Riki n Aron Nibwaai
Ngke e taetae Nibwaai nakon tamana, “N na nako ao N na karaoi baike e a tia n tua te Uea,” (1 Nibwaai 3:7), e a tia ni katauraoa te banna ni katoto n te onimaki ao te ongotaeka ae nanomatoa. Ana motinnano Nibwaai n nako ni karaoi e roko mai inanon uoua anua aika kakaawaki are ngaira ni kabane ti kona ni karikirakei: ana kakoaua i bon irouia iroun te Uea ao Ana burabeti, ao n tokanikai n te maiu n tamnei.
Karikirakean te Kakoaua
Nibwaai e ongotaeka ibukina bwa e a tia ni karekea oin ana koaua n ana tua te Uea nakon tamana (taraa 1 Nibwaai 2:16–20). E ataia bwa te mwakuri are karekean bwaatua ake buraati e na bon kangaanga. Ma tiaki n aroia tarina, e ataia bwa te Uea e na bon raonna ao e na katauraoa te kawai ibukiia bwa a na kona ni kakoroa bukina.
Onimakinan te Atua aei ao Ana burabeti e kakabwaia ao e kateimatoa Nibwaai rinanon nako maiuna ao e buokia ni katiai bwaai aika a kamimi. N ai aron Nibwaai, ti kona ni karaoi bwaai aika a korakora inanon maiura ngkai ti kataia n ongotaeka nakon reirei ake ti karekei mairouia burabeti aika a maiu, ana wirikiriki te Tamnei ae Raoiroi, ao koroboki aika a tabu. Te katooto, ana burabeti te Uea ni boong aikai, Beretitenti Russell M. Nelson, e a tia ni butiira bwa tina buoka ikotakiia tibun Iteraera ao ni katauraoi imwain manga okin te Tia Kamaiu.1
Ngkai ti kamatebwaia ana taeka te Atua ao n ongotaeka nako iai, ara onimaki e na rikirake ao tina namakinna inanora te nanomatoa n reitinako n ongotaeka, riki ngkana ti ataia bwa bwaai a matoatoa.
Karikirakean te Konabwai n Tokanikai n te Maiu n Tamnei
Ana banna ni katoto Nibwaai e reireiniira naba anuan Kristo ni kakai tokanikai—te mwakuri rinanon nako ara kangaanga nakon kakaean te kawai ni katoka karaoan te bwai ae tangiria te Uea bwa ti na karaoia. Iai taai inanon maiura are tina tuangaki bwa tina karaoi bwaai aika a kangaanga ao bwaai aika a kairoroaki karaoakiia. Inanon aro akanne, ngkana ti katikui ara onimaki iroun Kristo ao n rinea “te eti are e kangaanga riki n onean mwiin te kairua are e beebete riki,”2 tina bon kakabwaiaaki.
Ngkana ko kunea bwa ko kaitaraaki n te babaire ke te mwakuri ae kangaanga karekean te anua n “nako ao ni karaoi” e na buokiko n tokanikai. Kakaonimakim ni kaeka nakon ana kairiiri ake ko karekei e kaotia nakon te Uea bwa E kona n onimakiniko ao ni karikirakea am onimaki iroun Iesu Kristo.
Ngkai ko kakaonimaki ni mwakuri ni karikirakea am koaua, totokanikai n te tamnei, ao n “nako ni karaoia” n te anua anne, te Uea e na kakabwaiako, kakorakorako, ao e na kamatoako n te ririki aei ao rinanon nako maium.