“Ni Wanawanan Teuare e Atai Bwaai ni Kabane”
Kamaataata n te tamnei iroun Christopher Wormell
Ngke I rin n aia tabo ni kataneiai mitinare ngke te mitinare ae bwanin, I kunea bwa a mwaiti bwaai aika ana reiakinaki. I karaoa au kabanea n tamaroa ni kamatebwai, ni kakorakora au koaua, ao ni kateitei iaon aan te kateitei are e a kaman reke irou. I bon tataro, bubutia Tamau are i Karawa te titiraki, ao ngkanne ni ukora te kaeka. Te mwakuri aei e bita maiu.
N te bong teuana ngke I mitinare i Peru, raou ni mitinare e karekea te reta n tuangaki bwa taman raoraona ae tangiria e karina ni mate. E bon tang. “Bukin tera Tamara are i Karawa e kariaia bwa e na riki aei?” e tang.
Iai mwiin te titiraki aei ae korakora irou. Te tairiki anne, I katorobubua ao ni bubutia Tamau are i Karawa te titiraki ae ti te arona. Ngkanne, ngke I ukoria n ana Boki Moomon, a bwaka matau iaon 2 Nibwaai 2:24, are e taekinaki, “Ma nooria, bwaai ni kabane a bane ni karaoaki ni wanawanan teuare e atai bwaai ni kabane.”
Te kibu anne inanon koroboki aika tabu e kakorakorai au namakin n nano i nanou. I korea te kaati nakon te mitinare ao ni kaira te kibu anne bwa mwakoron au koaua. I kakoaua nakoina are bwaai ni kabne a na OK ibukina Tamara are i Karawa e karaoi bwaai n te wanawana. Ti kona n Onimakinna ibukina bwa E tangiriira ao n atai bwaai ni kabane.
Tao teuana ma te iterana te ririki imwina, I mwakuri ni maungan Peru ngke I karekea te rongorongo ae kakuba n te tareboon mairoun au beretitenti n te mition. E tuangai bwa e a tia tamau n reke irouna te boo ao e tiku n aki konamaki. Imwin tabeua te tai ao e mate tamau. I rangin ni kubanako ao n un, ao I titirakiniia ma titiraki n aron, “N na kanga ni kona ni kanakoa te baei?”
I tataro nakon te Tama are i Karawa ibukin te kaeka. N tainako ao I tangiria n ataia bwa bukin tera tamau e a anaaki n akea ngai e ngae ngke bon iai ara tai ni kaboo. I rairaki nakon Ana Boki Moomon, I kaukia, ao ni wareki taeka ae ti te arona ma ake I a tia n tibwaia ma te mitinare anne inanon namwakaina aika mwaiti n nako: “Ma nooria, bwaai ni kabane a tia ni karaoaki ni wanawanan teuare e atai bwaai ni kabane.” Taeka akanne e anganai te rau ae korakora ao e anganai te akoaki ngkana I namakina te bua.
Tamau iaon te aba e a nako, ma Tamau are i Karawa e aki toki ni memena ikekei ibukiu. Tamara are i Karawa e karaoi bwaai ni kabane ni Wanawanana, ao ngkai ti ukoria ao ni karaoa ara kabanea n tamaroa ni katauraoira, ti kona ni kunea kaeka aika tamaroa.