Kairake n Ikawai
Te Kawai ae i Nako Iai Ngkai E Kakaawaki Riki Nakon Are I Mena Iai Mai Imwaina. Ngkai E Kakaawaki Riki Nakon Are I a Tia Ni karaoia Mai Mwaina
E maeka te tia korokaraki i Utah, USA.
I toua te kawai are e kairai nako man te kawai ae e eti man irariki ni mwaitin te tai, ma rinanon aikai ni kabane, I a tia n reiakinna ae mwakan te Tia Kamaiu ao Ana Mwakuri ni Kamaiu e bon koaua.
Maiu e aki riki nakon aron are I kantaningaia bwa e na riki.
Ngke I a roko n 18, I kantaningaia bwa N na beku n ae bwanin au tai n te mition, ni mareaki n te tai ae waekoa imwiina, ao ni moana au utu n au ka 25. Ngkai, ai 32 au ririki ni maiu. I aki nako n te mition, ao I a aki kakaonimaki n te Ekaretia inanon maiu n au tai n rikirake. I mareaki—I a manga raure—ao ni manga mareaki riki.
Ibukina bwa I karaoi rinerine aika aki boraoi ma tuua, I tuai man namakinna ae I tau nakon te ekaretia. Ma e ngae n anne, I a tia n ataia bwa iai te tabo ibukiu. E a tia au taneiai n reiakinai bwa mwaakan te Tia Kamaiu ao Ana Mwakuri ni Kamaiu a koaua ao bwa te bwai ae moan te bongana riki bon tiaki taabo ake I a tia ni mena iai, ma te kawai ae I a toua ngkai.
I taku bwa I a moanna n nanououa n te bwai are I kakoauaa ibukina bwa I aki rangi ni koaua bwa e a matoa raoi au koaua n nako ni karaoa au mition. I uringnga bwa inanon taai ngke e a bane au kauarinan I iango n aron, Ao tera ae e na riki ngkana arona bwa au koaua bon tiaki raoi mai irou? Ao ai tera arona ngkana I a tia n rangi ni katuka reken au onimaki iaoia tabeman?
Anne are e aki rau nanou iai. I tangiria n nako n te mition, ma I bon iango bwa tao au taneiai ake I namakin man te tamnei ake I a tia ni karekei ni karokoa te tai aei a tau ni karikai bwa te mitinare ae nakoraoi n aron are e kantaningaaki—temanna are e tau korakorana n tamnei ao e tau ana atatai iaon te euangkerio n reiakiniia tabeman.
Ngkai I iangoa taekana ngkai, N na kaman tia ni butia te Atua bwa E na buokai ni kaotaai n te reirei are e kanakoaki n Reirei ao Berita aika Tabu 124:97: “E riai n nanorinano imatau, … ao e na karekea Tamneiu, ae te Tia Karaunano, are e na kaotii nakoina koauan bwaai ni kabane, ao e na anganna, n te tai naba anne, te bwai are e na taekinna.”
Ma n aron are N na butiia te Atua, I bua bwa I kabotaua aron maiun tamneiu ma maiun tamneia tabeman, ao I maaku bwa aki nakoraoiu e na tukiia aomata man butimwaean te euangkerio.
Ni maeka n raroanako mairouia au karo n au tai ni kairake, I a reitinako ni kataia ni kakaea bwa tera ae I kakoauaa. I aki nora mwiina ae buakaka n te bwai are I noria n te babaire ae e okoro are e aki kaotia raoi bwa antai ngai. I a moana n aki bati n taetae nakoia ake I tangiriia ibukina bwa I ataia ae a na rangi n aki kukurei ni baike I karaoi. Ao n aron aei, I a kairekerekeai ma aomata ake a aki rangi n tabe ma te bwai ae I kakaraoia. N te bong teuana I a kataa nimakin te kamanging bwa N a noria. E a riki te moi manging bwa kanga ai iteran maiu ao n tokina man tii te kakakibotu nakon te bwai ae I a karikia bwa te tia boutokaai ni kaitarai kakatai aika a kangaanga. Bitaki aika aki raraoi inanon maiu n te tai anne a bon aki tii nako man te rinerine ae ti teuana; a riki man taai aika mwaiti. E nakon uoua te ririki ataakina irou bwa rinerine aika a uarereke ake I karaoi inanon te tai ae maan e a tia ni kairai nakon te kangaanga ae I aki tangiria bwa N na mena iai.
Ngkai, I aki taekina ae ngkana ko na reiakina koauan te euangkerio, ko riai n rinanon te kangaanga ni kaitaraana. Baike I karaoi a karika te maraki tiaki tii nakoiu ma nakoia naba aomata ake I tangiriia—angiin te maraki anne aki riai n riki. I kakaitau bwa I kona teutana ni karinanoai n ataia ae (Te moan) e aki rau maiu, ao (Te kauoua) I a tia n rangi ni kukurei ngke I maiuakina ana tua te Atua. Anne te bwai ae I bon ataia raoi, te bwai are I aki nanououa iai bwa I ataia ao I kona n tibwaia ma tabeman.
