Elda Jorge T. Becerra

Jeneral Atoriti Seventi

Jorge T. Becerra i bin wan man we i stap kwaet kwaet taem hem i stap groap, be misin presiden blong hem i bin givim hem ol janis blong lidim wok. Jorge i kambak hom taem hem i finis long Kalifonia Akadia Misin wetem wan tingting long hat blong gohed blong mekem wok blong Lod blong ful laef blong hem.

I gat moa lidasip janis we oli kam long hem kwiktaem bitim wanem hem i ting long hem. Taem hem i gat 27 yia, oli singaotem hem long wan bisoprik. Taem hem i gat 32 yia, oli singaotem hem i kam wan bisop. Long fas ples, hem i filim se hem i no inaf taem ol pipol oli stap kam luk hem wetem ol jalenj blong olgeta.

“Mi no gat eni aedia long wanem we mi stap mekem,” hem i talem long papa blong hem.

Ansa blong papa blong hem i tijim hem wan strong lesen, we i mekem hem i tingbaot fet we misin presiden i bin gat long hem, mo i bin helpem hem blong rere from ol fiuja lidasip koling, wetem tu koling blong hem olsem wan stek presiden taem hem i gat 37 yia.

“Papa blong mi i talem: ‘Boe, ?Tabu Spirit i gat hamas yia?’” Elda Becerra i tingbaot. “Hemia i bin wan bigfala taem blong oli tijim mi from mi bin save se mi save mekem eni samting we Lod i askem mi,”

Lesen ia, i bin stap wetem Elda Becerra truaot long plante yia blong givim seves wetem hat insaed long Jos Ia blong Jisas Kraes blong Ol Lata-dei Sent.

Jorge Eduardo Torres Becerra i bin bon i kam long wol ia long namba 18 Disemba 1962, mo papa mo mama blong hem i Juan C. Becerra mo Celia T. Becerra, long Sol Lek Siti, Yuta, YSA; hem i bin groap long ples ia tu.

Afta we hem i go long wan fultaem misin, Elda Becerra i bin maredem Debbie Ilene Schneberger long Sol Lek Tempol long namba 10 Ogis 1984. Tufala i papa mo mama blong fo pikinini.

Elda Becerra i kasem digri blong hem long jeneral stadi long Yunivesiti blong Yuta mo i kasem wan asosiet art digri long akaonting long Sol Lek Komuniti Kolej. Hem i bin stadi tu long bisnis long Yunivesiti blong Foniks. Long 1998, hem i kam wan patna blong Allegis Advisor Group, wan faenens advaes kampani. Long taem blong koling blong hem olsem wan Jeneral Atoriti Seventi, hem i bin stap wok olsem wan invesmen advaesa blong Intermountain Financial Partners.

Elda Becerra i bin givim seves olsem wan wod Yang Man presiden, kaonsela long wan misin presidensi, kaonsela long wan branj presidensi, seminari tija, kaonsela long wan bisoprik, bisop, stek presiden, mo presiden blong Kalifonia Akadia Misin. Long taem blong niufala koling blong hem, hem i bin stap olsem wan Eria Seventi.