Profesi We I Fulfil
Ol profesi we oli bin fulfil tru long Restoresen blong ful gospel blong Jisas Kraes, oli plante.
Ol dia brata mo sista blong mi, mi filim ona blong toktok long jeneral konfrens ia we bae i mekem histri blong makem wetem respek, Fas Visen blong Josef Smit blong God Papa mo Pikinini blong Hem, Jisas Kraes, long wanem we i nogat kwestin long hem, wan Tabu Bus. Visen ia i wan naesfala stat blong Restoresen blong gospel mo evri samting we i kam afta, stat long Buk blong Momon kasem prishud atoriti mo ol ki we i kambak long wol, oganaesesen ia blong tru Jos blong Lod, ol tempol blong God mo ol profet mo aposol we oli stap lidim wok ia long ol las dei ia.
Folem tabu tingting, ol profet blong bifo blong God taem oli muv folem Tabu Spirit, oli profesae long saed blong Restoresen mo wanem we bae i kam long dei blong yumi, las dispensesen ia mo taem ia we i fulwan. Stret wok ia nao, i “givim insperesen long ol sol” blong ol profet blong bifo.1 Truaot long jeneresen blong taem, ol profet oli talem wanem bae i hapen, oli drim, kasem visen, mo profesae long fiuja blong kingdom blong God long wol, wanem Aesea i singaotem “wan naesfala mo gudfala wok.”2
Ol profesi we oli bin fulfil tru long Restoresen blong ful gospel blong Jisas Kraes, we i tekem tu, Jos Ia blong Jisas Kraes blong Ol Lata-dei Sent, oli plante. Tedei, bae mi tokbaot sam nomo we mi laekem tumas. Olgeta profesi ia, ol dia praemeri tija, mo enjel mama blong mi, oli bin tijim long mi.
Daniel, we i bin sarem maot blong ol laeon wetem fet blong hem long Lod Jisas Kraes mo wetem help blong ol givhan enjel blong God, i bin wan we i luk dei blong yumi long wan visen. Taem Daniel i stap eksplenem mining blong wan drim blong King blong Babilon Nebukanesa, Daniel i bin profesae se Jos blong Lod we bae i girap long ol las dei olsem wan smol ston we oli “katemaot long en blong maonten antap be i no wetem ol han. ”3 “I nogat han,” i minim se tru long tabu help, Jos blong Lod bae i kam antap bigwan kasem taem i fulumap ful wol “neva [blong] oli prapa spolem… [be blong] i stanap blong oltaem.”4
Hem i wan dip witnes se ol toktok blong Daniel oli bin fulfil taem ol memba blong Jos, truaot long wol, oli stap wajem mo lisin long konfrens ia tedei.
Aposol Pita we i givim hem fulwan, i tokbaot “taem we bambae olgeta samting oli kam niuwan bakegen … stat long taem we wol i stat.”5 Aposol Pol i raetem se long fulnes taem, God bae “[karem i kam tugeta … long wan ples evri samting long Kraes],”6 “[Jisas Kraes Hemwan, i stap olsem ki ston].”7 Mi filim strong olgeta profesi ia taem mi tekpat long dedikesen blong Rom Itali Tempol. Evri profet mo aposol oli bin stap longwe mo serem testemoni blong olgeta abaot Jisas Kraes, Ridima blong wol ia, semmak olsem Pita mo Pol. Jos ia i wan eksampol we i stap laef blong taem ia we bae evri samting i kambak niu, ol brata mo sista mo ol memba blong yumi oli witnes blong tabu profesi ia longtaem finis.
Josef blong Ijip i bin profesae se long ol las dei: “Wan sia bae Lod, God blong mi i resemap, we bae hem i wan sia we bae hem i jusum blong ol pikinini blong ol laen blong mi.”8 “From bae hem i mekem wok [blong Lod].“9 Josef Smit, profet blong Restoresen, hem i bin sia ia.
Jon reveleta i bin profesae abaot wan enjel blong God we bae i karem i kam tugeta ol impoten pat blong Restoresen wetem ol toktok ia: “Nao mi luk we wan nara enjel i stap flae antap long skae, wetem gospel we i no save finis blong talemaot gud nius ia long olgeta man long wol, long evri nesen, mo kala, mo kantri, mo lanwis, mo pipol.”10 Moronae i bin enjel ia. Hem i bin luk dei blong yumi olsem oli raetem long Buk blong Momon. Long plante taem we hem i kamaot, hem i rere long Josef Smit long ministri blong hem we i tekem tu, translesen blong Buk blong Momon: Wan Narafala Testeman blong Jisas Kraes.