I nakon au bitiobi ni kaeti bwaai ni kabane, ao ti aki toki ni mamarooro ibukin katauraoau ni beku n te mition. A moanna ni bane kanoakin au beba ngke I a namakinna bwa e na riai ni mataata n aron tabeua rinerine ake I a tia ni karaoi. E bon aki beebete te marooro anne, ma ngkai I rangi n tangiria riki ni kan nako n te mition, I tangiria n raira raoi nanou. Iai nanou ni bukinaki n te bwai ae I a tia ni karaoia ae bure ao n tuanga te Atua bwaai ni kaane bwa I aonga ni kona n itiaki.
N te tai ae waekoa imwiina, I a roko imatan te kauntira ni kaetieti. E kakamaku n arona tabeua ni kakoaua te bwai are I a tia ni karaoia imataia aomata ake a tia n riki bwa au taan kairiiri ao au katooto inanon ririki, ma ngke I taraa nanon te ruu, I namakina te rau. I kona n noriia bwa a mena ikekei bwa a na mataata ao a na buokai. Ngke I otinako, I namakina te Tamnei n anganai te raunnano imwiin te babaire, I a tia ni karaoa tabeu ao a na bon Nakoraoi bwai. Te Atua ao taan kairiiri ake a tangirai a na mwakuri ma ngai bwa I aonga n mena n te tabo are N na riai ni mena iai. I nako ma namakinan ana tangira te Tia Kamaiu ao n ataia bwa I aki tionako man Ana mwakuri ni kamaiu.
Te Tabo ibukin te aki Kororaoi
E ngae ngke I namakina te rau, e bon matoatoa kaekaan titiraki mai irouia aomata bwa bukin tera ae I aki nako ni mition. Ngke I wakinako inanon kawain te rairanano ma ana ibuobuoki te bitiobi, e a rikirake ni kekerikaki ae te nako n te mition e na bon riki. I a kataia ni kakaea bwa N na kanga ni waaki nako ma maiu. N au ka 21, ibukina bwa I aaki reke iaan te katauraoi nako ni mitinare, te mitinare ae e oki ae bwanin ana tai, ke te kurubu n kairake n ikawai aika a mare, e bon kangaanga namakinan ae I irekereke nakon te kurube teuana.
Te iraorao ni kareke tangira e bon kangaanga. N tabetai a taraai ataeinaine n aron ae kanga I kaokoro imwiin are I tuangiia ae I aki nako n te mition ao I aki rangi ni kakaonimaki inanon te tai ae maan. Tao i bon ibukina teuana ma teuana, angiin au mamarooro a aki reitinako imwiin te moan kaitibo.
I kukurei bwa n tokina I mareaki n te tembora, ma n tabetai ao I bon namakina naba ae I aki tau. Iai au koaua, ma I aki ataa aron tibwakina, ao te nanako n te kiraati n te aro a riki bwa kakatai are a na norai iai raraou bwa I kabwaka iai. I iangoa anne ibukina bwa angiia a rinanon te maiu are I tangiria, a aki rinanon te bwaka n aron are e reke irou.
N te bong teuana e weteai te Bitiobi ao e anganai te wewete bwa N na tia reirei n aia kooram unimwaane. I rangi ni kubanako, ngkai ai bon tibwa uatai au tai ni kaea te kooram n unimwaane inanon te ririki ae nako. Ma irarikin te nakonnano ae korakora, I butimwaea te wewete. N au moan tai n angareirei n te Tabati, I kunea bwa I moanna man taekinan te butimwaai ae moan te kaokoro are a tuai man ongongo mai imwaina:
“Mauri, tariu, Ngai Richard Monson. I aki nako n te mition ao I aki rangi ni kakaonimaki inanon maiu ngkai I a ikawai. I bon aki kakaea te kooram n unimwaane n taai nako ibukina bwa I namakinna ae tiaki ngai kaina ke n tau nako iai. I aki kona ni kaekai ami titiraki ni kabane, ma au kantaninga bwa kam na ira buakon te waaki bwa ti aonga ni bane n reiakinaki. Ngkana e Raoiroi iroumi n aron are I roko mai iai, ngkanne ti nang waaki.”
N te bong anne I a ataia ae I kona ni kaotia nakoia tabeman—ao bon nakoiu—bwa e ngae ngke I taraai ae tiaki ngai “kanoan te kai ni katebe ae eti” (temanna ae e beku n te mition, e kakaonimaki inanon maiuna, ao e tuai karaoi kairua aika korakora), I bon kairaki naba nakon te tabo ake a kairaki nako iai, ao anne ae moan te kakaawaki. I bon mimi, bwa I kunea ae angiia mwaane aikai ake I taku bwa a maiuakina te maiu ae kororaoi ngaia a bon tia naba ni karaoi kairua. I taku bwa e boutokaa te iango nakoira ni kabane ae te kororaoi bon tiaki tii te bwai ae e kantaningaaki ae e na uota te nakoraoi nakon te kiraati ke te Ekaretia ae bwanin.
