2020
Dip Insaed long Hat blong Yumi
Mei 2020
2:3

Dip Insaed long Hat blong Yumi

I Kam long Douglas D. Holmes

Fas Kaonsela long Yang Man Jeneral Presidensi we Oli Jes Rilisim

Lod i stap traem blong helpem yumi—evriwan i—blong karem gospel blong Hem i go dip insaed long hat blong yumi.

Ol sista mo brata. !Hemia wan gudfala taem blong laef long hem! Taem yumi stap selebretem stat blong Restoresen, hem i stret tu, blong selebretem Restoresen we i stap gohed naoia we yumi stap witnesem. Mi glad wetem yu blong laef long dei ia. 1 Lod, tru long ol profet blong Hem, i gohed blong putum evri samting long ples we i nid blong helpem yumi rere blong akseptem Hem. 2

Wan long ol samting ia we oli nidim hem i niufala program blong Ol Pikinini mo Ol Yut. Plante long yufala oli save se program ia i wok plante moa long saed blong setemap ol gol, niufala wei blong kam pat long program, mo ol konfrens blong Ol Yut Oli Kam Strong. Be bae yumi no letem ol samting ia oli kavremap lukluk blong yumi long ol prinsipol ia we oli bildim program ia antap long hem mo stamba tingting blong hem: blong help karem gospel blong Jisas Kraes i go dip insaed long ol hat blong ol pikinini mo yut. 3

Mi biliv se taem yumi kam blong lukim ol prinsipol ia moa klia, bae yumi andastanem se hemia i moa long wan program blong ol memba we oli gat 8 kasem 18 yia. Bae yumi luk olsem wanem Lod i stap traem blong helpem yumi—evriwan i—blong karem gospel blong Hem i go dip insaed long hat blong yumi. Mi prea se bae Tabu Spirit i helpem yumi blong lan tugeta.

Rilesensip—“Stap wetem Olgeta” 4

Fas prinsipol i ol rilesensip. From se oli olsem stret pat blong Jos ia blong Jisas Kraes, samtaem yumi fogetem hamas ol rilesensip ia oli impoten long rod ia we i gohed i go long Kraes. Yumi no ting se yumi mas faenem o wokbaot long kavenan rod yumiwan. Yumi nidim lav mo sapot long ol paren, ol nara famli memba, ol fren, mo ol lida we oli stap wokbaot tu, long rod ia.

Ol kaen rilesensip ia oli tekem taem. Taem blong stap tugeta. Taem blong laf, pleiplei, lan mo givim seves tugeta. Taem blong talem tangkyu long ol intres mo jalenj blong yumi wanwan. Taem blong stap open mo stap ones long wanwan long yumi taem yumi stap wok had blong kam moa gud tugeta. Ol rilesensip ia oli wan long ol stamba tingting blong kam tugeta olsem ol famli, kworom, ol klas, mo ol grup. Oli ol fandesen blong mekem wok blong givhan we i wok gud. 5

Elda Dale G. Renlund i givim yumi wan ki blong developem ol rilesensip ia taem hem i talem: “Blong givim gud seves long ol narawan yumi mas luk olgeta … tru long ol ae blong Papa long Heven. Long wei ia nomo, bae yumi stat blong andastanem tru valiu blong wan sol. Long wei ia nomo, bae yumi filim save lav we Papa long Heven i gat long evri pikinini blong Hem.” 6

Blong lukluk ol narawan olsem we God i luk olgeta i wan presen. Mi invaetem wanwan long yumi blong lukaotem presen ia. Taem ol ae blong yumi oli open blong luk, 7 bae yumi save helpem ol narawan tu, blong oli luk olgetawan olsem we God i luk olgeta. 8 Presiden Henry B. Eyring i givim moa paoa long hemia taem i talem: “Wanem i moa impoten i we [ol narawan] oli lanem samting aot long [yu] abaot huia olgeta tru, mo wanem oli save mekem. Mi ting se bae oli no save lanem tumas samting ia long skul tija. Bae oli save kasem tru long ol filing se huia yu, huia yu ting se oli olgeta, mo wanem yu ting se olgeta oli save kam olsem.” 9 Blong stap helpem ol narawan oli andastanem tru aedentiti mo stamba tingting blong olgeta i wan ol bigfala presen we yumi save givim. 10 Blong luk ol narawan mo yumiwan olsem we God i mekem, bae i wivim hat blong yumi “tugeta long yuniti mo long lav.” 11

