Kamimiin te Tai Inanon Maiu ae Boou
Kamataata n te tamnei iroun Carolyn Vibbert
I a katoka au tai n au bong inanon maiu ao ni waakina ae boou ngke akea buu n Okitobwa 2010. N te tai anne I mwakuri bwa te tia reireniia taan reirei i Buranti maiaki. Te kabuanibwai n te mwakuri e tiatiana kakamwakuriu, ao I rang n un bwa I aki waekoa n okira marurungiu ao korakorau. I tia n ebiebi ni karekean n te maiu n rabakau inanon 11 te ririki. I tangira au mwakuri. A mwaiti raoraou. Ma I aki kona ni kaaitara kainanoakiu n au mwakuri.
I riai ni kariaia bwa, imwin ae raka nakon 33 te ririki ni kawakina Tuan te Mauri, I miimi bwa bukin tera I aki kona ni “biri ao n aki kua” ke “nakonako ao n aki mamaara” (taraa Reirei ao Berita aika Tabu 89:20). N tokina, I a ritaea ni moan taai nakon are e kantaningaaki, ni katoka teuana riki te tai ni maiu.
I maeka ma natiu te aine ngke e karekea te kaetieti bwa ana mwakuri e na kamwaingnga nakon aonon Paris. I iangoia N na riai nako ma ngaia ao ni moana au tai ae boou ni maiu n te tabo ae boou.
E aki maan imwin rokora, ti kaai ni weteaki ni mwakuri n te Paris Buranti Tembora. Weteau ni mwakuri inanon te Tembora e kamatoa nakoiu bwa I a bon mena n te tabo ae eti n te tai ae eti ibukina bwa e a tia te Uea ni karokoai ikai. I a tia ni kunea te kimwareirei ae bati ni mwakuri iaon te tai ae baireaki inanon taai n au bong, ao e rang tamaroa n tibwaua te tai inanon te tembora ma natiu te aine. E oon nanou n te kimwareirei!
N te bong aei, I noori kakabwaia aika korakora are I aki namakini n te moan tai ibukin te maraki are I rinanona. Ni kabeebeteai n aki konamakiu, aki kona ni kamwakura rabakau, ao ni karekea te ritaea ni moantaai e bon kaangaanga. Ma I ataia bwa te Uea Iesu Kristo e anganai te boutoka. E a tia ni buokai ni karaurau rikaaki ao ni kunea te motirawa, kantaninga, ao te rau are a ngkai ai aron kabuburan mwakoron maiu.
Ni katoa tai ngkana I nakonako rinanon mataroan te tembora, I namakina te Tamnei ae Raoiroi. N taai ni kangaanga ma mwaitin te kangaanga man te aonaaba iaora, e bon kamiimi ataakina bwa te Uea e a tia n anganiira taabo aika tabu ike bwaai ni kabane a baireaki ao n tamaroa iaona. I namakina te kakaitau ae korakora ibukin kamiimin te tai inanon maiu ae boou man mwakuri n te tembora inanon maiu. E bon kamiimi!