Yufala I Mas Bildim Haos Ia long Nem blong Mi
(Doktrin mo Ol Kavenan 124:40)
Ol kavenan we oli kasem mo ol odinens we oli mekem insaed long ol tempol, oli stamba blong mekem hat blong yumi i kam klin evriwan, mo tu, blong ol boe mo gel blong God oli kam olsem Hem.
Long Tabu Bus, 200 yia i pas, yang Josef Smit i bin luk mo toktok wetem God, Papa we I No Save Finis, mo wetem Pikinini blong Hem, Jisas Kraes. Aot long Tufala, Josef i bin lanem abaot tru fasin blong Godhed, mo abaot revelesen we i stap gogohed, taem we bigfala visen ia i stap kam long lata dei “dispensesen blong taem blong evri wok blong God i kamtru.”1
Samples tri yia afta, folem ansa blong wan strong prea blong hat long naet blong 21 Septemba 1823, laet i fulumap bedrum blong Josef, “i laet moa, bitim medeldei.”2 Wan man i kamkamaot long saed blong bed blong hem, i singaotem yangfala boe ia long nem blong hem, mo i talemaot se: “hem i wan mesenja we God i bin sendem hem i aot long fes blong hem i kam long mi, mo se nem blong hem i Moronae.”3 Hem i givim ol instraksen abaot Buk blong Momon we bae i kamaot.
Mo afta, Moronae i bin kwotem buk blong Malakae long OlTesteman, mo i jenis smol long fasin blong toktok insaed long King Jemes vesen:
“Luk, bae mi soemaot Prishud long yu, tru long han blong profet ia, Elaeja, bifo long bigfala dei blong Lod we man bae i fraet long hem. …
Mo bae hem i planem insaed long hat blong ol pikinini, ol promes we Lod i bin mekem long ol papa, mo hat blong ol pikinini bae i tanem i go long ol papa blong olgeta. Sapos i no hapen olsem, bae Lod i spolem gud ful wol ia long taem we bae hem i kam.”4
Moa impoten, instraksen blong Moronae long Josef Smit abaot misin blong Elaeja, i bin statem tempol mo famli histri wok long ol lata dei, mo i bin wan ki poen blong putumbak “[evri samting, we God i bin talemaot long evriwan long ol profet blong hem stat long stat blong wol].”5
Mi prea blong help blong Tabu Spirit taem yumi stap lan tugeta abaot ol kavenan, ol odinens, mo ol blesing we oli stap blong yumi, insaed long ol tempol blong Jos Ia blong Jisas Kraes blong Ol Lata-dei Sent.
Kambak blong Elaeja
Mi stat wetem wan stamba kwestin: ?From wanem kambak blong Elaeja i impoten?
“Yumi lan aot long lata dei revelesen se Elaeja i bin holem siling paoa blong Melkesedek Prishud”6 mo i bin las profet blong holem bifo taem blong Jisas Kraes.”7
Profet Josef Smit i eksplenem olsem: “Spirit, paoa mo koling blong Elaeja, hem i we, yu gat paoa blong holem ki blong ful wok blong Melkesedek Prishud … ; mo blong kasem evri odinens we oli blong kingdom blong God; iven hemia blong tanem hat blong ol papa i go long ol pikinini, mo hat blong ol pikinini i go long ol papa, wetem tu, olgeta we oli stap long heven.”8
Tabu siling atoriti ia, i nid blong stap blong “[wanem we oli joenem long wol, bae i joen long heven; mo wanem oli karemaot long wol ia, bae oli karemaot long heven.]”9
Josef i talemaot hemia klia moa: “?Olsem wanem bae God i kam blong sevem jeneresen ia? Bambae Hem i sendem Elaeja, we i profet. … Elaeja bae i talemaot ol kavenan blong silim hat blong ol papa i go long ol pikinini, mo ol pikinini i go long ol papa.”10
Elaeja i bin kamaot long Moses long hil we Jisas i bin jenis i kam narafala, mo i bin givim atoriti ia i go long Pita, Jemes, mo Jon.11 Elaeja i bin kamaot tu long Moses mo Elaeas long namba 3 Epril 1836, long Ketlan Tempol, mo i bin givim ol semfala prishud ki long Josef Smit mo Oliva Kaodri.12
I nidim blong Elaeja i putumbak siling atoriti long 1836, blong mekem wol ia i rere from seken kaming blong Sevya, mo i statem fasin blong man i intres bigwan long wok blong lukaotem famli histri, raon long wol.