Wetem paoa blong wol we i stap gohed blong pulum yumi, yumi nidim paoa we i kam long ol rilesensip we i gat lav. So taem yumi stap plan long ol aktiviti, ol miting, mo ol nara kam tugeta, bae yumi tingbaot se stamba tingting blong ol kam tugeta ia, i blong bildim ol rilesensip we i mekem yumi joen wan, mo help blong karem gospel blong Jisas Kraes i go dip insaed long hat blong yumi. 12

Revelesen, Fridom blong Mekem Joes, mo Fasin blong Sakem Sin—”I Joenem Olgeta wetem Heven” 13

I tru, i no inaf blong fasem yumi tugeta nomo. I gat plante grup mo asosiesen we oli kasem yuniti long plante kaen stamba wok. Yuniti we yumi stap lukaotem hem i blong kam wan long Kraes, blong joenem yumiwan wetem Hem. 14 Blong joenem hat blong yumi wetem heven, yumi nidim ol eksperiens blong yumiwan long saed blong spirit, olsem we Elda Andersen i jes talem long yumi long wan naes wei. 15 Ol eksperiens ia oli kam taem Tabu Spirit i karem toktok mo lav blong God i kam long maen mo hat blong yumi. 16

Revelesen ia i kam long yumi tru long ol skripja, speseli Buk blong Momon; tru long ol toktok blong insperesen we oli kam long ol profet we oli stap laef mo ol nara fetful disaepol, mo tru long smol voes we i kwaet. 17 Ol toktok ia oli moa bitim ing long wan pepa, ol saon blong wef long sora blong yumi, ol tingting long maen, o ol filing insaed long hat blong yumi. Toktok blong God i paoa long saed blong spirit. 18 Hem i trutok mo laet. 19 !Hem i olsem wanem yumi harem Hem! Hem i statem mo leftemap fet blong yumi long Kraes mo i givim paoa long tingting blong hat blong yumi blong kam moa olsem Sevya,--- we hem, i blong sakem sin mo wokabaot long rod blong kavenan. 20

Las Epril, Presiden Russell M. Nelson i bin helpem yumi blong andastanem fasin blong sakem sin we i gat wan stamba rol long revelesen wokbaot ia. 21 Hem i talem: “Taem yumi jusum blong sakem sin, !yumi jusum blong jenis! Yumi letem Sevya i jenisim yumi i kam wan moa gud vesen blong yumiwan. … !Yumi jusum blong kam moa olsem Jisas Kraes!” 22 Paoa blong tok blong God we i mekem jenis ia, i olsem wanem yumi joen wetem heven.

Andanit long invitesen blong Presiden Nelson blong sakem sin, hem i prinsipol blong fridom blong mekem joes. Yumiwan i mas jusum blong sakem sin. Oli no save fosem gospel blong i kam insaed long hat blong yumi. Elda Renlund i talem, “Gol blong Papa blong yumi long Heven, long saed blong stap olsem papa mo mama, i no blong gat ol pikinini we oli mekem wanem i raet; hem i blong gat ol pikinini blong Hem oli jusum blong mekem wanem i raet.” 23

Long ol program ia we program blong Ol Pikinini mo Ol Yut i tekem ples blong olgeta, i bin gat bitim 500 defren samting we yu nid blong mekem blong save kasem ol defren kaen rekonisen. 24 Tedei, i gat wan nomo. Hem i wan invitesen blong jusum blong kam moa olsem Sevya. Yumi mekem hemia taem yumi akseptem toktok blong God, tru long Tabu Spirit, mo letem Kraes i jenisim yumi i kam bes vesen blong yumiwan bakegen.

Hemia i moa bitim wan eksasaes blong setem gol o blong mekem yuwan i kam antap. Ol gol oli ol tul we oli helpem yumi joen wetem heven tru long revelesen, fridom blong mekem joes, mo sakem sin—blong kam long Kraes mo akseptem gospel blong Hem i go dip insaed long hat blong yumi.

Blong Kam Pat mo Sakrifaes—“Letem Olgeta I Lid” 25

Laswan, blong karem gospel blong Jisas Kraes i go dip insaed long hat blong yumi, i nid blong yumi kam pat long hem—blong givim taem blong yumi mo talen blong yumi long hem, blong sakrifaes from hem. 26 Yumi evriwan i wantem laef folem wan laef we i gat mining, mo hemia i tru tumas abaot jeneresen we i stap kam antap. Oli wantem wan stamba wok blong wok from.

