E na Kona ni Mataata Iai?
Kamataata n te tamnei iroun Allen Garns
Inanon 2005, I bungiia teniman ataei aika a tuai koro unaia: Milena, Mateo, ao Nelson. E marurung Milena ngke e bungiaki, ma natiu mwaane ake uoman a rotaki n te kangaanga. E mate Mateo i mwiin kangaanga akanne teniua te namwakaina i mwiin bungiana.
Teuana te namwakaina i mwiina, e a reke iroun Nelson te aoraki ae maten matiretin rabwatana ao te bonotaninga. Ti bon taonaki n te rawawata. A tuangiira taokita bwa e na bon aki kona n nakonako. N te tai anne, ti bon karabwarabwa ibukin mataatara n ana euangkerio Iesu Kristo. E buokiira ni kamaatataira bwa bukin tera ti rinanon karawawataaki inanon maiura.
Rinanon te onimaki ao te mwakuri korakora, e reirei Nelson n nakonako ao n taetae ni kabongana te taetae n te bai. E a tia ni karaoa ae moan te tamaroa nakon are a tia n taekina ana taokita. E rikirake ao man kukurei inanon ara utu ao n te euangkerio.
N aki tabe ma ana aki konabwai, a bon tia ara kouru aika mwaiti ibukin Nelson: bwa e na ataa nanon te bwabetito i mwain ae e na bwabetitoaki, e na karekea te Nakoanibonga ae te Aaron ngkana e koro 12 ana ririki, ao e na nako n te tembora ni karaoi bwabetito ibukiia maate.
N 2017, e a koro 12 ana ririki Nelson. Ti buokia ni katauraoia bwa e na karaoa te bwabetito ibukiia maate. Bon te kakaewenako nakoina n ataakina ae te koraki ake a tia ni mate n aki bwabetitoaki a kainanoa ara ibuobuoki. I mwiin koron ana ririki Nelson, ngaia, Milena, tarina ao mwanena ake a ikawai Franco ao Brenda, ao tabeman roronrikirake man ara uoote a mwananga nako Córdoba Argentina Tembora. E kamauriia te berititenti n te tembora ao n taetae nakoia ibukin kakawakin te bwabetitoaki n tei ibukiia tabeman. I tekateka ma Nelson ao n taetae n te bai ibukina. E aki maan, ao e a roko ana tai. Ngke e a ruo nako nanon te tabo ni bwabetito, ti iango, e na kona ni mataata?
Ngke e ruo inanon te ran, e rotaki n te namakin Nelson. N te tai anne, ti namakina ana kaotioti te Tamnei ae Raoiroi nakoira bwa e bon mataata bwa e karaoa te mwakuri ibukiia ana bakatibu ake a tia ni mate are aki kona ni karaoia i bon irouia. Ti ataia bwa e mataata ae kaain ana utu ake ni iteran te rabuna are te iterana a kukurei bwa e buokiia. E kaotia naba te Tamnei ae Raoiroi nakoira bwa e mena naba Mateo ikekei n raona tarina ao mwanena. Imwiin aeraken Nelson man te ran, e rangi ni kukurei.
Man te tai anne, e a tia ni bwabetitoaki ao ni kamatoaaki Nelson ibukiia kaain ana utu aika mwaiti, n raonaki ma tamau, are e mate n 2016. Ti tangira te tembora. Te beku ikekei e riki bwa ai te katei n ara utu. Ni katoa tai are ti nako iai, ti ururinga te tai ae e kakawaki anne.