Stap Jenisim, Tanem mo Mekem Ol Hat Oli Kam Klin Evriwan
Toktok ia, hat, o laef, oli yusum ova long wan taosen taem insaed long ol tabu buk. Simpol be impoten toktok ia, plante taem i tokbaot ol filing insaed long wan man o woman. Hat blong yumi—we i tekem evri samting we yumi wantem, ol filing, ol tingting blong hat, ol risen mo ol fasin—oli talemaot huia yumi mo oli talemaot wanem we bae i kam afta. Mo stamba blong wok blong Lod i blong jenisim, tanem, mo mekem hat i kam klin evriwan tru long ol kavenan blong gospel mo ol odinens blong prishud.
Yumi no stap bildim o go insaed long ol tabu tempol, nomo from se yumi wantem gat wan gudfala memori taem wetem yumiwan o wetem famli. Be, ol kavenan we oli kasem mo ol odinens we oli mekem insaed long ol tempol, oli stamba blong mekem hat blong yumi i kam klin evriwan, mo tu, blong ol boe mo gel blong God oli kam olsem Hem.
Blong stap planem, insaed long hat blong ol pikinini, ol promes ia we Lod i bin mekem long ol papa blong olgeta—iven Ebraham, Aesak, mo Jekob—blong tanem hat blong ol pikinini i go long stret papa blong olgeta, blong stap lidim wok blong lukaotem famli histri, mo stap mekem ol tempol odinens long bihaf, oli ol wok we oli blesem wanwan long tugeta saed blong vel. Taem yumi wari mo wok blong wok strong long tabu wok ia, bae yumi stap obei long ol komanmen ia blong lavem mo givhan long God mo neba blong yumi.13 Mo kaen seves ia we i no selfis, i helpem yumi tru blong “!Lisin gud long Hem!14 mo kam long Sevya.15
Ol tabu kavenan mo prishud odinens we oli moa tabu, oli kasem nomo insaed long wan tempol—haos blong Lod. Evri samting we oli stap lanem mo evri samting we oli stap mekem insaed long ol tempol, oli tokbaot bigwan tabu fasin blong Jisas Kraes, mo rol blong Hem long bigfala plan blong hapines ia blong Papa long Heven.
Stat long Insaed I Go Aotsaed
Presiden Esra Taf Benson i tokbaot wan impoten paten we Ridima i yusum blong mekem “man i nomo save ded mo i kasem laef we i no save finis.”16 Hem i talem: “Lod i wok, i stat insaed i go aot. Wol i wok aotsaed i kam insaed. Wol bae i tekemaot ol pipol aot long ol doti ples. Kraes bae i tekemaot ol doti aot long ol pipol, mo afta, ol pipol oli tekemaot olgetawan aot long ol doti ples. Wol bae i jenisim ol pipol taem hem i jenisim ples we oli stap laef long hem. Kraes i jenisim ol man, we afta, oli jenisim ples we oli stap laef long hem. Wol bae i tanem fasin blong man blong mekem samting, be Kraes bae i jenisim fasin blong man stret.”17
Ol kavenan mo ol odinens blong prishud oli stap long medel blong rod ia we i gohed blong bon bakegen mo jenisim laef; oli ol rod ia we Lod i yusum blong wok wetem wanwan long yumi stat long insaed i go aot. Ol kavenan we oli stap ona long olgeta oltaem, we oli stap tingbaot olgeta oltaem, mo “ i yusum Spirit blong God ya we i laef we i no save ded …blong raetem long tingting blong yufala”,18 ol kavenan ia oli givim wan stamba tingting mo stret save abaot ol blesing long laef long wol ia mo blong taem we i no save finis. Ol odinens we man i kasem we hem i klin inaf, mo i tingbaot olgeta oltaem, i openem ol rod we oli kam long heven we i mekem se paoa olsem hemia blong God i save kam insaed long laef blong yumi.