Gospel blong Jisas Kraes i stamba wok ia we i nambawan long evriwan long wol ia. Presiden Esra Taf Benson i talem: “God i komandem yumi blong tekem gospel ia i go long evri ples long wol. Hemia i wok we i mas yunaet long hem tedei. Gospel ia nomo bae i save sevem wol ia long ol disasta we oli spolem hemwan bakegen. Gospel ia nomo bae i yunaetem ol man [mo ol woman] blong evri kala mo nesen long pis. Gospel ia nomo bae i save karem glad, hapines, mo fasin blong sevem man i kam long famli blong man.” 27

Elda David A. Bednar i promesem: “Taem yumi givim paoa ia long ol yut taem yumi invaetem olgeta mo letem olgeta blong tekem aksen, bae Jos i muv i go fored long ol merikel wei.” 28 Fulap taem, yumi no stap invaetem mo letem ol yut blong mekem sakrifaes from bigfala wok ia blong Kraes. Elda Neal A. Maxwell i faenemaot se, “Sapos ol yut [blong yumi] oli no filim i hevi tumas [from wok blong God] bae i gat moa janis blong oli filim wol ia i hevi tumas long olgeta.” 29

Program ia blong Ol Pikinini mo Ol Yut i lukluk moa blong givim paoa long ol yut. Oli jusum ol gol blong olgetawan. Oli putum ol presidensi blong kworom mo klas presidensi long stret rol blong olgeta. Wod yut kaonsel, semmak olsem wod kaonsel, i lukluk moa long wok blong fasin blong sevem man mo fasin blong kam olsem god. 30 Mo ol kworom mo klas oli statem ol miting blong olgeta taem oli kaonsel abaot wei blong mekem wok we God i bin givim long olgeta. 31

Presiden Nelson i talem long ol yut blong Jos: “Sapos yu jusum blong mekem, sapos yu wantem … !yu save stap olsem wan bigfala pat blong wan bigfala samting, wan samting we i naes tumas, wan samting we i gat fulap paoa! … Yu stap insaed long olgeta we oli gud moa, we Lod i bin eva sendem i kam long wol ia. !Yu gat paoa ia blong kam moa smat mo waes mo save gat moa paoa long wol ia bitim ol nara jeneresen we i pas!” 32 Long wan nara taem, Presiden Nelson i talem long ol yut: “Mi trastem yufala fulwan. Mi lavem yufala. Mo Lod tu. Yumi ol pipol blong Hem, yumi joen tugeta long tabu wok blong Hem.” 33 Ol yangfala pipol, ?yufala i save filim tras ia we Presiden Nelson i gat long yufala mo hamas yufala i impoten long wok ia?

Ol papa mo mama, mo ol adalt lida, mi invaetem yufala blong luk ol yut olsem we President Nelson i luk olgeta. Taem ol yut oli filim lav mo tras blong yu, taem yu leftemap tingting mo tijim olgeta olsem wanem blong lid—mo afta kamaot long rod blong olgeta—bae oli sapraesem yu wetem ol lukluk mo tingting blong olgeta, wanem oli save mekem, mo komitmen blong olgeta long gospel. 34 Bae oli filim glad ia blong jusum blong kam pat mo sakrifaes long wok ia blong Kraes. Gospel blong Hem bae i go moa dip insaed long hat blong olgeta, mo wok bae i go fored long ol wei blong merikel.

Promes mo Testemoni

Mi promes se, taem yumi lukluk moa long ol prinsipol ia—ol rilesensip, revelesen, fridom blong mekem joes, sakem sin, mo stap sakrifaes—gospel ia blong Jisas Kraes bae i draon moa dip insaed long hat blong yumi. Bae yumi luk Restoresen i muv i go fored i go from ful stamba tingting blong hem, blong pemaot Isrel mo stanemap Saeon, 35 ples we Kraes bae i rul olsem King blong olgeta king.

Mi testifae se God i gohed blong mekem evri samting we i gat nid blong rere long ol pipol blong Hem from dei ia. Bae yumi luk han blong Hem long wok ia taem yumi evriwan i stap traehad blong “kam long Kraes, mo kam stret evriwan tru long Hem.” 36 Long nem blong Jisas Kraes, amen.

