te ia, ma fai le amiomama ma mea paia i oʼu luma.”
Ona sosoo ai lea, i le avea o se faamamafaga, sa Ia faaopoopo mai ai, “Ma Ou te toe fai atu ia te outou, ia taitasi le tagata ma manatu taua i lona uso e pei o ia lava ia te ia.”2
I le vaeluaga o taimi ma faapea foi i aso e gata ai, ua faamamafaina mai ai e le Alii Lana aoaoga faavae taua o le avanoa tutusa mo Lana fanau. Ma ua faamanatu mai ia i tatou e Peresitene Oaks e uiga i lenei aoaoga mai le Tusi a Mamona: “E le teena e [le Alii] se tasi e sau ia te ia, e uliuli pe pa’epa’e, e pologa pe saoloto, o tane ma fafine; … ma ua tutusa tagata uma i le Atua.”3
I konetineta uma ma i luga o motu o le sami, ua faapotopotoina ai tagata faatuatua i le Ekalesia a Iesu Keriso o le Au Paia o Aso e Gata Ai. O eseesega i aganuu, gagana, itupa, ituaiga, ma tagatanuu e galoma atu i le le faatauaina a o ulufale atu tagata faamaoni i le ala o le feagaiga ma o mai i lo tatou Togiola pele.
Mulimuli ane, tatou te iloa ai e na’o le malamalama i le tulaga moni Faaletama o le Atua e mafai ai ona tatou talia atoatoa le tulaga moni o le usoga o alii ma le usoga moni o tamaitai. O lena malamalama e musuia ai i tatou i le naunautaiga alofa e fausia alalaupapa o le galulue faatasi nai lo pa pupuni o le feeseeseaiga.
O la’u tatalo ma le faamanuiaga ou te tuua i luga o i latou uma o e o faafofoga mai, ina ia mafai ona latou faatoilaloina soo se avega o le faailoga tagata ae savavali ma le amiosa’o faatasi ma le Atua—faapea le tasi ma le isi—i le lotogatasi ma le filemu atoatoa. ◼