Bigfala Plan
Yumi, we yumi save plan blong God, mo yumi bin mekem kavenan blong tekpat, yumi gat klia responsabiliti blong tijim ol trutok ia.
Iven long medel blong ol tes mo jalenj ia we i no gat wan narawan i semmak, !yumi rili gat blesing! Jeneral konfrens ia i bin givim plante we plante rij samting mo glad blong Restoresen blong gospel blong Jisas Kraes. Yumi bin glad long visen blong Papa mo Pikinini we i bin statem Restoresen. Oli mekem yumi tingbaot se bae Buk blong Momon bae i kamaot, we stamba tingting blong hem i blong testifae abaot Jisas Kraes mo doktrin blong Hem. Yumi kam niu bakegen wetem glad ia se revelesen i ril—revelesen we i go long ol profet mo long wanwan long yumi. Yumi bin harem ol bigfala testemoni abaot Atonmen we i no save finis abaot Jisas Kraes, mo abaot Laef Bakegen long Ded blong Hem. Mo oli bin tijim yumi long plante nara trutok abaot gospel blong Hem we i fulwan, we Lod i talemaot long Josef Smit, afta we God Papa i bin talem long niufala profet ia we Hem i singaotem: “!Hem ia, Hem i Pikinini blong Mi we Mi Lavem Tumas. Lisin gud long Hem!” (Luk longJosef Smit—Histri 1:17).
Yumi kam strong moa long save blong yumi abaot restoresen blong prishud mo ol ki blong hem. Yumi mekem strong tingting bakegen blong man i mas save Jos we i kambak, we i blong Lod, tru long stret nem blong hem, Jos Ia blong Jisas Kraes blong Ol Lata-dei Sent. Mo oli bin invaetem yumi blong joen long fasin blong livim kaekae mo prea blong daonem ol nogud samting we wol sik ia i stap mekem naoia mo long fiuja. Long moning ia, mifala i bin gat insperesen, tru long profet blong Lod we i stap laef blong presentem wan histri ofisol toktok abaot Restoresen. Mifala i talem tru ol toktok blong ofisol toktok ia se: “olsem we oli prea mo stadi long mesej ia blong Restoresen mo tekem aksen wetem fet, bae oli gat blesing ia blong kasem wan witnes blong olgetawan se hem i tabu mo stamba tingting blong hem i blong mekem wol ia i rere from Seken Kaming blong Lod, Sevya blong yumi, Jisas Kraes, olsem Hem i promesem.1
Plan
Evri samting ia i pat blong wan tabu plan we stamba tingting blong hem i blong mekem se ol pikinini blong God oli kasem laef we i no save finis mo kam olsem Hem. Long skripja, oli tokbaot se “bigfala plan blong stap glad,” “plan blong pemaot man,” mo “plan blong fasin blong sevem man” (Alma 42:8, 11, 5), plan ia—we Lod i talemaot tru long Restoresen—i bin stat wetem wan Kaonsel long Heven. Olsem ol spirit, yumi bin wantem blong kasem laef we i no save finis we papa mo mama blong yumi long heven i stap long hem naoia. Long tetaem ia, yumi bin progres folem hamas we yumi bin save mekem, mo stap long laef ia wetem wan bodi blong mit mo bun. Blong yumi gat eksperiens ia, God Papa i plan blong krietem wol ia. Long laef blong yumi long wol, folem plan, bae sin i spolem yumi taem bae yumi fesem agens we yumi nidim blong save groap long saed blong spirit. Bae yumi kam tu blong fesem ded long saed blong bodi. Blong pemaot yumi long ded mo sin, plan blong Papa long Heven i putum wan Sevya i stap. Laef bakegen long ded, blong Hem, bae i pemaot evriwan long ded, mo sakrifaes blong Hem bae i pem praes we i nid blong yumi evriwan i kam klin long ol sin folem ol kondisen we i stap blong mekem yumi groap. Atonmen blong Jisas Kraes i stamba blong plan blong God.