Ol Not

  1. Luk long Doktrin mo ol Kavenan 45:12. Presiden Nelson i talem: “Tingbaot nomo glad ia mo hamas evri samting ia impoten: evri profet stat long taem blong Adam oli bin luk taem blong yumi. Mo evri profet oli bin tokbaot dei blong yumi, taem bae oli karem Isrel i kam tugeta mo bae oli mekem wol i rere from Seken Kaming blong Sevya. !Tingbaot hemia! Aot long evri pipol we oli bin laef long wol ia, yumi, yumi olgeta ia we i gat janis blong tekpat long las, bigfala taem ia blong kam tugeta. !Hemia i gud tumas!” (“Hope of Israel” [worldwide youth devotional, June 3, 2018], HopeofIsrael.ChurchofJesusChrist.org).

    Elda Jeffrey R. Holland i tijim:

    !I wan gudfala taem blong laef long hem!

    “Gospel blong Jisas Kraes i tru, i moa sef, i gat moa tras long hem, mo i trutok we i gat praes long wol mo long heven, long taem ia mo long taem we i no save finis. Nating—i no gat samting, no gat man, no gat eni paoa—we bae i kipim Jos ia blong i no save fufilim misin blong hem mo kasem ples we bae i kasem oli bin talemaot bifo oli putum fandesen blong wol ia. … I no nid blong fraet o blong gat tu tingting abaot fiuja.

    “I no semmak olsem ol nara taem we oli kam fastaem long yumi, dispensesen ia bae i no save eksperiensem wan taem blong apostasi; bae i no luk ol ki blong prishud i lus; bae i no harem nogud from God we i gat olgeta paoa i stop blong toktok tru long revelesen. … !I wan gudfala taem blong save stap laef!

    “… sapos yu save wanem mi stap minim, mi stap tok abaot ol las dei. … Biliv. Stanap. Stap fetful. Mo mekem dei ia we yumi laef long hem i kam we bae oli tingbaot long oltaem.” (Facebook post, May 27, 2015; luk tu long “Be Not Afraid, Only Believe” [toktok i go long ol tija blong Relijin blong Jos Edukesen Sistem, 6 Feb 2015], broadcasts.ChurchofJesusChrist.org).

  2. Luk long Jon 1:12.

  3. Sot taem afta oli singaotem mifala olsem Yang Man Jeneral Presidensi, Presiden Henry B. Eyring i tokbaot wetem mifala ol jalenj mo janis we oli spesel we ol yut blong Jos oli fesem tedei. Hem i kaonselem mifala blong lukluk moa long olgeta samting we bae i help blong tekem gospel blong Jisas Kraes i go dip insaed long hat blong olgeta. Kaonsel ia i stap olsem wan gaed blong mifala olsem Ol Yang Man Presidensi.

  4. Luk long “Be with Them,” ChurchofJesusChrist.org/callings/aaronic-priesthood-quorums/my-calling/leader-instruction/be-with-them.

  5. Luk long Mosaea 18:25; Moronae 6:5.

  6. Dale G. Renlund, “Through God’s Eyes,” Liahona, Nov. 2015, 94; luk tu long Moses 1:4–6.

    Presiden Thomas S. Monson i bin tijim se: “Yumi gat responsabiliti ia blong luk ol man mo woman i no long wei we oli stap long hem naoia be long wei we oli save kam olsem. Bae mi askem strong long yufala blong tingting blong tingting long olgeta long wei ia nao” (“See Others as They May Become,” Liahona, Nov. 2012, 70).

    Elda Neal A. Maxwell i bin tijim: “Fulap taem, olsem wanem wan yang man i soemaot hem i no go tugeta wetem standet blong Jos, o kwestin we oli askem abaot hem, o ol tu tingting we hem i soemaot i mekem ol man oli kwik blong putum wan pikja long hem. Hemia i save risal long man ia blong stap longwe, o samtaem, nomo stap long grup. !Tru lav i no laekem ol nem o pikja!” (“Unto the Rising Generation,” Ensign, Apr. 1985, 9).

