Itulau o le Lotoifale
Pese e Vivii Atu Ai i le Lotofaafetai mo le Meaalofa o Iesu Keriso Lea
O mea uma lava o i Samoa e taulai uma lava i le aiga. O le Kerisimasi o se taimi lea matou te faamautinoa ai ua faatasi uma lo matou aiga.
E auauai lo matou aiga e o i le fale o le tasi o o matou tinamatua i le tasi tausaga, i Manono, ma le fale o le isi o matou tinamatua i le tausaga e sosoo ai, i Apia. O le po o le vaeluaga o le Kerisimasi, e faatasitasi ai tagata uma, talavou ma matutua, mo le Manuao.
O le Manuao o le taimi lea e laei papae ai tagata i Samoa atoa ma savavali faataamilo ma pepese i viiga o le Kerisimasi. O tagata matutua, o e le lava le malosi, e ono manaomia ona tutu ma malolo ao faaauau pea isi i le vaega.
O lo’u Tina sa avea lava ma se vaega o le Manuao talu mai lona laitiiti. E nonofo aiga ma faatalitali mo le vaega o loo pepese e o mai i o latou fale. E manatua pea e lo’u Tina le faalogo atu i se au pepese o loo pepese i se fale o se tuaoi. E na te tamoe atu i lena fale ma saofafai faatasi ma lena aiga, ona ia tamoe lea i le isi fale ma le isi fale, seia oo lava ina latou oo atu i lona fale e pepese ai i lo latou aiga. I lona laitiiti, sa le lava lona onosai e faatali ai ina ia matua e savavali faatasi ma tagata pepese ma usuina pese o le kerisimasi.
E matele lava ona faatoa maea le Manuao i le 1 po o le 2 i le vaveao. O le taimi lava e toe foi ai tagata uma i o latou fale latou te saunia ai loa meaai mo le aso Kerisimasi. Pe a ma le 6 i le vaveao ua saunia meaai ma aveese mai maa vevela. E tuua e tagata uma o le aiga a latou meaai i le fale; e saogalemu lava meaai aua e o uma tagata i le lotu.
Ona, laei lea i ofu papae, latou te auai ai i sauniga lotu lea latou te pepese ai i viiga o le faafetai mo le faamanuiaga o Iesu Keriso lea. A maea le Lotu latou te agai uma atu i le fale e saofafai ma tausasami faatasi le latou taumafataga lea na muai sauniaina.
O nei aafiaga na tamau ai ia te a’u se aafiaga ona o tu masani sa matuai faigofie lava. I le amataga, matou te faatasitasi o se aiga ma nuu e usuina ni viiga o le faafetai i le Atua mo le meaalofa o Lona Alo. I le taimi nei, ma lo’u lava aiga, ou te taumafai ai ia aua nei faatagaina le itu faafaigaluega e aveesea le Kerisimasi mai a matou tu masani faatauvaa o tapuaiga.