Long Kaonsel long Heven, evri spirit pikinini blong God oli presentem plan blong Papa long olgeta, wetem wanem i kam afta mo ol tes, mo ol help blong heven, mo fiuja blong glori blong hem. Yumi bin luk en stat long stat. Evri namba blong ol man we oli bin bon i kam long wol ia, oli bin jusum plan ia blong Papa mo oli bin faet from long faet long heven we i bin kam afta. Plante tu oli bin mekem ol kavenan wetem Papa long saed blong wanem bae oli mekem long wol ia. Long ol wei we oli no talemaot long yumi, ol aksen blong yumi long spirit wol, i bin jenisim ol situesen blong yumi long laef long wol ia.
Laef long Wol Ia mo long Spirit Wol
Naoia, bae mi talem sot sam long ol stamba pat blong plan blong Papa, taem oli stap tajem laef blong yumi long laef ia, mo long spirit wol we bae i kam afta.
Stamba tingting blong laef long wol ia, mo hamas yumi groap afta, hem i blong ol pikinini blong God oli kam olsem we Hem i stap. Hemia i hat we Papa long Heven i gat long evri Pikinini blong Hem. Blong kasem glad blong fiuja ia, ol loa we oli no save finis i askem blong yumi mas kam ol man mo woman we yumi kam klin evriwan tru long Atonmen blong Jisas Kraes, blong mekem se bae yumi save stap long ples we Papa mo Pikinini blong Hem i stap long hem mo stap glad long ol blesing blong kam olsem wan god. Olsem we Buk blong Momon i stap tijim, Hem i stap invaetem “evriwan blong kam long Hem mo tekem pat blong gud fasin blong Hem; mo Hem i no tanem baksaed blong Hem long eniwan we i kam long Hem, blak mo waet, slef mo fri, man mo woman; mo Hem i tingbaot olgeta we oli no gat respek long tru God; mo evriwan i semmak long God.” (2 Nifae 26:33; luk tu long Alma 5:49
Tabu plan blong yumi kam huia Hem i wantem yumi blong kam, i askem yumi blong mekem ol joes blong sakemaot ivel oposisen we i stap temtem ol man mo woman long wol blong mekem samting agensem ol komanmen blong God mo plan blong Hem. Hem i askem tu blong yumi save fesem ol nara oposisen long laef ia, olsem ol sin blong ol narawan, o sam samting we i no bin stret taem yumi bon i kam long wol. Samtaem, blong groap long level we yumi nidim blong stap long hem, yumi kasem taem yumi safa mo taem samting i kam agens, be i no taem yumi stap gud mo evri ting i kwaet. Mo i no gat wan long ol oposisen long laef ia bae i mekem tabu stamba tingting blong hem sapos God i stap karemaot yumi long evri nogud samting blong laef ia.
Plan i talemaot fiuja blong yumi long taem we i no save finis, stamba tingting mo ol kondisen blong wokbaot blong yumi long laef ia, mo ol help blong heven we bae yumi kasem. Ol komanmen blong God oli givim woning long yumi blong no aot i go long ol situesen blong denja. Ol tijing blong ol lida we oli kasem insperesen, oli soem rod long yumi mo oli givim stret save ia we i helpem wokbaot blong yumi we i no save finis.
Plan blong God i givim yumi fo bigfala stret save blong helpem wokbaot blong yumi tru long laef long wol ia. Evriwan long yumi, oli givim yumi, tru long Atonmen blong Jisas Kraes, senta pis blong plan ia. Faswan i givim stret save long yumi se tru long safaring blong Hem from ol sin we yumi stap sakem, yumi save kam klin aot long ol sin ia. Afta, las jaj we i gat sore, bae i “nomo tingbaot ol sin ia bakegen” (Doktrin mo Ol Kavenan 58:42).
