Elda Moisés Villanueva

Jeneral Atoriti Seventi

Hem i bin gat 10 yia nomo long tetaem ia, be Elda Moisés Villanueva i neva fogetem olsem wanem hem i bin filim taem ol misinari oli bin tijim hem mo famli blong hem abaot gospel long Oaskaka, Meksiko.

“Mi tingbaot Spirit we oli bin filim, pis we mi bin filim long hat blong mi,” hem i talem.

Taem we Moisés i bin baptaes wetem ol fofala brata mo sista blong hem, mama blong hem—we i wan singgel mama we i stap lukaotem Moisés mo seven brata mo sista blong hem long ol had situesen—i kambak strong long Jos.

Afta long hemia, taem hem i gat 18 yia, Moisés i rere blong go long misin, mo famli blong hem i gohed blong fesem ol jalenj long saed blong laef. Hem i bin gat tu tingting se bae hem i go o no, mo i talem long mama blong hem se hem i wantem stap blong helpem hem.

Mama i talem: “Sapos yu rili wantem helpem mi, yu go mo wok blong Lod.”

Taem hem i bin nildaon long saed blong smol bed blong hem long en blong fas dei blong hem long Meksiko Hermosilo Misin, Moisés i bin filim se Lod i glad wetem desisen blong hem. Hem i talem se misin blong hem nao i mekem testemoni blong hem, abaot gospel ia i kambak, i gro bigwan moa.

“Jos ia, Sevya blong yumi, Jisas Kraes nao i stap lidim,” Elda Villanueva i talem. “Hem i save nem blong wanwan long yumi. Hem i save ol nid blong yumi, ol jalenj blong yumi mo ol wari blong yumi. Hem i save tu ol samting we yumi strong long ol, mo iven, Hem i save ol samting we hat blong yumi i wantem.”

Moisés Villanueva Lopez i bin bon i kam long wol ia long 13 Disemba 1966, long Oaskaka, Oaskaka, Meksiko, mo papa mo mama blong hem i Rubén Villanueva Platas mo Delfina López Domínguez. Hem i bin maredem Leticia Ávalos Lozano long Meksiko Siti Meksiko Tempol, long 30 Jun 1995. Tufala i gat tri pikinini.

Elda Villanueva i kasem wan digri long bisnis administresen long Saot Is Rijin Yunivesiti long 1997, mo i kasem wan Masta digri long saed blong niu tingting blong leftemap bisnis long Tecnológico de Monterrey long 2011. Las wok blong hem, hem i bin stap olsem jif eksekutiv ofisa blong Sertexa, we i wan transpot kampani.

Long taem we hem i bin kasem koling blong hem, Elda Villanueva i bin stap olsem wan Eria Seventi long Meksiko. Hem i bin stap tu olsem presiden blong Kalifonia Akadia Misin, mo olsem wan hae kaonsela, mo wan kaonsela long wan stek presidensi, wan bisop mo pablik afea daerekta.