O Le Tusi a Mamona: O Se Meaalofa Faapitoa

Claudette Bybee Burt

Uosigitone, ISA

I le aso a o lumanai le Kerisimasi o le 2016, ao ma auauna atu ma lo’u toalua o ni faifeau faamisiona i le malumalu mo le Malumalu o Manila Filipaina, sa ou manao ai e ave atu se kopi o le Tusi a Mamona i se tasi. I totonu o le faavaa i luma o se kopi [o le Tusi a Mamona], sa ou tusia ai la’u molimau ma aofia ai se kata o le Malumalu o Manila faapea ma faamatalaga i le mea e mafai ona aoao atili ai e uiga i le Ekalesia. Ona ou tootuli lea ma ole atu i le Alii e taitai atu a’u i se tagata ua Ia saunia.

Sa ou tuua le ma falemautotogi ma sopoia le alatele. Sa talanoa se leoleo o le saogalemu mo le nofoaga autu e aoao ai faifeautalai lea sa latalata ane faatasi ma ni alii se toalua. Sa ia valaau mai, “Manuia le Kerisimasi!” Na ou lagonaina le uunaiga e savali atu ia i latou.

Ina ua uma ona ou faailoa atu o a’u lava, sa ou iloa ai o le tasi o alii sa avea o se teufanua mo le nofoaga autu e aoaoina ai faifeautalai ae o le isi o se faifaatoaga. Sa ou iloaina ai foi, o i laua uma o ni tagata o le Ekalesia.

Sa ou fesili atu i ai pe la te iloa se tasi atonu o le a fiafia i le mauaina o se meaalofa o le Kerisimasi o se kopi o le Tusi a Mamona. Sa faate’ia le faifaatoaga. Sa fai mai o ia, e i ai sana uo o le a la o atu faatasi e asiasi i laufanua o le malumalu i ni nai minute. Sa manao o ia e avatu i lana uo se Tusi a Mamona peitai na te le’i mauaina se [kopi]. O le faatumulia ai i le ootia, sa ou avane le Tusi a Mamona mai la’u ato. Sa ou faamatala atu ia i laua e uiga i la’u tatalo ma tuu atu ia te ia le tusi.

Sa pai mai le Agaga ia i matou uma, ma sa faailoa mai e le faifaatoaga lona faamoemoe ina ia faitau e lana uo le Tusi a Mamona ma talia le talalelei. Ao ou toe savali atu i lo’u falemautotogi, sa ou faafetai i le Alii ma tatalo ina ia tausia e le uo a le faifaatoaga lana tautinoga e asiasi mai i laufanua o le malumalu.

Pe a ma le 15 minute mulimuli ane, na ou maua ai se valaau mai le pa leoleo a le NAF. Ua taunuu ane le uo a le faifaatoaga. Sa ou alu atu i le taimi lava lea e feiloai ia te ia. O ia o se kapeteni o se vaa oloa, lea sa toe lua aso ona toe foi atu lea i le sami. Sa ia faafetai mai ia te a’u mo le Tusi a Mamona ma fai mai o le a ia alu ma ave i luga o le vaa. Ae matou te le’i faatofa, sa ou pulato’a atu i ona mata ma faapea atu, “E moni lenei tusi.” A o ou faia lea mea, sa faamautu mai e le Agaga lea upumoni ia te a’u.

O lena Kerisimasi, sa ou tuuina atu ai se meaalofa faapitoa: o se Tusi a Mamona ma la’u molimau i lona moni. Sa ou mauaina foi se meaalofa faapitoa: o le tali a le Alii i la’u tatalo ma faamanuiaina a’u i se avanoa e faasoa atu ai le talalelei.