Batbayar ao te Boki ma Tamneina
Bon te bong ae angang iaon Mongolia. Batbayar ae ruaiwa ana ririki e rianna nakon mweengana man te kai ni bwati imwiin ana reirei. E katika ana kooti ni kamatoa are e ukaki n te ang. E tekeraoi, e aki rangin n raraoa ma ana auti tinan ana karo, are e maeka iai.
“Mauri!” E taku Batbayar ngke e rin.
“Kaaraki nakon mweengam,” e taku Tibuna te unaine. “I karaoi tabeua khuushuur bwa te tinaeki.”
“Ko rabwa!” Batbayar e keerake n anaa teuana te bwaai ae kabuebue, ae tena.
“Taninga! Akea ae kona kanna ni karokoa a roko ikai mitinare,” e taku Tibuna te unaine. “Ana roko n te tai ae aki maan.”
Batbayar e tatangiria ngkana a roko mitinare man ana ekaretia Tibuna te unaine ao te unimwaane. E reiakina ae mwaiti mairouia n tainako. Ma ti iai te kaangaanga teuana.
“A na kona ni manga tuangai bwa N na wareka riki Ana Boki Moomon?” E titiraki Batbayar. “Te wareware e bon kangaanga irou.”
“Anne bukina ngkai a uota riki teuana te boki n te bong aei,” e taku Tibu te Unaine.
“Te boki tera?” E taku Batbayar.
“Kona bon nooria,” e taku Tibuna te unimwaane.
E aki maan ao a roko mitinare. A bane ni kana ana bwaai n irikomaiu Tibu te unaine ae kangkang. Ngkanne e taku Batbayar, “Tibu te unaine e taku bwa iai te boki ae kam uotia ibukiu.”
“I taku bwa kona tangira te boki aei,” e taku Titita Heitz. “Iai tamneina ae rawata.”
Batbayar e taraa tinanikuna. Karaki man Ana Boki Moomon, e taku. Te tamnei itinanikuna e kaota tamneia aomata aika a kabaa te kaibuke.
“I uringnga te karaki anne,” e taku Batbayar. “Te aomata anne e aki ataa aron kabaakin te kaibuke. Ngaia are e a tataro. Ao te Atua e buokia.”
“E eti anne,” e taku Titita Enkhtuya. “Ko kan kataia ni wareka te boki aei? Ngkanne ko kona n tataro bwa kona ataia ngkana te bwai are e reirei iaona e bon koaua.”
“N na warekia,” e berita Batbayar.
Te tairiki anne e wareware man te boki ae iai tamneina. E wareka karakinan te kaibuke. Imwiina e tataro. E matu n iangoa taekan te aomata are e kaba te kaibuke ao aron te Atua ni buokia.
Mai ikanne, e wareka te karaki Batbayar ni katoa tairiki. Imwiina e tataro. Ao ni katoa tairiki, e matu n iangoa taekan te bwai are e warekia.
Ngke a manga oki riki mitinare aika aine, a reireina Batbayar taekan riki Iesu Kristo. Batbayar e reiakina taekaia burabeti. E reiakina taekan ana tua te Atua. E teimatoa n nako n taromauri ma Tibuna te unaine ao te unimwaane. Ao e teimatoa ni wareware ao n tataro.
N te bong teuana iai te bwai ae e kakaawaki ae e na tuangiia tibuna Batbayar. “Ngkana I wareki karaki n te boki ae rawata tamneina, nanou e namakina te bwai ae tikiraoi,” e taku. “Ngkana I tataro, I namakinna bwa a bon koaua. I iangoia bwa I riai ni bwabetitoaki.”
N te bong aei, Batbayar e a kaina te Ekaretia. E a bwaati riki ni wareware. Ao e teimatoa ni wareka ana Boki Moomon ni katoa tairiki! ●