Ol nara profet oli tokbaot dei blong yumi. Malakae i bin tokbaot Elaeja we i “tanem hat blong ol papa i go long ol pikinini, mo ol hat blong ol pikinini i go long ol papa.”11 Elaeja i bin kam, mo olsem wan risal, tedei, yumi gat 168 tempol we i stap wok raon long wol. Wanwan tempol i fulap wetem ol memba we oli klin inaf we oli stap mekem ol tabu kavenan mo kasem ol tabu odinens long bihaf blong olgetawan mo ol bubu blong olgeta we oli ded. Tabu wok we Malakae i tokbaot i “stamba blong plan blong Krieta, blong ol pikinini blong Hem oli save gobak stap long ples blong olgeta kasem taem we i no save finis.”12
Yumi laef long taem ia we oli bin profesae long hem; yumi ol pipol ia we oli givim responsabiliti ia blong poenem rod i go long Seken Kaming blong Jisas Kraes; yumi blong karem i kam tugeta ol pikinini blong God, olgeta we bae oli harem mo holemtaet ol trutok, kavenan, mo ol promes blong gospel we i no save finis. Presiden Nelson i singaotem wok ia se hem i “jalenj we i moa bigwan, stamba wok we i moa bigwan, mo wok we i moa bigwan long evri narafalawan long wol tedei.”13 Long saed blong merikel ia mi talemaot witnes blong mi.
Tru long ol asaenem we i kam long Presiden Russell M. Nelson, long Febwari long yia ia, mi dediketem Deban Saot Afrika Tempol. I bin wan dei we bae mi tingbaot long ful laef blong mi. Mi bin stap wetem ol memba we oli bin kam long gospel olsem Jeremaea i profesae long hem longtaem finis—“wan man long wan taon, mo tu man long wan famli.”14 Doktrin blong Jisas Kraes i yunaetem yumi evriwan—raon long wol—olsem ol boe mo gel blong God, olsem ol brata mo sista long gospel. No mata olsem wanem yumi luk o olsem wanem yumi jenis, yumi wan pipol wetem wan Papa long Heven we plan blong hem stat long stat, i bin mo i blong ol famli blong kam wan bakegen taem oli mekem mo kipim ol tabu tempol kavenan.
Long wan smol kam tugeta blong ol man we oli holem prishud insaed long wan skul haos long Ketlan, Ohaeo, long 1834, Profet Josef i bin profesae, “hem i wan smol namba blong Prishud man nomo we yu luk long ples ia tedei long naet, be Jos ia bae i fulumap Not mo Saot Amerika—bae i fulumap wol.”15
Long ol yia we i jes pas, mi bin travel truaot long wol blong mit wetem ol memba blong Jos. Ol brata blong mi long Kworom blong Olgeta Twelef oli bin gat ol semmak asaenmen. Yet, huia i save kajap wetem taem tebol blong dia profet blong yumi, Presiden Nelson, we i bin travel long ol fas tu yia blong hem olsem Presiden blong Jos, we i bin tekem hem blong mit wetem ol Sent long 32 kantri mo ol teritri blong Yunaeted Stet”16 blong witnes long Kraes we i stap laef.
Mi tingbaot taem mi kasem misin kol blong mi olsem wan yang man. Mi bin wantem blong go long Jemani, olsem papa blong mi, brata blong mi mo tawi blong mi. Mi no wet long eniwan blong i kam hom, mi ron i go long melbokis mo openem kol ia. Mi ridim se oli singaotem mi blong go long misin long Is Stet Misin we hedkwota blong hem i stap long Niu Yok Siti. Mi harem nogud, so mi go insaed mo openem skripja blong mi blong kasem kamfot. Mi stat blong rid insaed long Doktrin mo Ol Kavenan: “Luk, mo luk gud, mi gat plante pipol long ples ia, long ol ples raonabaot; mo wan doa we i wok gud bae i open long ol ples raonabaot long graon ia long Is.”17 Profesi ia, we oli givim long Profet Josef Smit long 1833 i bin was revelesen long mi. Mi save long taem ia, oli bin singaotem mi long stret misin we Lod i wantem mi blong givim seves long hem. Mi tijim Restoresen mo bigfala stat blong hem taem Papa blong yumi long Heven i toktok long Josef Smit mo i talem, “Hemia i Pikinini blong mi we mi lavem tumas. !Lisin gud long Hem!”18
Wan long ol profesi ia we i impoten tumas blong ful Jos i profesi blong Aesea. Moa bitim 700 yia bifo Jisas Kraes i bon: “I gat taem i stap kam, we hil ya we haos blong mi i stap long hem, bambae i kam hae moa, … mo ol man blong ol narafala kantri bambae oli save wokbaot blong kam long hem.”19
Long maen blong mi tedei, mi pikjarem ol milian long ol memba blong yumi mo fren oli joen long ol miting ia tru long televisen, intanet mo ol narafala wei. Yumi stap sidaon olsem se yumi tugeta “[long top blong hil ia.]”20 I bin Brigham Yang we i talem toktok ia “Hemia ia stret ples.”21 Ol Sent, sam long olgeta oli ol paeonia bubu blong mi, oli bin wok blong stanemap Saeon long Ol Hil We I Fulap long Ol Ston “tru long wil mo harem gud blong hem we i givim oda long ol nesen blong wol.”22
Mi stanap tedei long tabu graon we i bin pulum ol milian blong ol visita. Long 2002, Sol Lek Siti i hostem Winta Olimpik Gem. Tabenakol kwaea i bin singsing long ol opening seremoni, mo Jos i bin mekem ol konset mo program blong ol ges mo ol patisipen we oli kam long ol plante, plante kantri. Bae mi oltaem tingbaot we mi stap luk tempol biaen long naet nius we oli brodkastem long ful wol.