Yumi no stap kam long tempol blong haed o ronwe long ol devel blong wol ia. Be, yumi kam long tempol blong winim wol ia we i ivel. Taem yumi stap invaetem, insaed long laef blong yumi, “paoa ia we i olsem hemia blong God,”19 taem yumi kasem ol prishud odinens mo stap mekem mo kipim ol tabu kavenan, yumi gat blesing blong kasem paoa we i bitim hemia blong yumiwan20 blong winim ol temtesen mo ol jalenj blong laef long wol ia, mo blong mekem mo kam wan gud man o woman.
Mo Nem blong Haos Ia Bae I Go Kasem Ol Kantri
Fas tempol blong dispensesen ia, oli bin bildim long Ketlan, Ohaeo, mo oli bin dediketem long 27 Maj 1836.
Long wan revelesen i go long Profet Josef Smit wan wik afta long dedikesen, Lod i bin talem:
“Hat blong evri pipol blong mi oli mas stap glad, yes olgeta ia we oli bin bildim haos ia long nem blong mi wetem strong paoa blong olgeta. …
“Yes, hat blong ol taosen mo plante ten taosen man bae i stap glad bigwan from ol blesing we bae mi kapsaetem, mo from endaomen we mi putum long ol wokman blong mi insaed long haos ia.
“Mo nem blong haos ia bae i go kasem ol kantri long narafala ples; mo hemia i stat blong blesing we bae mi kapsaetem long hed blong ol pipol blong mi.”21
Plis tek not long ol sentens ia: hat blong ol taosen mo plante ten taosen man bae i stap glad bigwan, mo nem blong haos ia bae i go kasem ol kantri long narafala ples. Ol toktok ia, oli ol bigfala toktok ia long Epril 1836, taem we Jos i gat nomo wan smol namba blong ol memba mo wan tempol nomo.
Tedei, long 2020, yumi gat 168 tempol we oli open i stap. Fotinaen moa tempol oli stap bildim naoia, o oli bin anaonsem. Oli stap bildim ol haos blong Lod long “ol aelan blong solwota”22 mo long ol kantri mo long ol ples we, plante bifo, oli talem se bae i no save gat tempol.
Endaomen seremoni, naoia i stap long 88 lanwis, mo bambae i gohed blong i stap long plante moa lanwis taem oli stap bildim ol tempol blong blesem moa pikinini blong God. Long ol nekis 15 yia, namba blong ol lanwis we ol tempol odinens bae i stap long hem, i luk se bae i dabol.
Long yia ia, bae yumi brekem graon mo stat blong bildim 18 tempol. Spos yumi komperem, i bin tekem 150 yia blong bildim ol fas 18 tempol, stat long taem we Jos i oganaes long 1830 i go kasem dedikesen blong Tokio Japan Tempol we Presiden Spensa W. Kimbol i bin mekem long 1980.
Tingting long hamas tempol wok i bin go hariap jes long laeftaem ia nomo blong Presiden Russel M. Nelson. Taem we Presiden Nelson i bon long 9 Septemba 1924, Jos i bin gat sikis tempol i open i stap.
Taem oli bin odenem hem olsem wan Aposol long 7 Epril 1984, 60 yia afta, i bin gat 26 tempol i open, mekem se namba i go antap long 20 tempol long 60 yia.
Taem we oli sastenem Presiden Nelson olsem Presiden blong Jos, i gat 159 tempol i bin open, mekem 133 moa tempol long 34 yia long taem ia we hem i bin stap olsem wan memba blong Kworom blong Olgeta Twelef.
