Hem I Stap Go Fastaem long Yumi
Lod i stap lidim Restoresen blong gospel mo Jos blong Hem. Hem i save fiuja evriwan. Hem i stap invaetem yu blong wok.
Ol dia brata mo sista blong mi. Mi glad tumas stap wetem yufala long jeneral Konfrens blong Jos Ia blong Jisas Kraes blong Ol Lata-dei Sent. Long invitesen blong hem blong tingtingbak long wei we Lod i yusum blong putumbak Jos blong Hem long las dispensesen ia blong i blesem yumi mo olgeta we yumi lavem, Presiden Russel M. Nelson i bin promesem se eksperiens blong yumi bae yumi no blong stap tingbaot nomo, be bae yumi neva fogetem.
Eksperiens blong mi, mi tingbaot, mo mi ting i semmak long yufala. Se bae yumi neva fogetem, bae i dipen long wanwan long yumi. Hemia i impoten long mi from se eksperiens ia blong rere from konfrens ia i bin jenisim mi long wan wei we mi wantem se i stap oltaem. Bae mi eksplenem:
Blong mi rere, i tekem mi i go long stori blong wan taem we i hapen long Restoresen. Mi bin ridim plante taem, be oltaem i olsem ripot blong wan impoten miting, we insaed i gat Josef Smit, Profet blong Restoresen. Bifo taem ia, mi bin luk, insaed long stori ia, hao Lod i lidim yumi, lidim ol disaepol blong Hem, insaed long Jos blong Hem. Mi luk se i minim wanem blong wan i lidim yumi, we i Sevya blong wol, Krieta—we i save evri samting, blong bifo, blong naoia, mo blong fiuja. Hem i stap tijim yumi step folem step, mo i soem rod long yumi, i neva fosem yumi.
Miting we mi stap tokbaot, i wan taem blong jenis long Restoresen. I wan Sabat dei miting, we oli bin holem long 3 Epril 1836, long Ketlan Tempol long Ohaeo, seven dei afta we oli dediketem. Josef Smit i bin tokbaot taem ia long histri blong wol long wan simpol wei. Plante long stori ia oli raetemdaon insaed long Doktrin mo Ol Kavenan, seksen 110:
“Long aftenun, mi bin helpem ol nara Presiden blong pasem Lod Sapa i go long Jos, we Olgeta Twelef nao oli blesem; olgeta nao oli bin gat spesel janis blong mekem tabu wok ia long tebol long dei ia. Afta we mi mekem seves ia long ol brata blong mi, mi go long pulpit, we ol vel oli putum i kamdaon, mo mi nildaon, wetem Oliva Kaodri, long wan tabu mo saelen prea. Afta we mitufala i stanap afta long prea, visen ia i bin open long mitufala tugeta.”1
“Vel i bin kamaot long maen blong mitufala, mo ae blong andastaning blong mitufala i bin open.
“Mitufala i bin luk Lod i stanap antap long strong wud blong pulpit, long fored blong mitufala; mo andanit long leg blong hem i bin gat wan flat samting we oli wokem wetem gol, mo kala blong hem i olsem yelobraon.
“Ae blong hem i olsem faea we i laet; hea blong hed blong hem i waet we i waet olsem klin sno; fes blong hem i saen i bitim laet blong san; mo voes blong hem i bigwan olsem noes blong bigfala solwota we i brok long rif, we i voes blong Jehova we i stap talem:
“Mi mi faswan mo laswan; Mi mi hem ia we i stap laef, mi mi hem we oli bin kilim hem i ded; mi mi loya blong yufala long fored blong Papa.
“Luk, mi fogivim ol sin blong yutufala; yutufala i klin long fored blong mi; taswe, leftemap hed blong yutufala mo stap glad.
“Hat blong ol brata blong yutufala oli mas stap glad, mo hat blong evri pipol blong mi oli mas stap glad, yes olgeta ia we oli bin bildim haos ia long nem blong mi wetem strong paoa blong olgeta.