  7. Luk long Seken King 6:17.

  8. Stephen L. Richards, olsem wan memba blong Fas Presidensi, i talem: “Gudfala wei blong luksave samting, i blong save long ol narafala man mo putum long klia gudfala fasin blong olgeta, we oli gat insaed long olgeta” (insaed long Conference Report, Apr. 1950, 162; insaed long Conference Report, Apr. 1950, 162; insaed long David A. Bednar, “Quick to Observe,” Ensign, Dec. 2006, 35; Liahona, Dec. 2006, 19). Luk tu long 2 King 6:17.

  9. Henry B. Eyring, “Teaching Is a Moral Act” (toktok we hem i bin givim long Brigham Yang Yunivesiti, 27 Ogis 1991), 3, speeches.byu.edu; oli ademap italik, Aug. 27, 1991), 3, speeches.byu.edu; oli ademap ol dak leta; luk tu long Henry B. Eyring, “Help Them Aim High,” Liahona, Nov. 2012, 60–67.

  10. Luk long Moses 1:3–6.

  11. Mosaea 18:21; luk tu long Moses 7:18.

  12. “Ol Yang man we oli gat ol strong mo gud rilesensip wetem wan aktiv famli [blong Lata-dei Sent], ol fren, mo ol lida, we i helpem olgeta blong developem wan rilesensip wetem Papa blong olgeta long Heven, oli gat fulap moa janis blong stap aktiv. Sam stret pat blong program—olsem Sandei kurikulom, [Yang Man] aktiviti program, ajivmen blong miwan … i save gat smol paoa we i no joen wetem ol rilesensip ia. … Kwestin we i impoten i no olsem wanem oli yusum fulwan ol stret pat blong program ia, be olsem wanem oli save kontribiut long ol gudfala rilesensip we i mekem aedentiti long saed blong relijin blong ol [Lata-dei Sent] yang man i kam moa strong” (“Be with Them,” ChurchofJesusChrist.org/callings/aaronic-priesthood-quorums/my-calling/leader-instruction/be-with-them).

  13. Luk long “Connect Them with Heaven,” ChurchofJesusChrist.org/callings/aaronic-priesthood-quorums/my-calling/leader-instruction/connect-them-with-heaven.

  14. Luk long Jon 15:1–5; 17:11; Filipae 4:13; 1 Jon 2:6; Jekob 1:7; Omnae 1:26; Moronae 10:32.

  15. Ol skripja oli fulap long ol eksampol blong hemia; hemia tu (2) nomo: 1 Nifae 2:16; Inos 1:1–4.

  16. Luk long Luk 24:32; 2 Nifae 33:1–2; Jekob 3:2; Moronae 8:26; Doktrin mo Ol Kavenan 8:2–3.

  17. Luk long 2 Timoti 3:15–16; Doktrin mo Ol Kavenan 68:3–4; 88:66; 113:10.

  18. Luk long 1 Tesalonaeka 1:5; Alma 26:13; 31:5; Hileman 3:29; 5:17; Doktrin mo Ol Kavenan 21:4–6; 42:61; 43:8–10; 50:17–22; 68:4

  19. Luk long Jon 6:63; 17:17; Alma 5:7; Doktrin mo Ol Kavenan 84:43–45; 88:66; 93:36

  20. Luk long Jon 15:3; 1 Pita 1:23; Mosaea 1:5; Alma 5:7, 11–13; 32:28, 41–42; 36:26; 62:45; Hileman 14:13

  21. Luk long 2 Nifae 31:19–21; 32:3, 5.

  22. Russell M. Nelson, “Yumi Save Mekem Gud Moa mo Stap Gud Moa,” Liahona, Mei 2019, 67.

  23. Dale G. Renlund, “Naoia Yufala I Mas Jusumaot,” Liahona, Nov 2018, 104.

  24. Namba ia i tekem tu, ol samting we i nid blong ol program blong Skaot, we i bin pat blong Jos aktiviti blong ol boe mo yang man, speseli long Yunaeted Stet mo Kanada, be naoia, i nomo olsem. Long ol eria we oli no bin tekpat long Skaot, namba blong ol samting we i nid blong mekem i ova long 200. Antap long hemia, ol defdefren kaen blong aktiviti blong ol boe, gel, yang man, mo yang woman oli mekem folem wan defren plan we i mekem ful eksperiens ia i stret moa blong ol famli.

  25. Luk long “Let Them Lead,” ChurchofJesusChrist.org/callings/aaronic-priesthood-quorums/my-calling/leader-instruction/let-them-lead.