Nambatu, olsem pat blong Atonmen blong Sevya blong yumi, Hem i bin tekem long Hem, evriwan long ol samting we yumi no strong long olgeta. Hemia i letem kasem help mo paoa we i kam long heven blong tekem ol trabol blong laef ia we yumi no save ronwe long ol, olgeta blong yumiwan, mo ol jeneral wan, olsem ol wo mo ol bigfala sik. Buk blong Momon i talemaot klia long skripja abaot stamba paoa ia blong Atonmen. Sevya i bin tekem long Hem “ol soa blong bodi mo ol sik [ mo ol samting] we ol pipol blong hem oli no strong long hem. … bae hem i tekem long hem ol samting blong olgeta we oli no strong, blong mekem se insaed blong hem i save kam fulap long sore, long saed blong bodi blong mit mo bun, mekem se hem i save, … olsem wanem blong helpem ol man blong hem long saed blong ol samting … we oli no strong long olgeta.’”(Alma 7:11–12).
Nambatri, Sevya, tru long Atonmen blong Hem we i no save finis, i sakemaot ded mo i givim yumi glad save ia se evriwan bae i laef bakegen long ded. Buk blong Momon i stap tijim se: “Nao, kambak ia bae i hapen long evriwan, ol olfala tugeta wetem ol yangfala, ol slef tugeta wetem olgeta we oli fri, ol man tugeta wetem ol woman, ol nogud man tugeta wetem olgeta we i stret; mo tu bae i no save gat wan pis hea blong wan wan hed blong olgeta we i lus; be evri samting bae i kambak long ol stret ples blong olgeta” (Alma 11:44).
Yumi stap selebretem se Laef Bakegen long Ded i ril, long Ista taem ia. Hemia i givim yumi lukluk ia mo paoa blong stap strong tru long ol jalenj blong laef ia, we yumi wanwan mo olgeta we yumi lavem oli fesem, ol samting olsem bodi, tingting mo filing we i go daon, sam yumi kasem taem yumi bon i kam, mo sam taem yumi go tru long olgeta long taem blong laef blong yumi long wol ia. From Laef Bakegen long Ded, !yumi save se ol samting ia we yumi no strong long olgeta, oli blong sot taem!
Gospel we i kambak i talem stret long yumi se Laef Bakegen long Ded i save tekem janis ia blong stap wetem ol memba blong famli blong yumi—hasban, waef, pikinini mo papa mo mama. Hemia bigfala toktok blong leftemap tingting blong yumi blong mekem ol famli responsabiliti blong yumi long laef long wol ia. Hem i helpem yumi blong laef tugeta wetem lav, long laef ia, blong wet blong kam tugeta bakegen wetem glad long nekis laef.
Nambafo, mo laswan, revelesen blong tedei, i stap tijim yumi se progres blong yumi, i no nid blong i en wetem laef long wol ia. Oli no talem plante samting long saed blong impoten stret save ia. Oli talem long yumi se laef ia, i taem blong rere blong mitim God mo yumi no mas pusumbak taem blong stap sakem sin (luk long Alma 34:32–33). Stil, oli tijim yumi se long spirit wol, oli stap prijim gospel long “olgeta we oli nogud mo olgeta we oli no obei we oli bin sakemaot trutok” (Doktrin mo Ol Kavenan 138:29) mo olgeta we oli stap tijim olgeta, oli save sakem ol sin blong olgeta bifo long Las Jajmen (luk long ol ves 31–34, 57–59).
Hemia sam stamba poen blong plan blong Papa long Heven:
Gospel we i kambak, blong Jisas Kraes, i givim wan spesel lukluk long ol topik abaot jastiti, mared, mo blong karem ol pikinini oli kam long wol ia. Hem i stap tijim se i nid blong gat mared we i folem plan blong God blong mekem ol stamba tingting blong plan blong God oli kamtru, blong givim wan tabu ples blong ol pikinini oli bon i kam long wol ia, mo blong mekem ol memba blong famli oli rere blong kasem wan laef we i no save finis. Lod i talem se “God i odenem mared long man” blong “mekem stamba tingting biaen long kriesen blong hem i hapen” (Doktrin mo Ol Kavenan 49:15–16). Folem hemia, plan ia blong Hem, i ron i go agensem stap strong paoa blong wol long saed blong loa mo kastom.
