Ahmad S. Corbitt

Fas Kaonsela long Yang Man Jeneral Presidensi

Ahmad S. Corbitt, we i gat 57 yia, i bon i kam long wol ia long Ogis 1962 mo papa mo mama blong hem i James Earl Corbitt mo Amelia Corbitt. Famli i bin pua mo stap laef long ol haos projek blong Filadelfia, Pensilvania, YSA, we kraem mo gang vaelens i raonem olgeta. I no bin sef blong travel long ol defren ples raonabaot.

Be ol tingting mo filing long saed blong spirit i bin lidim mama blong hem blong soem rod long 10 pikinini blong hem mo kipim olgeta oli stap sef. Hem i bin save stret wetaem bae ol pikinini blong hem oli save go plei aotsaed mo wetaem oli mas stap insaed.

Hem i from ol toktok blong Spirit we i bin lidim hem blong invaetem ol misinari blong Jos Ia blong Jisas Kraes blong Ol Lata-dei Sent insaed long hom blong hem. Taem hem i bin wan yangfala man, mo wan yut, Ahmad mo famli blong hem i bin stap wosip long Nesen blong Islam, mo afta, i bin baptaes long Protestan. Be naoia, hem i bin filim lav we i kam long lokol Lata-dei Sent kongregesen.

Mama blong hem mo samfala brata mo sista oli bin kasem baptaes long manis we i folem. Long namba 16 Ogis 1980, long namba 18 betdei blong hem, Ahmad i bin kasem baptaes tu. Step papa blong hem, Henry Brandford Campbell, i bin joenem Jos long nekis yia afta.

“I no rili abaot mifala,” hem i talem. “Hem i abaot God mo wanem Hem i bin wantem mifala blong mekem. Mifala i bin glad blong gat tingting i stap daon mo gat open tingting. Hem i bin lidim mifala i go.”

Afta we hem i bin go long Ricks Kolej mo i bin go long misin long Pueto Riko San Ruan Misin stat long 1982 i go kasem 1984, hem i bin mitim Jayne Joslin long taem blong wan yang singgel adalt tempol trip. Kapol ia i bin mared long 24 Ogis 1985, long Wasington D. K. Tempol mo tufala i gat sikis pikinini.

Blong ol nekis naen yia, hem i bin wok long deitaem mo i bin skul long naet taem, i winim sam digri long Rijad Stokton Kolej blong Niu Jesi, mo Rutgers Yunivesiti blong Loa Skul.

Hem i bin stap olsem wan kaonsela long stek presidensi, stek presiden, hae kaonsela, mo presiden blong Dominik Ripablik Santo Domingo Is Misin.

Brata Corbitt i bin wok olsem wan loya long kot, long pablik rilesen mo olsem wan daerekta blong Jos Niu Yok Ofis blong Pablik mo Intanasonol Afea. Naoia i stap, hem i wok long Jos Misinari Dipatmen.