Taai ni Kangaanga ao te Babaire
Te kananokawaki, bwa au waaki inanon te Ekaretia e aki teimaan. Au mare e rinanon te kangaanga, ao I onimakin kateiu ni kawai aika buakaka bwa e na katoka marakiu. Mwakuri ake I tangiri ni karaoi a onea mwiin te nanako n taromauri.
Teniua te ririki a waaki nako, ao I a rinanon kangaanga ae I tuai n namakinna mai imwaina. I riai ni karaoa te rinerine. I kona ni maiuakina te euangkerio i bon ibukiu n aki tabe ma te bwai ae a tia n riki inanon maiu? Ke ni totokoa butimwaean te kariiri? I ataia bwa kamatoaan nanou nakon te kawai ae eti ao ni wariki e nanonaki ae N na kanakoi kariiri aika aki raraoi man maiu. Nanou naba, ni kan oki nakon te ekaretia e kaotia bwa kainabau ao ngai ti tangiri bwaai aika kaokoro. Ao ngkai aron ara mare n te tai aei, ti a kakaniia iangoan te raure.
I maaku. Bon akea koauana raoi bwa au kekeiaki e na anganai baika a raraoi ake I tangiri n te maiu aei. Ma au rinerine a oki rikaki nakon are I a kaman reiakinna inanon ririki aika nako—bwa e korakora kukureiu ni maiuakinan te euangkerio. I a iangoia bwa N na kabanea nanou ao ni irii ana tua te Atua, ni butimwai bwaai ni kabane. N nikiran maiu, N na Onimakinna.
Ngkai, I a moana nanakou n taromauri ao ni kaeta raoi maiu. Teuana mai ibuakon kukureiu ni maiu bon te tai are I a manga karekea te beeba ni kariaia nakon te tembora. I kunea te raunano inanon te tembora ngkai e a moanna n iai te kangaanga n au mare ao n tokina e a roko n tokina.
Kunean ae e Nako Maia Ataakin Bonganau
E ngae ngke te babaire ni manga moana kawakinakin taian tua e boni koaua, ao man te taneiai anne I reiakina te kakaitau ni baike e tangiri te Atua bwa N na karaoi inanon kawaiu. E ngae ngke I a tia ni karaoi buure, I kona ni bitaki ao ni karaoa ae eti. I aki kaiangatoa ma tabeman. Ngkana I katan i aan te Tia Kamaiu ibukin bonganau, I kona ni katoka kabanean au tai ni kataia ni bita aia taratara tabeman iaou.
I kunea bwa rokou n te taromauri bon akea kangaangana ngkana I tekateka n tii ngai ke i buakoia membwa ake a kaokoro aroia n te maiu aei. I kataia ni kekeiaki n aki karabaai ao ni butimwaai marooro ma aomata n au uoote. I a kona ni kukurei n iriira au bootaki n aron are e bon kantaningaaki.
Reken te rau anne e buokai naba ngke I a manga oki ni mamaroro ni kareke tangira. E bon aki bati n rereke te marooro te kauatai, ma I ataia ae N na aki bita aron kateiu tao ibukina ae I a tia n tibanako n taai ake mai mwaina. I maiuakina te euangkerio n aron au kabanea ni konaa, ao I a bon tau naba ni marooro ni kareke tangira ma te koraki ake a maiuakina te euangkerio n nakon aia kabane ni konaa.
Ao ni bon tokina I a kunea natin te Atua te aine ae kororaoi are I a mareia n te tembora. E bon rangi ni kaokoro aroaron maiuna ma ngai, ma ngkana e roko n tangiran te Tia Kamaiu ao mataatara n Ana Mwakuri ni Kamaiu, ti namakinna ae ti mena n te kawai ae titebo.
Inanon ririki, I a tia n reiakinna bwa N na aki karika arou ake rimoa ke aia kariaia aomata bwa a na kabwarabwaraa aron bonganau ae ngkai. I kararoa te iango ae e na nakoraoi maiu ti ngkana e kororaoi. Angiia aomata a aki kukurei bwa I mena iaa ngkai ibukina bwa I kanga n roko ikai, ma bon akea te kangaanga n anne. Bon tiaki au kouru bwa N na kataia n anai nanoia. Au kouru bwa N na reitinako n rairanano ao ni kaaniai riki ma te Tia Kamaiu. Bon mai Irouna ae, n aron Aramwa te Teei imwiin ana rairannano, I konaa n “aki manga karawawataki n uringakin au bure” (Aramwa 36:19). I kona ni karekea te rau n ataakin ae bon tii man te tabo are N na nako iai—nakon te Tia Kamaiu—ae e taraaki.