“From luk, mi akseptem haos ia, mo nem blong mi bae i stap long ples ia; mo bae mi kamaot long ol pipol blong mi wetem sore insaed long haos ia.
“Yes, bae mi kamaot long ol wokman blong mi, mo bae mi toktok long olgeta wetem stret voes blong mi, sapos ol pipol blong mi oli stap obei long ol komanmen blong mi, mo oli no mekem tabu haos ia i doti.
“Yes, hat blong ol taosen mo plante ten taosen man bae i stap glad bigwan from ol blesing we bae mi kapsaetem, mo from endaomen we mi putum long ol wokman blong mi insaed long haos ia.
“Mo nem blong haos ia bae i go kasem ol kantri long narafala ples; mo hemia i stat blong blesing we bae mi kapsaetem long hed blong ol pipol blong mi. I olsem. Amen.
“Afta we visen ia i finis, ol heven oli open bakegen long mitufala; mo Moses i bin kamaot long fored blong mitufala mo i bin givim long mitufala ol ki blong wok blong karem Isrel i kam wanples aot long ol fo pat blong wol, mo blong lidim ol ten traeb aot long kantri long Not.
“Afta long hemia, Elaeas i kamaot, mo i givim dispensesen blong gospel blong Ebraham, mo i talem se tru long mifala mo laen blong mifala, evri jeneresen afta long mifala bae i gat blesing.
“Afta we visen ia i bin finis, wan narafala impoten mo bigfala visen i kamaot wantaem long mitufala; from profet Elaeja, we Lod i bin tekemaot hem i go long heven mo i no testem ded, i bin stanap long fored blong mitufala mo i talem:
“Luk, taem i kam fulwan, we maot blong Malakae i bin tokbaot—we i testifae se hem [Elaeja] bae Lod i sendem hem, bifo long bigfala dei blong Lod we man bae i fraet long hem i kam—
“Blong tanem hat blong ol papa i go long ol pikinini, mo hat blong ol pikinini i go long ol papa, nogud bae mi kilim ful wol ia wetem wan strong nogud tok—
“From hemia, Lod i givim ol ki blong dispensesen ia i go long ol han blong yutufala; mo tru long ol ki ia, bae yutufala i save se bigfala dei blong Lod we man bae i fraet long hem i stap kolosap, i stap long ol doa.”2
Nao. Mi bin ridim stori ia plante taem. Tabu Spirit i bin konfemem hemia long mi se stori ia i tru. Be, taem mi bin stadi mo prea blong rere from konfrens ia, mi kam blong luk klia moa, paoa ia blong Lod, blong lidim, long evri ditel, ol disaepol blong Hem long wok ia we i blong Hem.
