Nen Kawakinan te Koaua
Kamataata n te tamnei iroun Phil, i2iArt.com
Inanon au moan n ririki n te reirei n te kauarinan, a raure au karo. Inanon ririki, I nonora tamau n aki anaa te toa. I ataia ae e korakai ni kawakinii tuua, ma I aki ataia bwa mwaitira ke korakorara te korakai anne. I a ataia ngke au karo e a tuangai ae e a kamaunaaki arana man te aro ao tariu ao ngai ti a ata raoi te rongorongo.
“I ribaiko!” I takarua ni kaokiokia, ao I tang. E rangi ni maraki nanou. Ekanga ni karaoa aio nakon ara utu? I iango. E aera ngkai e kona ni kewe nakoira inanon te tai ae maan?
Te kubanako ao te uun are e moan reke e aki tiku ni maan. Inanon uoua te wiiki, uniu e a bitaki nakon ae akea te bwai ae I tabe iai. N te moan, akean au iango ni bwaai bon karauau man te un ao te maraki are I namakinna, ma n tokina karauau anne e a bitaki nakon tangiran te kan bitaki. I namakinna bwa maiu e a uruaki n aki akaka. N ae e riaon riki are mai mwaina, I namakina ae I riai n toma ma karawa. I kainnanoa ae n na namakina ana tangira te Atua, ana kakawakin, ana rau, ao ana mwakuri ni kamaiu.
N aki rangi ni maan e a roko tain te maungatabu ni kabuta. Inanon tain teuana te tetere, I ongora ao n tataninga bwa N na namakina ana karaunano te Atua. Ma karekean te namakin mairuon te Atua e aki reke. Ikekei i nanon te umwantabu ae e roo, I iango, I aki kona n namakina te Tamnei ae Raoiroi, ma I ataia bwa E bon mena ikai. E riai ni mena ikai. Ngke I iangoa aei, I a moanna n uringii taian kakoaua aika a uarereke ake I a tia ni karekei ae koroboki aika tabu a bon koaua, bwa Iotebwa Timiti bon te burabeti, ao Tamara are i Karawa e a tia ni kakabwaia au utu, ao kawakinan tuua a uota te rau. E bon taraa n ae iai irou te tabo ae e kawakinaki iai te koaua.
Ngkai I ururing rikaki iaon a na kakoaua te tamnei nakoiu mai imwaina, I a ataia raoi ae e ngae ngke I rangi ni kainanoa namakinan te Tamnei, e bon aoria ngkai I aki namakina Ana kairiiri n te tai naba anne.Ai kaman iai ae I kawakin ae kakoaua aika rau aika a teimatoa bwa te euangkerio e bon koaua.
Te atatai anne e buotokaai ao n anganai te nano ni kan reitinako ni kawakin tuua e ngae ngkana e tara n ae akea kaboan mwina ae e waekoa. Teutana imwiin teutana, I a namakina ana tangira Tamara are i Karawa ao te Tia Kamaiu inanon maiu. Tikuu ni kaan Nakoia, e ngae ngke I aki namakiniia i rarikiu ni katoa tai, e uota nakoiu te rau ae I bon kakoauaa ao te koaua ae matoatoa n ana euangkerio te Tia Kamaiu. Aio are e reitinako ni kakairai ngkai ngkana I kaitarai bwaai ae I aki koaua iai ke a kananokawaki. I ataia ae I kona n onimakina Tamara are i Karawa ao te Tia Kamaiu, ao a na bon kamaiuai, tabekai rake, ao ni kakorakoraai ao ngaira n tatabemaniira.