Karekean Mwaakan ana Boki Moomon
E maeka te tia koro karaki i Arizona, USA.
Inanon au tai ni mitinare i Biribin, ngai ma toau ti reirei iaon mwaakan reirei ma kakaawakin te kamatebwai n ana Boki Moomon ni katoabong. Ni banen te reirei, toau e kaota ana kakoaua ae moan te mwaaka ni kamatebwaian booki aika tabu are Ia bon tibwa ongo. E kakoaua bwa warekan ana Boki Moomon e karina te mwaaka ae boou inanon maiuna are e kangaanga aron kabwarabwaraana.
E matata bwa te bwai are e rinanona ma ana Boki Moomon e a tia ni bita maiuna, ao I tangira anne bon ibukiu.
I baireia n te tairiki anne bwa N na manga wareka ana Boki Moomon. Mai moana.
I kabanea au tai ae mwaiti n tataro ni kabwarabwara nakon te Atua bwa I tangira namakinan te rairaki ao te mwaaka are e roko mairoun te Tamnei ae Raoiroi.
Te kaeka are I karekea bon: Wareware. Ti wareware.
Ngaia are anne te bwai ae I karaoia. I wakina te wareware ma te nanomatoa. I kakauongo raoi ma te nano ae onoti nakon kiibu, mwakoro, ao iteraniba n tatabeua nako. Ngke I wareware, I kunei kiibu ake a kaekai au titiraki, toroba raraomau, ao ni buokai ni kabeebetea rawawataia naake I reireiniia.
Imwiina tao e a namwakaina, I ataia bwa iai te bwai ae bitaki inanou. Au konabwai n tangira nakoia tabeman e a rikirake: e a reke riki au kantaninga ibukin taai aika a na roko, I a kona ni mwakuri korakora riki n ae abwabwaki riki ni katoabong; Ia katurua riki au iango iaon te mwakuri; ao I a moanna n namakina te kukurei ae bati.
N te bong teuana I a kaitibo ma ana taeka Beretitenti Ezra Taft Benson (1899–1994), te beretitenti mai imwaina n te Ekaretia: “Iai te mwaaka n ana [Boki Moomon] are e na waaki ni buti inanon maiura n te tai are ko moana iai te kamatebwai n te boki n taua ma nanom. … Ngkana ko a moanna ni bwarua man taka ibukin taeka akanne, ko na kunea te kimwareirei ae bati ni maium.”1
Ngke I reitinako ni kamatebwai, I a moanna n ota raoi n te bwai are e nanonna. I a kunea te kimwareirei ae bati ni maiu.
N tanrikaaki, I a ataia bwa teuana bukina ngkai I katukaki ma toau anne bwa I aonga ni kona ni mena ikekei n te tairiki anne n ongora ana kakoaua. I namakina ae kaanga mwakoron nako te maiu aika raraoi—tangira, kaantaninga, onimaki, mwakuri korakora, nanomatoa, ao te kimwareirei—a rikirake riki.
Iai te ota ae boou inanon maiu, ao I ataia bwa e bon koaua.