Elda Kelly R. Johnson

Jeneral Atoriti Seventi

Elda Kelly R. Johnson i tingbaot gud dei ia we oli bin singaotem hem i kam wan bisop, taem hem i gat 31 yia. Long semfala dei ia, oli bin faenem se hem i gat sik blong Bell palsi—wan sik we ol masel blong wan saed blong fes oli kam paralaes, o oli nomo strong.

I bin wan taem blong jalenj, i no from se i no mekem man i harem gud, mo i mekem man i sem, be tu from se hem i gat plante niu responsabiliti. Be ol taem ia we oli had, oli kam wan blesing.

“Mi no save se bae i olsem wanem long longfala taem, be mi bin developem wan lav mo sore blong wanwan man o woman, mo hemia i stap wetem mi truaot long laef blong mi,” hem i talem. “Mi rili lanem se ol pipol oli gotru long ol taem we oli strong, mo nogud we oli no save kontrolem, we i spolem samting we oli save mekem, ol filing, mo tras blong olgeta.”

Long sam taem, hem i no wan gud taem blong givim seves insaed long Jos ia blong Lod. Be jes olsem we ol disaepol blong Sevya “oli livim net blong [olgeta]” (Matiu 4:20) blong biaen long Sevya, “wanem we oli askem yumi blong mekem, bae yumi glad blong stap mekem,” Elda Johnson i talem.

I nomata weaples Lod i singaotem hem mo famli blong hem i go long hem, oli go wetem ol hat mo maen we oli glad blong mekem samting, we oli lukaot blong faenem gud samting i nomata long situesen blong olgeta.

Kelly Ray Johnson i bin bon i kam long wol ia long Plesen Viu, Yuta, long 16 Jenuware 1963, mo papa mo mama blong hem i Raymond Johnson Junia mo Helen Cragaun Johnson. Hem i bin groap long Ogden, Yuta, mo i maredem Teressa Lynn Bartrum long Sol Lek Siti Tempol long 27 Maj 1986. Tufala i gat faef pikinini.

Elda Johnson i bin graduet long Weba Stet Yunivesiti long 1987 wetem wan saens digri long akaonting mo i bin kasem masta bisnis administresen digri blong hem long Brigham Yang Yunivesiti long 1989. Hem i bin wok olsem wan forensik akaonten blong KPMG Intanasonol Koperativ mo las wok blong hem i bin stap olsem wan forensik akaonten mo patna blong Norman, Townsend, mo Johnson.

Elda Johnson, we i bin stap olsem wan Eria Seventi long taem we hem i kasem koling blong hem, i bin stap olsem wan misin presiden long Taelan Bangkok Misin; long ples ia nao hem i bin mekem fultaem misin blong hem, mo hem i bin stap olsem wan stek presiden, kaonsela long wan stek presidensi, hae kaonsela, bisop, presiden blong kworom blong ol elda, wod misin lida, mo stek misinari priperesen tija.