Stat long taem we hem i kam Presiden blong Jos, long 14 Jenuware 2018, Presiden Nelson i bin anaonsem 35 niu tempol.
Naentisiks pesen blong ol tempol tedei, oli bin dediketem long taem we Presiden Nelson i laef; eitifo pesen long olgeta oli bin dediketem olgeta stat long taem we oli bin odenem hem olsem wan Aposol.
Oltaem Lukluk Nomo long Ol Samting we Oli Impoten Moa
Olsem ol memba blong Jos ia we i kambak, we i blong Lod, yumi evriwan i stap sapraes long spid blong wok blong Hem long ol las dei ia. Mo moa tempol i stap kam yet.
Brigham Yang i talem profesi ia: “Blong mekem wok ia i kamtru, bae i mas gat, i no wan tempol nomo, be plante taosen blong olgeta, mo ol taosen mo ol ten blong ol taosen blong ol man mo woman bae i go long ol tempol ia, mo oli mekem wok long bihaf blong ol pipol we oli bin laef i gobak kasem taem ia we Lod bae i talemaot tru long revelesen.”23
Yumi andastanem se, anaonsmen blong wanwan niu tempol i wan stamba blong bigfala glad mo i wan risen blong talem tangkyu long Lod. Be, stamba lukluk blong yumi, i mas stap long ol kavenan mo ol odinens we oli save jenisim hat blong yumi, mo i save mekem yumi gat moa dip tingting mo taem blong givim long Sevya, mo i no blong stap glad nomo long ples o hamas tempol bilding i naes.
Ol stamba wok we oli stap long solda blong yumi, olsem ol memba blong Jos ia we i kambak, we i blong Lod, oli (1) blong “!Lisin gud long Hem!”24 mo mekem hat blong yumiwan i jenis tru long ol kavenan mo ol odinens ia, mo (2), blong mekem i kamtru, wetem glad, ol tabu responsabiliti ia blong givim ol tempol blesing long ful famli blong man long tugeta saed blong vel. Wetem daereksen blong Hem mo help blong Hem, i tru, yumi stap mekem ol tabu diuti ia oli kamtru.
Wok blong Bildimap Saeon
Profet Josef Smit i bin talem:
“Wok blong bildimap Saeon i wan wok we i bin pulum tingting blong ol pipol blong God long evri taem; hem i wan stamba toktok we, ol profet, ol pris, mo ol king oli bin stastap tokbaot wetem spesel glad; oli bin wet, wetem glad, from dei ia we yumi stap laef long hem tedei; mo wetem hat mo glad blong heven, oli bin singsing mo raetem, mo talem profesi abaot taem blong yumi, tedei; be oli bin ded mo oli no luk taem ia; … yumi nao yumi stap luk, tekpat, mo help blong rolem Lata-dei glori ia i go.”25
“Prishud blong heven bae i joen wetem hemia blong wol, blong mekem ol bigfala stamba tingting ia oli kamtru, … wan wok we God mo ol enjel oli bin stap lukluk wetem glad blong ol jeneresen we oli pas finis; hemia i bin laetem faea blong sol blong ol petriak mo ol profet blong bifo; wan wok we i blong prapa spolem gud ol paoa blong tudak, mekem wol ia i kam niu, glori blong God, mo sevem ful famli blong man.”26
Mi testifae se Papa mo Pikinini, Tufala i bin kamaot long Josef Smit, mo Elaeja i bin putumbak siling atoriti ia. Ol tabu kavenan mo odinens blong tempol oli save mekem yumi kam strong moa, mo oli save mekem hat blong yumi i kam klin evriwan taem yumi stap “!Lisin gud long Hem!”27 mo stap kasem paoa olsem hemia we i blong God insaed long laef blong yumi. Mo mi witnes se, wok ia blong ol las dei, bambae i prapa spolem gud ol paoa blong tudak mo bae i tekem fasin blong sevem man i go long famli blong man. Abaot ol trutok ia, mi testifae olsem long tabu nem blong Lod Jisas Kraes, amen.