Elda Thierry K. Mutombo

Jeneral Atoriti Seventi

Elda Thierry K. Mutombo i gat wan strong testemoni abaot gospel taem hem i bin kasem misin koling blong hem taem hem i bin wan yang man. Hem i baptaes taem hem i bin gat 10 yia, wetem famli blong hem, mo hem i bin witnesem olsem wanem gospel i gat paoa blong jenisim famli blong hem.

Be iven taem hem i bin stap rere blong go long wan misin long Kot Divoa Abidjan Misin, hem i no bin gat wan strong testemoni abaot Buk blong Momon. Hem i neva ridim buk ia bifo.

Bisop blong Thierry, we i kasem insperesen, i bin givim jalenj long hem blong ridim Buk blong Momon evri dei bifo hem i aot i go long misin blong hem. Hem i bin givim tu long Thierry, ki blong wan lokol mitinghaos blong Jos blong hem i gat wan ples blong stadi long hem long pis.

Thierry i bin rid evri dei blong tri manis taem. Taem hem i go long misin fil, hem i bin kasem finis wan strong testemoni abaot Buk blong Momon, be tu, hem i bin developem ol evri dei fasin blong stadi we i bin helpem hem olsem wan misinari.

“Tul ia i moa gud we yumi gat, blong tekem laet blong gospel i go long ol pipol mo blong karem Isrel we i seraot olbaot i kambak tugeta, hem i Buk blong Momon,” hem i talem.

Thierry Kasuangi Mutombo i bin bon i kam long wol ia long Kinsasa, Dimokratik Ripablik blong Kongo, long 31 Jenuware 1976, mo papa mo mama blong hem i Antoine Kasuangi Mutombo mo Marie Therese Matsanga Mutombo. Hem i bin mared Tshayi Nathalie Sinda long wan sivil mared long 29 Novemba 2002. Afta long hemia, tufala i bin sil long Joanesbeg Saot Afrika Tempol long 19 Novemba 2004. Tufala i gat sikis pikinini.

Elda Mutombo i bin graduet long 2010 long Yunivesiti blong Sepromad wetem wan digri long bisnis manejmen, long 2012 wetem wan digri blong manpaoa risos manejmen. Hem i bin wok blong Jos long Dimokratik Ripablik blong Kongo olsem maneja blong Famli Histri mo Manpaoa Risos Dipatmen, mo olsem wan supavaesa long Materiol Manejmen Dipatmen.

Long taem we oli bin singaotem hem i kam wan Jeneral Atoriti Seventi, Elda Mutombo i bin stap olsem presiden blong Merilan Baltimo Misin. Bifo long hemia, hem i bin stap olsem stek presiden, kaonsela long wan stek presidensi, wod misin lida, Sandei Skul tija, mo eksekutiv stek sekretari.