Reirein te Mwakuri n Ibuobuoki
Ikotaia Iteraera rinanon te Mwakuri n Ibuobuoki
Te mwakuri n Ibuobuoki bon reken te tai n toua mwin ana reirei te burabeti ni ikotiia Iteraera.
E a tia Beretitenti Russell M. Nelson ni kaoira bwa ti na buoka ikotaia Iteraera—“te bwai ae moan te kakawaki ae e riki n te aonaaba ni bong aikai.”1
Ibukiia naake a tangiria ni ira buakon te mwakuri aei ni ikotaia Iteraera, te mwakuri n ibuobuoki e kona n reke bwa te anga ibukin karaoana. Ibukina bwa ana mwakuri ni kamaiu te Uea bon ti teuana inanon te mwakuri, te mwakuri n ibuobuoki bon te kawai ae kairaki ni bita mauiia aomata. Ngkai tao ti ibuobuoki nakoia membwa ake a aki rangi ni kakaonimaki ke ni kaoiia bwa a na buokiira ni beku nakoia ake tiaki kain ara aro, te mwakuri n ibuobuoki e karekea te tai n botiia Iteraera.
Katoka i aomi Rawawataia Raomi
Ara tiibu ana bon bae ni maraki, bua, ke ni bwaka ni bon oin nanoia, ngkai tabeia aia taan kawakin tiibu, ti konaa n riki naba ngaira bwa taan moan noora kainanoia. Ti kona ni kakauongo ao n tangira n aki motikitaeka ao n anga te kantaninga ao te ibuobuoki man ana kairiiri ni kamataata te Tamnei ae e Raoiroi.” —Bonnie H. Cordon2
“I karaurau n tatara te aine ae e tekateka irarikiu ni kibau n te aoa 7:00 n te moaningabong n okira mweengau. E a tia n otana nimana te kamanging imwain kiban te wanikiba, ao ngke e titirakinai ngkana I a tia ni iein, au iango iaona ae e aki raoiroi e a moana n rikirake.
“‘Eng, Iai aman natiu ao aman tibu aika uarereke’ I kaeka ma te nano ni kamoa.
“E a tuangai ngkanne te bwai ae bita aron bwaai ni kabane. E a tia ni mate kainabana n te bong are mai imwaina imwin wenena n aki namakinaba inanon nimaua te bong. E ngae ngke ngaia te taokita ibukiia ake a kakaiaki, e aki kona ni kamaiua kainabana ngke e bwaka n tong n aia tai n nako ni motirawa.
“I rangi ni maamaa ngke au waekoa ni motikataekana e bon aki eti. Tera ae N na taekinna nakoina? N te tai ngke I karina angiu, I namakina ae Tamara are i Karawa e karuoa Tamneina bwa I aonga ni buoka te aine aio ao n tibwai tabeua koaua aika kakawaki man te euangkerio.
“I reiakinna bwa e ngae ngke e aki kakaea te taromauri, iai ana koaua iroun Iesu Kristo ao e wawareka te Baibara. Ngke I titirakinna ngkana e ataa taekan Ana Ekaretia Iesu Kristo ibukiia Aika Itiaki ni Boong aika Kaitira, e kaeka man taku bwa e uarereke ana atatai iai. I tibwaua nakoina ana rongorongo Unimwaane Richard G. Scott n te maungatabu ni kabuta (1928–2015) ae e atunaki, ‘The Eternal Blessings of Marriage,’ ao ngkanne I a anga koauan te utu ae akea tokina ao e kanga Tamara are i Karawa ni kinaira ao n tangiriira n tatabemaniira nako. I kunea bwa e na nako Hawaii, USA, te tabo are e rikirake iai, ao I kaungaa nanona bwa e na kawara te Laie Hawaii Tembora.
“Ti maenako n te marae ni wanikiba i Salt Lake City, Utah. I rangi ni kakaitau bwa e kona te Uea ni kabonganaai, e ngae ngke I kairua, ni kawara te titita are e kainanoa te tangira ao te karaunano.”
John Tippetts, Utah, USA
Reirei aika a na Iangoaki
“Kabuakaka aika aki raoiroi”
Ngkana ti waekoa ni kabuakaka e na kona n tuukiira man nooran rikirakera ae mai iroun te Atua (taraa Mataio 7:1).
“Karuoa Tamneina Iaora ”
Kakoaua ana berita te Atua are E na anganiira te bwai are ti na taekinna n te tai ae waekoa (taraa Reirei ao Berita aika Tabu 100:5–6).
“Reiakinaki”
Titiraki bwa tera ae a kakoauaa tabeman, ongoraa ma te nanoanga, ao butimwaea aia koaua ma te karinerine.
“Taekina Koauana”
Kakaei taai are e na reke am tai ni tibwa am koaua bwa e kanga te Uea n tia ni mwakuri inanon maium (taraa Motiaea 24:14).
“Kaungaa te Nano”
Kaoiia bwa a na mwakuri iaon te koaua bwa e aonga ni kaota koauan te Tamnei ae e Raoiro nakoia (taraa Ioane 7:17; Moronaai 10:5).
