E warekaki te Akoi
Te Kabwarabure
N te bong teuana n te reirei, tabeman raou n reirei a bwainingarea temanna ataein te reirei n taetae ni kaunuun. E taraa ni kaunga, ngaia are I a iri ibuakoia. Inanon tabeua te wiiki, I bwabwainingareia ma raraou.
Tabeua te wiiki imwiina, te ataeinimwaane e tuangai aron ana namakin. E bon maraki n ara taeka e ngae ngke e baka n aki tabe iai ngke ti bwabwainingareia. E taku bwa e tang ni katoa tairiki. I a kuri n tang ngke e tuangai aei. I tangiria ni buokia ao I baireia bwa N na kabwara au bure nakoia n te bwai are I taekinna nakoina.
Ngaia are n te bong are imwiina, I nakoina ao I katokai baiu iaon angana. I taku, “I rangi ni kabwarabure ngkai I bwabwainingareiko.” E katoutoua atuna ngke I taetae, ao a tiinako rannimatana. Ma ataei ake tabeman a teimatoa ni bwabwainingareia. Ngkanne I a uringa te bwai are I reiakinna n te reirei n te Moanrinan: rinea ae eti.
I tuangiia raou n reirei ma te ninikoria. “Katoka ami bwainingare nakoina! Kam ataia bwa matoara ae kam karaoia nakoina? Taiaoka taekinna bwa kam kabwarabure n te bwai are kam a tia ni karaoia nakoina ao kam na riki bwa raraona.”
Ma a bon aki waekoa ni bitaki. N onean mwiina, a un irou man taku,“Tera ae riki iroum ae e a tii karina naba? Ngkoe naba ko bwainingareia!”
I bon namakina naba te aki raunnano n te bwai are I karaoia mai imwaina. Ngaia are I taku, “I a tia ni kaman kabwarabure nakoina. I tangiria bwa kam na ota n aron ana namakin ao katoka ami bwainingare naba nakoina.”
Temanna mai ibuakoia e kabwarabure, ao ngaiia ake teniman a riki bwa rao aika tamaroa. Tabeman aomata a teimatoa ni bwainingareia, ma nakoraoi ana namakin ibukina bwa ti a raoraonna. N na rinea ae eti man buokakin te rao ae kainnano. ●