Paoa ia blong krietem laef long wol ia, i paoa we i moa hae we God i bin givim long ol pikinini blong Hem. Blong oli yusum, i stap insaed long fas komanmen i go long Adam mo Iv, be wan nara impoten komanmen i kam blong blokem fasin blong misyusum hemia. Aotsaed long ol rilesensip blong mared, evriwan fasin blong yusum paoa ia blong krietem laef, we i kasem wan mak o wan nara mak, i wan bigfala wei blong sin agensem hae tabu fasin blong ol man mo woman. Wanem we gospel we i kambak i tokbaot bigwan long loa blong jastiti ia, i from ol stamba tingting blong ol paoa blong krietem laef blong mekem plan blong God i hapen.
?Wanem I Kam afta?
Long taem blong 200 yia aniveseri blong Fas Visen we i statem Restoresen, yumi bin save plan blong Lod mo 200 yia i stap leftemap tingting blong yumi abaot ol blesing blong plan ia tru long Jos Ia we Hem i bin putumbak. Long yia ia, 2020, yumi gat wanem we ol medikol wokman oli singaotem 20/20 visen abaot ol samting we oli bin hapen bifo.
Be, taem yumi stap luk i go long fiuja, yumi no luk klia tumas. Yumi save se, tu handred yia afta long Restoresen, spirit wol i gat naoia plante wokman we oli gat eksperiens blong mekem prijing we i stap hapen longwe. Yumi save tu se yumi gat moa tempol blong mekem ol odinens blong taem we i no save finis, blong olgeta we oli sakem sin mo akseptem gospel blong Lod, long tugeta saed blong vel blong ded. Evri samting ia i mekem plan blong Papa long Heven i stap gohed. Lav blong God i bigwan tumas, mekem se, Hem i putum wan fiuja blong glori blong evri pikinini blong Hem, be i no blong ol boe blong tudak (luk long Doktrin mo Ol Kavenan 76:43).
Yumi save se Sevya bae i kambak mo bae i gat wan mileniom blong rul we i gat pis blong kavremap pat blong plan blong God ia we bae i hapen long wol. Yumi save tu se bae i gat ol defren taem blong laef bakegen long ded, hemia blong olgeta we oli stret, mo olgeta we oli no stret, wetem las jajmen blong wanwan stret afta we hem i laef bakegen long ded.
Bae oli jajem yumi folem ol aksen blong yumi, ol tingting blong hat blong yumi, mo kaen man o woman ia we yumi kam olsem. Jajmen ia bae i mekem se evri pikinini blong God bae oli go long wan kingdom blong glori folem hamas oli bin obei mo weaples bae oli stap gud long hem. Jaj ia bae i Sevya blong yumi, Jisas Kraes (luk long Jon 5:22; 2 Nifae 9:41. From se Hem i save luk evri samting, hemia i givim hem wan save we i stret evriwan abaot evriwan long ol aksen mo tingting blong hat, blong olgeta we oli bin sakem sin, o oli no jenis, mo blong olgeta we oli bin sakem sin, o oli stret mo gud. From hemia, afta long jajmen blong Hem, bambae yumi evriwan i konfesem “se ol jajmen blong Hem oli stret” (Mosaea 16:1).
Long en, mi serem strong tingting mo save we i kam long mi, long plante leta, mo taem mi lukluk long plante rikwes blong kambak long Jos afta we oli bin tekemaot nem blong olgeta o from apostasi. Plante long ol memba blong yumi oli no andastanem plan ia blong fasin blong sevem man, we i stap ansarem plante long ol kwestin ia abaot doktrin mo ol insperesen polisi blong Jos Ia we i kambak. Yumi, we yumi save plan blong God, mo yumi bin mekem kavenan blong tekpat, i gat klia responsabiliti blong tijim ol trutok ia mo mekem evri samting we yumi save mekem blong mekem ol narawan oli andastanem, mo mekem oli go moa long ol situesen blong yumi long laef ia. Mi testifae abaot Jisas Kraes, Sevya mo Ridima, we i mekem evri samting i posibol, long nem blong Jisas Kraes, amen.