Seven yia bifo Moses i bin givim ol ki blong kam tugeta blong Isrel i go long Josef long Ketlan Tempol, “Josef i bin lanem finis, aot long taetol pej blong Buk blong Momon se, stamba tingting blong hemia, i blong ‘smol haf nomo blong laen blong Isrel … blong oli save gat save long saed blong ol kavenan blong Lod, blong hem i no sakemaot olgeta blong oltaem.’ Long 1831, Lod i bin talem long Josef se kam tugeta blong Isrel bae i stat long Ketlan, ‘Mo stat long ples ia,[Ketlan] huia we bae mi jusum bae i go long medel blong evri nesen, … from mi gat wan bigfala wok i slip i stap, from bae mi sevem Isrel, mo bae mi lidim olgeta.”3
Nomata we i nidim misinari wok blong pulum Isrel i kam tugeta, Lod i bin tijim Olgeta Twelef, mo sam long olgeta oli kam ol fas misinari: “Tingbaot. Bae yufala i no save go long ol nara nesen kasem taem we bae yufala i kasem endaomen blong yufala.”4
I luk olsem se Ketlan Tempol i bin impoten long step folem step plan blong Lod, hemia from tu risen: Faswan, Moses i bin wet kasem tempol i bin finis blong putumbak ol ki blong kam tugeta blong Isrel. Mo nambatu, Presiden Josef Filding Smit i bin tijim se “Lod i bin givim komanmen long Ol Sent blong bildim wan tempol (Ketlan Tempol), we insaed long hem bae Hem i soemaot ol ki blong atoriti, mo tu, i ples we ol aposol bae oli kasem endaomen mo rere blong katem klinim plantesen blong Hem blong wan las taem.”5 Nomata we, tempol endaomen ia, olsem we yumi save long hem tedei, i no bin hapen insaed long Ketlan Tempol, blong mekem profesi ia i kamtru, ol odinens blong rere, oli bin presentem long ples ia, wetem plante taem we Spirit i bin soemaot samting, we i givim paoa long olgeta we oli bin singaotem olgeta blong go long ol misin; oli bin kasem promes ia we “paoa we i kam long heven” i bin kavremap olgeta, mo i lidim olgeta long bigfala kam tugeta tru long misinari seves.6
Afta we Josef i bin kasem ol ki blong kam tugeta blong Isrel, Lod i bin givim insperesen long Profet blong sendemaot ol memba blong Olgeta Twelef long ol misin. Taem mi bin stap stadi, i bin kam klia long mi se Lod i bin rere, long ditel, wei blong Olgeta Twelef oli go long ol misin ovasi, long ol ples we ol pipol oli bin rere blong biliv mo sapotem olgeta. Wetem taem, tru long olgeta, ol taosen pipol oli kam long Jos ia we i kambak, we i blong Lod.
Folem ol rekod blong yumi, oli putum se bitwin 7,500 kasem 8,000 pipol oli bin baptaes long tufala misin ia blong Olgeta Twelef long ol Britis Aelan. Hemia i putum fandesen i stap blong misinari wok long Yurop. Taem i kasem en blong nambanaentin senturi, kolosap 90 taosen oli bin kam tugeta long wanples long Amerika, mo plante long olgeta oli kam long ol Britis Aelan, mo Skadinavia.7 Lod i bin givim insperesen long Josef mo ol fetful misinari blong hem blong go long wok blong kasem wan namba blong ol man we, i luk se i bitim wanem oli ting long hem. Be Lod, wetem stret fasin blong Hem blong luk samting fastaem mo stap rere, i bin mekem hemia i posibol.
Yufala i tingbaot simpol mo naesfala lanwis long seksen 110 blong Doktrin mo Ol Kavenan:
“Luk, taem i kam fulwan, we maot blong Malakae i bin tokbaot—we i testifae se hem [Elaeja] bae Lod i sendem hem, bifo long bigfala dei blong Lod we man bae i fraet long hem i kam—
“Blong tanem hat blong ol papa i go long ol pikinini, mo hat blong ol pikinini i go long ol papa, nogud bae mi kilim ful wol ia wetem wan strong nogud tok—
“From hemia, Lod i givim ol ki blong dispensesen ia i go long ol han blong yutufala; mo tru long ol ki ia, bae yutufala i save se bigfala dei blong Lod we man bae i fraet long hem i stap kolosap, i stap long ol doa.”8
Mi testifae se Lod i bin luk i go long fiuja, mo i luk hao bae Hem i soem rod ia long yumi blong helpem Hem blong mekem ol stamba tingting blong Hem long ol las dei ia.
Taem mi bin stap wok insaed long Prisaeding Bisoprik, plante yia i pas, oli bin givim wok long mi blong lukluk ova long fasin blong mekem, mo developem wan grup we i krietem wanem yumi singaotem FamilySearch. Mi kea gud blong talem se mi bin “lukluk ova” wok blong krietem hemia, be mi no talem se mi “daerektem” wok ia. Plante smat pipol oli bin lego ol gudfala wok blong olgeta mo oli kam blong bildim wanem we Lod i bin wantem.