Kamaiuakiia Membwa ake a Manga Oki
“Ma te tangira ae e kaungaa te nano, a na riki kakai, ao ti na karekei kawai n uotiia tarira ao mwanera aika a ‘bua’ ni bane ni butimwaeaki nako nanon ana euangkerio Iesu Kristo.” —Jean B. Bingham3
“I a tia n aki rang kakaonimaki inanon te maan ae onoua te ririki ngke ngai ao kainabau ti mwaing nakon te kawa ae boou. Au beretitenti ae boou n te Bootaki n Aine e kawarai, n titirakinai ngkana e kona ni kanakoa temanna te titita bwa e na kawarai. Ma teutana te maaku, I a kariaia. Te titita aio e kawarai ni katoa namwakaina, e ngae ngke e rereke aorakina ngkana e kaan ma kamea—ao iai au kamea ae e rangi n tatangiriia aomata! Ana mwakuri n ibuobuoki e reitinako inanon uoua te ririki, ao e korakora mwiina ae e reke nakoiu.
“E ngae ngke rorokona bon ti te mamarooro, n tabetai e titirakinai titiraki ake a kairiira nakon bitakira n te maiu n tamnei. Aikai a karika teutana aki mweraoiu, ma a tia ni kairai bwa n na rineia bwa n a wakirake inanon te euangkerio ke n a tiku n arou ae ngkai. Te rinerine aio bon te bwai ae kangaanga irou, ma I rineia bwa n a kaitibo ma mitinare aine.
“N te bong are I nako ni kaea botakin te toa n te moan tai imwiin onoua te ririki, E rotai te maaku n rin nako. Ngke I rinako inanon te kateitei, te titita are te tia buokai e teitei n tataningaai, ao e a irai n rinako n te umantabu. Imwiina, e a manga nakonako ma ngai nakon au kaa, n tuangai bwa tera ae e kona ni karaoia ni buokai ngkai I a rikirake ni kaan nakon te Tia Kamaiu.
“Ana tai ao ana tangira te tibwaua are te tia ibuobuoki e buokai ni kaokai nakon waaki ni kakukurei, ao I taua ana kekeiaki bwa teuana mai ibuakon bwaintangira ae I a tia n anganaki. I rangi ni kakaitau bwa e mena i rarikiu iaon kawaiu n oki nakon ana Ekaretia te Tia Kamaiu.”
E aki kaotaki te ara, British Columbia, Canada
Reirei aika a na Iangoaki
“E kawarai ni katoa namwakaina, e ngae ngke e rereke aorakina ngkana e kaan ma kamea”
Ko na kanga ni kaota ae ko tabe riki ibukiia tekoraki ake ko karaoa te ibuobuoki nakoia i aon riki bwaai tabeua? (taraa Reirei ao Berita Aika Tabu 121:44).
“Taian titiraki”
Taekinan titiraki aika a eti e kona ni buoka manga taraan aroarora. Uringa bwa ara mwakuri n ibuobuoki iai bukina ae e riaon riki ti te mamarooro.4
“E tei n tataningaai”
Aomata nako a riai n namakina ae a butimwaeaki raoi (taraa 3 Nibwaai 18:32).
“E mena i rarikiu iaon kawaiu n oki”
Ara boutoka e kona ni karika te kaokoro ae moan te korakora nakoia tekoraki ake a tia ni bwaka n okira te Tia Kamaiu ao ni kamaoaki (taraa Ebera 12:12–13).
Te Mwakuri n Ibuobuoki ao te Ikoikoti
“E a nakoim taraan ae kakaraoaki ao ae e bon riki iroum, n tibwaia ma aomata bwa bukin tera Iesu Kristo ao Ana Ekaretia a rang kakawaki iroum. …
“… Tabem bwa ko na tibwa te bwai are ko namakinna i nanom ao maiuakina n tainako te bwai are ko kakoaua.”—Unimwaane Dieter F. Uchtdorf5
Te mwakuri n ibuobuoki ao tibwauaan te euangkerio a uaia n ikarekebai. Aikai tabeua kawai ae ti kona ni bootia iai raoraora ao kain rarikira n ara tai n ibuobuoki—ke ibuobuoki ngkai ti bootia raoraora ao kain rarikira:
-
Uaia n ibuobuoki. Kakaea te tai ni kaoa raraom ke kain rarikin ake tiaki kain te aro n airi ma ngkoe ni buoka kainanon temana. Tuangiia bwa ana buokiko ni katauraoa te amwarake ibukin te tina ae e boou, karaoa te mwakuri i tinanikun ana auti te kara ae kain rarikim, ke kaitiaka ana auti temana ae e bwaka n aoraki.
-
Uaia n reirei. Iangoa ni kaoa raoraom ke kain rarikim are e aki bati n roroko bwa kam na booa aia reirei mitinare ni mweengaia ibukin temana are e na reirei ma mitinare, ni buokiko ni booa te reirei ni mweengam, ke n iriko n nako n ira te reirei ni mweengan temana.
-
Anga baim ni ibuobuoki. Irarikin are karaoan te mwakuri n ibuobuoki nakoia ake ko mwiokoaki ibukiia, ko kona naba n anga baim ni ibuobuoki nakoia tabeman ngkana ko nora riaina. Anga nanom ni katokaia nakon te taromauri. Kaoiia natiia nakon aia waaki ni kakukurei te roronrikirake ke te Moanrinan. Tera riki kawai ni ibuobuoki ao ni ikoikoti?
-
Kabonganai bwaai ni ibuobuoki are e a tia ni katauraoi te Ekaretia. Te Ekaretia e anga bwaai ni ibuobuoki aika mwaiti ibukiia membwa ni buokiia n tibwa te euangkerio. Ko kona ni mamataku n aia iteraniba “Mitinare” n te Gospel Library app, mataku n te witeo “Come and See” (n ChurchofJesusChrist.org/go/12011), ao kawara ComeUntoChrist.org ibukin iango bwa ko na kanga ni ikota Iteraera n ara komiuniti.