Ova long ol yia, presiden blong Yunaeted Stet, ol king, ol jaj, ol praem minista, ol ambasada, mo ol ofisol blong plante kantri oli bin kam long Sol Lek Siti mo mit wetem ol lida blong yumi. Presiden Nelson i hostem ol lida blong Nasonal Asosiesen blong muvum i go fored wok blong ol Kala Pipol, wan Yunaeted Stet oganaesesen we i komitim hem long ol semmak raet mo nogat diskriminesen long saed blong kala. Mi tingbaot blong stanap saed solda wetem ol lida ia taem Presiden Nelson i joenem olgeta blong askem blong gat wan bigfala respek mo kam wan wetem evriwan blong evri kaen kala long wol.”23
Plante moa oli bin kam long Tempol Skwea mo mit long kaonsel wetem ol Jos lida. Eksampol, long yia we i jes pas, blong talem sam nomo, mifala i bin welkamem namba 68 Yunaeted Nesen Sivil Sosaeti Konfrens, wan kam tugeta blong ful wol, mo hem i faswan aotsaed long long Niu Yok Siti. Mifala i bin mit wetem Vietnam Komiti blong Ol Afea blong Relijin, ambasada blong Kuba, Filipin, Ajentina, Romenia, Sudan, Kata, mo Saodi Arabia. Mifala i bin welkamem tu sekretari jeneral blong Muslim Wol Lik.
Wanem we mi stap tokbaot i profesi blong Aesea we i bin fulfil se long ol las dei, ol kantri bae oli go long “[hil blong haos blong Lod].”24 Bigfala Sol Lek Tempol i stanap long medel blong majesti mo glori ia.
I no from ples we Sol Lek i stap long hem we i mekem se ol man i kam long hem, nomata se i wan naes ples; i from kwaliti blong relijin we i klin we i soem spirit, saes, gud fasin, mo kaen fasin blong Jos ia Jisas Kraes blong ol Lata‑dei‑Sent mo ol pipol blong hem; lav blong yumi olsem we God i stap lavem man, mo komitmen blong yumi blong wan stamba wok we i moa hae, wanem we Josef Smit i singaotem, “stamba wok blong Kraes.”25
Yumi no save wetaem bae Sevya bae i kambak, be hemia yumi save. Yumi mas rere long hat mo maen, stap klin inaf blong kasem Hem, mo gat ona ia blong stap pat long evri samting we oli bin profesae long hem longtaem finis.
Mi testifae se Presiden Russell M. Nelson i profet blong Lod long wol ia, mo long saed blong hem oli ol Aposol we God i singaotem, oli sastenem olgeta olsem ol profet, sia mo reveleta. Mo, ol dia brata mo sista blong mi, Restoresen i gohed.
Mi endem wetem profesi blong Josef Smit, ol toktok we mi testifae long hem oli tru: “I nogat wan han we i toti i save stopem wok blong i gohed; ol fasin blong agens bae oli strong, ol rabis man bae oli joen wanples, ol ami bae oli kam tugeta, fasin blong tokbaot nogud man bae i spolem man, be trutok blong God bae i gohed strong, hae antap, mo indipenden, kasem taem we bae i gotru long evri graon, i visitim evri kaen weta, i brum long evri kantri, mo i ring long evri sora, kasem taem ol stamba tingting blong God oli kamtru, mo Hae Jehova bae i talem se wok ia i finis.”26 Mi testifae olsem se ol profesi blong Josef Smit oli stap fulfil finis.
Mi promes se taem yu folem ol kaonsel we i kam tru long insperesen blong dia profet blong yumi, Presiden Russell. M. Nelson, ol kaonsela blong hem, Ol Aposol, mo ol nara lida blong Jos, mo taem yu folem tijing blong ol profet blong bifo we oli tokbaot finis dei blong yumi, bae yu fulap, dip insaed long hat mo sol blong yu, wetem spirit mo wok blong Restoresen. Mi promes bae yu luk han blong God long laef blong yu, harem ol smol voes blong Hem, mo filim lav blong Hem. Long nem blong Jisas Kraes, wetem tangkyu from Restoresen blong gospel mo Jos blong Hem, olsem pruf blong bigfala lav blong Hem, amen.