Steven J. Lund

Yang Man Jeneral Presiden

Olsem niufala Yang Man Jeneral Presiden, Steven J. Lund i bin akseptem wan tabu wok blong help blong soem rod long ol handred blong ol taosen yang man blong Aronik Prishud, insaed long wan wol Jos.

Sapos i bin posibol blong mit wetem evriwan long olgeta, hem i save stret wanem bae hem i talem long olgeta: “Blong stap olsem wan sakses memba blong kingdom blong God, i no kompliket tumas. Papa long Heven i lavem yu. Yu jes nid blong lavem Hem nomo. Mo, sapos yumi mekem hemia, bae yumi stap sef mo hapi. … Laef blong yumi, bae i minim wan samting.”

Blong tekem Jos i series, i no stap hapen long Sandei nomo. Hem i wan evri dei janis, loya ia we i kam bisnis eksekutiv i talem.

“Blong stap ridim ol skripja, go long jos, sakem sin stret afta we yumi aot long rod, stap openem maot blong yumi, mo stap olsem wan eksampol blong gospel—hemia nao plan blong Papa blong yumi long Heven,” hem i talem.

Brata Lund i bin bon i kam long wol ia long namba 30 Oktoba 1953, mo papa mo mama blong hem i Jay mo Toy Ellen Lund; hem i bin groap long tugeta ples ia, Not Kalifonia (Santa Rosa) mo Saot Kalifonia (Long Bij), YSA. Long seves blong hem long Ami blong Yunaeted Stet, i mekem hem i gobak long Yurop, wan graon we hem i kam blong lavem long taem blong seves blong hem long Nedalan Amsterdam Misin.

Afta long taem blong hem long ami, hem i go long Brigham Yang Yunivesiti; long ples ia, hem i bin faenembak Kalleen Kirk, wan yang woman we hem i bin kam blong save gud hem taem hem i bin stap long Jemani long ami. Steven mo Kalleen, tufala i bin mared long Sol Lek Tempol long 8 Ogis 1980. Tufala i papa mo mama blong fo pikinini.

Afta we hem i bin winim wan loa digri long BYY, Brata Lund i bin wok olsem wan loya bifo hem i bin kam presiden mo JEO blong Nu Skin Enterprises. Naoia i stap, hem i eksekutiv jeaman blong bod blong ol daerekta. Mo tu, hem i advaesa blong Yuta Sistem blong Hae Edukesen.

Brata Lund i bin stap olsem presiden blong Jojia Atlanta Misin, mo i stap olsem kodineta blong Provo Siti Senta Tempol Dedikesen Komiti. Mo tu, hem i bin stap olsem wan memba blong Yang Man jeneral bod mo olsem wan Eria Seventi.