Te Kabanea n Tikiraoi n Inga!
E maeka te tia korokaraki i Utah, USA
Ellie e tatangira te inga. Te inga mairoun Tamana. Te inga mairoun Tibuna te aine ao Tibuna te mwane. Te inga mairoun Tinana. Te inga e namakina iai te kaabueaki. Ao te kamanoaki. Ao te kukurei.
Anne bukina Ellie e inga ma Tinana n tain te taromauri. E tatangiria n tekateka iaon toan waen Tinana. Tinana e uouotia n tainako ni katenaa ma ngaia.
Ngkanne e toki tain te bootaki n toa. E a boo te tai ibukin te Moanrinan. Ellie e tatangira te Moanrinan. Ai bon te ataeinnaine ae e a ikawai ngkai. Teniua ana ririki! E a bon reke naba oin ana boki ae tabu!
Ma n te bong aei Ellie e tii tangiria n teimatoa n inga ma Tinana n aki toki.
Tinana e uouota Ellie ni kawain te kateitei ae abwabwaki. N ana ruu te Moanrinan, Tinana e katekateka Ellie iaon te kai n tekateka.
“I kona n iriko?” E taku Ellie.
“Ko aki,” e taku Tinana. Bwanaana e bwana n akoi. “Ko riai n tiku n am kiraati,” e taku. “Ao ngai I riai n tiku n au kiraati.”
Tinana e aroka taban Ellie. Imwiina e rianna n otinako man te mataroa.
Ellie e namakina rannimatana ni bwaro iaon tabana.
E iangoa aron Tinana n tautaua. Tinana e taua n tainako ngkana e wareka ana Boki Moomon. N tainako a wareware ma aia utu. Ma n tabetai Ellie ma Tinana a wareware ibon irouia.
Elllie e ana Boki Moomon. Inanona bon tamnein Iesu.
Ellie e kaina te boki ao e inga ma ngaia. E namakinna ae kaanga e inga ma Iesu. E namakina te aabue. Ao te kamanoaki. Ao te kukurei. Te kabanea n tikiraoi n inga! ●