  26. Luk long Omnae 1:26; 3 Nifae 9:20; 12:19; Doktrin mo Ol Kavenan 64:34. “Wan relijin we i nidim sakrifaes blong evri samting i neva gat inaf paoa blong givim fet we i nid long laef mo fasin blong sevem man” (Lectures on Faith [1985], 69).

  27. Ezra Taft Benson, The Teachings of Ezra Taft Benson (1988), 167; insaed long Preach My Gospel: A Guide to Missionary Service (2019), 13; luk tu long Russell M. Nelson, “Hope of Israel,” HopeofIsrael.ChurchofJesusChrist.org.

  28. Miting wetem Elda David A. Bednar; luk tu long “2020 Temple and Family History Leadership Instruction,” Feb. 27, 2020, ChurchofJesusChrist.org/family-history.

  29. Neal A. Maxwell, “Unto the Rising Generation,” 11. Elda Maxwell i gohed blong talem: “Olsem we ol samting i wok, ?hamas kworom presidensi blong dikon mo tija i nid blong singaotem wan man blong givim wan prea o pasem sakramen? Ol brata, ol spirit ia oli spesel, mo oli save mekem ol impoten samting !sapos oli givim janis long olgeta blong mekem!”

  30. Luk long General Handbook: Serving in The Church of Jesus Christ of Latter-day Saints, 2.2, ChurchofJesusChrist.org.

  31. Sam risos oli stap long Gospel Library blong helpem ol yut oli tekem lid, mo i gat “Quorum and Class Presidency Resources,” “Using Come, Follow Me—For Aaronic Priesthood Quorums and Young Women Classes, ” mo insaed long ol risos blong ol klas blong Ol Yang Woman mo ol kworom blong Aronik Prishud, we i stap long “Ward or Branch Callings.”

  32. Russell M. Nelson, “Hope of Israel,” HopeofIsrael.ChurchofJesusChrist.org. Long taem blong semmak divosen ia, Presiden Nelson i talem: “Papa blong yumi long Heven i holemtaet plante long ol haeman mo haewoman spirit blong Hem—maet mi save talem, tim blong Hem we i nambawan tru—blong oli kam long las pat blong taem ia. Ol haeman mo haewoman spirit ia—ol nambawan pleia ia, ol hiro ia—!oli yu!”

  33. Fas toktok we i kam long Russell M. Nelson, long “Children and Youth: A Face to Face Event with Elder Gerrit W. Gong,” Nov. 17, 2019, broadcasts.ChurchofJesusChrist.org.

  34. Presiden Nelson i talem: “Yumi nidim blong letem ol yang pipol oli lidim rod, speseli olgeta ia we oli bin singaotem mo setem olgeta apat blong oli givim seves long ol klas mo kworom presidensi. Bae oli givim prishud atoriti ia long olgeta. Bae oli lanem olsem wanem blong kasem insperesen blong lidim ol klas o kworom blong olgeta” (insaed long “Children and Youth Introductory Video Presentation,” Sept. 29, 2019, ChurchofJesusChrist.org).

    Elda Quentin L. Cook i bin talem, “Oli askem ol yut blong oli tekem moa responsabiliti olgetawan, taem oli moa yangfala—we papa mo mama, mo ol lida oli no tekova long wanem ol yut oli save olgetawan” (“Ol Jenis blong Mekem, Ol Pikinini mo Ol Yut Oli kam Strong Moa,” Liahona, Nov 2019, 40).

  35. Presiden George Q. Cannon i tijim: “God i holemtaet ol spirit blong oli kam long dispensesen ia; olgeta ia oli gat strong paoa long tingting mo strong tingting blong fesem wol, mo evri paoa blong ivel wan, ol paoa we oli luk mo hemia we oli no luk, blong oli talemaot gospel mo holemtaet trutok mo stanemap mo bildim Saeon blong God blong yumi, we oli no fraet nating long wanem i kam afta. Hem i bin sendem ol spirit ia long jeneresen ia, blong oli putum fandesen blong Saeon, we bae i no gat samting i save sakemaot, mo blong oli resemap wan laen we bae i stret mo gud, mo bae oli obei long Hem i nomata wanem situesen i stap” (“Remarks,” Deseret News, May 31, 1866, 203); luk tu long Teachings of Presidents of the Church: Joseph Smith (2007), 186.

  36. Moronae 10:32.