Fas Presidensi i bin setem wan gol blong daonem wok blong dabolem ol odinens. Bigfala wari i we oli no save luk sapos oli mekem finis odinens blong wan. Blong plante yia—o plante plante yia— Fas Presidensi i bin askem mi: “?Be wetaem bae hemia i hapen?”
Wetem prea, strong tingting blong wok, mo sakrifaes blong ol pipol wetem bigfala talen, wok ia i bin hapen. Hem i kam step folem step. Fasfala wok i blong mekem FamilySearch i isi blong yusum; speseli long olgeta we oli no savegud kompiuta. Moa jenis i bin kam, mo mi save se i gohed blong kam, from se taem yumi ting strong blong stretem wan problem tru insperesen, yumi openem doa blong moa revelesen blong muv fored long wok, we oli impoten be yumi no luk yet. Iven tedei, FamilySearch i kam wanem we Lod i nidim blong i pat blong Restoresen blong Hem—be i no jes blong stopem wok blong dabolem ol odinens.
Lod i letem yumi mekem wok i kam gud moa blong helpem ol pipol oli kasem ol filing blong save samting, mo iven lavem ol bubu blong olgeta mo blong finisim ol tempol odinens blong olgeta. Naoia, olsem we Lod i bin save se bae i hapen, ol yang pipol oli kam ol kompiuta tija blong papa mo mama blong olgeta, mo blong ol memba blong wod. Evriwan i faenem bigfala glad long seves ia.
Spirit blong Elaeja i stap jenisim hat blong ol yangfala, mo ol olfala, ol pikinini mo ol papa mo mama, ol apupikinini mo ol bubu. Ol tempol bae oli glad blong putum taem bakegen blong mekem ol baptaes mo ol nara tabu odinens. Blong wantem givim seves long ol bubu blong yumi, mo blong joenem ol papa, mama wetem ol pikinini, i stap kam antap.
Lod i bin luk se hemia bae i kam. Hem i bin plan from, step folem step, semmak olsem Hem i bin stap mekem wetem ol nara jenis insaed long Jos ia blong Hem. Hem i bin resemap mo rere ol fetful pipol we oli jusum blong mekem gud ol samting we i had. Oltaem, Hem i bin gat tingting blong wet longtaem blong helpem yumi blong stap lan “tijing folem tijing, rul folem rul, smol long ples ia mo smol longwe.”9 Hem i strong long taem we bae ol tingting blong Hem i mas hapen, be yet, Hem i meksua se, oltaem, sakrifaes hem i wan blesing, o i tekem blesing we yumi no bin ting long hem.
Mi en mo talemaot tangkyu blong mi i go long Lod—Hem we i bin givim insperesen long Presiden Nelson blong invaetem mi blong mekem wan sakrifaes blong rere from konfrens ia. Evri aoa mo evri prea long taem we mi bin stap rere, i bin tekem wan blesing i kam.
Mi invaetem evriwan we i stap harem mesej ia, o i stap ridim ol toktok ia blong gat fet se Lod i stap lidim wok blong putumbak gospel blong Hem, mo Jos blong Hem. Hem i stap go fastaem long yumi. Hem i save fiuja evriwan. Hem i stap invaetem yu blong wok. Hem i joenem yu long wok ia. Hem i gat wan plan i stap blong yu givim seves. Mo iven, taem yu stap sakrifaes, bae yu filim glad taem bae yu helpem ol narawan blong girap, blong rere from taem ia we bae Hem i kam.
Mi testifae long yufala se God Papa i stap laef. Jisas Hem I Kraes. Hemia i Jos blong Hem. Hem i save yu mo i lavem yu. Hem i soem rod long yu. Hem i rere wan rod blong yu. Long tabu nem blong Jisas Kraes, amen.