Bradley R. Wilcox

Seken Kaonsela long Yang Man Jeneral Presidensi

Taem hem i bin stap tekpat long wan yut konfrens long Kalifonia, Brata Bradley (Brad) R. Wilcox i bin mitim wan yang man we i no bin wantem stap long tetaem ia. Hem i bin joenem yangfala boe ia andanit long wan tri, mo i no longtaem afta, tufala i stap tokbaot fevret topik blong tufala—sketbod.

Brata Wilcox i bin askem yangfala ia blong soem hem sam muv blong sketbod. Hem i sapraes long yang boe ia, nao hem i askem yangfala ia blong soem sketbod skil blong hem long wan aktiviti we oli singaotem Speseli blong Ol Yut, long samataem. Yangfala ia i no bin wantem, be long en, hem i agri. Long SOY (o EFY long Inglis), hem i bin gat wan eksperiens we i bin jenisim laef blong hem, mo i faenem testemoni blong hem long gospel.

“Hem i bin kam long SOY long wan sketbod, be hem i aot olsem wan misinari,” Brata Wilcox i talem.

“Mi bin spendem laef blong mi wetem ol pikinini mo ol yangfala,” Brata Wilcox i talem, “mo mi lavem ol yut.”

Bradley Ray Wilcox i bin bon i kam long wol ia long Provo, Yuta, YSA long 25 Disemba 1959, mo papa mo mama blong hem i Ray T. Wilcox mo Val C. Wilcox. Hem i bin groap long Provo, be hem i bin spendem ol yia blong hem olsem wan pikinini long Itiopia.

Afta we hem i go long wan fultaem misin long Jile Vinia del Mar Misin, Brata Wilcox i bin maredem Deborah Gunnell long Provo Yuta Tempol, long namba 7 Oktoba 1982. Tufala i papa mo mama blong fo pikinini.

Brata Wilcox i bin kasem bajela mo masta digri long Brigham Yang Yunivesiti mo i kasem Dokta pepa blong hem long saed blong edukesen long Yunivesiti blong Waeoming. Brata Wilcox i bin kasem plante awod from wok blong hem long edukesen, i bin givim moa long 30 yia long program blong BYY Spesel blong Ol Yut, mo i bin wan gudfala tija long Kampas Edukesen Wik.

Brata Wilcox mo famli blong hem i bin laef long Niu Silan mo Spen taem hem i bin stap daerektem ol stadi program ovasi blong BYY. Hem i bin raetem samfala buk, mo naoia, i wan profesa long Dipatmen blong Olfala Skripja long BYY.

Brata Wilcox i bin stap olsem presiden blong Jile Santiago Is Misin, mo olsem wan Sandei Skul jeneral bod memba, kaonsela insaed long wan stek presidensi, mo wan bisop blong wan yang singgel adalt wod. Long taem blong koling blong hem, hem i bin stap olsem wan hae kaonsela mo olsem wan Stek Yang Man Presiden.