Mwakuri ma te Onimaki
Ara botoniango n te ririki aei e boboto iaon te taeka ae “nako ao karaoia,” te katanoata ae ninikoria ae e anganaki te burabeti ae kakaonimaki n Ana Boki Moomon ae Nibwaai inanon 1 Nibwaai 3:7. Ma tao te kabanea ni karaunano ni mwakoron te kibu aei e roko ngke Nibwaai e reirei bwa te Uea n taainako “e katauraoa te kawai” ibukin Ana mwakuri are e na kona ni katiaaki iai.
Te koaua are te Atua e na katauraoa te kawai imwain ae ko roko man te tabo n onimaki ae korakora. Nibwaai e ataia bwa ngkana e butiia te Atua bwa e na karaoa te bwai teuana, te Atua e na buokia naba ni kakoroa bukin te tibwanga anne. Ao ti ataia bwa ibukin ana onimaki Nibwaai ao mweengaraoina n onimakinan te Uea, e kona n tokanikai ni karekean bwaatua aika buraati.
N ai aron Nibwaai, ti kona ni karekea te onimaki n “nako ao ni karaoi.” Ko kona n aki ota n tainako bwa bukin tera taan kairiiri n te Ekaretia ke kaaro a tuangko bwa ko na karaoa te bwai teuana, ke bukin tera te Tamnei ae Raoiroi e wirikiriki nakoim bwa ko na karaoa te bwai teuana. E aki kona n tainako ni bootau ma te kantaninga, ke e kona n taraa ni kangaanga aron kakoroan bukina. Ma “akea te taeka teuana mairoun te Atua ae na aki mwaaka.” (Ruka 1:37). Ngkai ko waaki rake ma te onimaki, ko na kunea bwa te Atua n tainako iai bukina Irouna ao iai Ana baire.
Te Atua e na bon aki kona n tuangko bwa kona karaoa te bwai teuana ngkana E ataia bwa ko aki kona ni karaoia. E na bon aki kona n anganiko te mwakuri ae ko aki kona ni katiaa. Ma E na kona n tuangko bwa kona karaoa te bwai teuana are e kainnanoa te onimaki ae korakora ao te katan iaon ana kairiiri te Tamnei.
Te kiing ibukin karekean te onimaki n “nako ao ni karaoi” bon karikirakean te koaua. Ngkana iai am koaua iroun te Uea, ko onimakinna bwa E na buokiko ni kakoroi bukin mwakuri n tatabeua nako. Iangoia—ko a kanakoaki nakon te aonaaba n te tai aei ibukina bwa ko tauraoi ao ko konabwai n ana mwakuri te Uea ikai n te tai aei. Ko a tia n rineaki bwa kona maiu n te tai aei ibukina bwa te Uea e onimakiniko.
Te kakabwaia ake ko karekei ibukin karaoan te mwakuri ma te onimaki ao te mweengaraoi a bon rianako. Ko na kinako ao kona ata te kantaninga ae korakora riki n te kawai ae nakoraoi riki; ko na karikirakea am onimaki iroun Iesu Kristo ao Ana Mwakuri ni Kamaiu: ao kona ataia bwa, n raonaki, ma ana ibuobuoki te Uea, ko a bon tau.