I taku bwa n tabetai e beebete irouia kairake n ikawai bwa a na kakoaua bwa te rairannano bon te bwai ae rangin ni kakamaku. E koaua ae e kona ni kakamaku kaotakin te bwai ae ti a tia ni karaoia ngkana ti maaku bwa e nanonaki ni kabuaan te tangira mairouia aomata ake ti mwannanoia ke mairoun Tamara are i Karawa. Ma te iango anne iaon te rairannano, ti kona ni kaririaki bwa ti na kaota “ae e tau” ni kanakoan te namakin anne n aron te kataaki n eweka te mwaneka are imwiina. E ngae n anne, I a tia n reiakinaki rinanon au taneiai bwa anne bon tiaki aekakin te rairannano ni koaua. Te rairannano e aki kamwengaraoi n tainako, ma ngkana ti ataia bwa mwaitira tangirara iroun te Uea ao ao ana tangiria ni kan buokiira, e mauna nako te maaku ngkai ti kammwakura ara onimaki n Ana konabwai ni kaitiakiira. I reiakina bwa ngkai I kammwakura au onimaki iroun Kristo rinanon te rairannano, au kairua n taai aika a nako e aki kabwarabwara arou ngkai ke n taai aika a na roko (wareka riki au rongorongo iaon iteraniba 44).
Inanon rongorongo ake a reke man bwaai aika a maiu man te iti, Evita e katerea bwa te rairannano ni koaua e uota te kakaitau ibukin te Tia Kamaiu ao Ana Mwakuri ni Kamaiu ao e anganiira te korakora n totokoa te kaririaki n taai aika a na roko. Leah e reitia bwa ti aki riai n tataninga te toa n te Tabati—te rairaki nakon te Uea rinanon te rairannano ni katoabong e anganiira te mwaaka n urua te anua ae rang uarereke are e kairiira nako mai Irouna. Ao ngkana ti karaoi kairua aika kangaanga, Jori e tibwaia bwa karaoan te rairannano e kona n reireiniira ana tangira te Tia Kamaiu ibukira n tatabemaniira.
Te Rairannano Bon te Bwaintangira are I kakatonga ni karekea n te maiu aei. Te Atua e ataia bwa ngaira bon aomata ao ti karaoi rinerine aika a kairua n tabetai. N arora n aki kororaoi, iai te kantaninga ibukira. Ngkana ti katuka ara onimaki iroun te Tia Kamaiu, E na boutokaira inanon ara waaki n okirikaaki nakon Tamara are i Karawa—e ngae ngke e abwabwaki karaoana.