Elda Ciro Schmeil

Jeneral Atoriti Seventi

Elda Ciro Schmeil i oltaem traehad blong stap obei long Lod, iven sapos hem i no andastanem risen biaen long wan spesifik komanmen. “Taem yumi stap obei, taem yumi stap kipim olgeta komanmen,” hem i lanem, “oltaem bae Lod i blesem yumi.”

Taem hem i bin stap mekem ol koling blong hem, hem i bin luk ol blesing we oli kamaot long fasin blong stap obei. Taem hem i bin stap olsem wan bisop mo wan stek presiden, hem i bin gat plante rij janis blong “luk ol pipol oli stap jenisim laef blong olgeta from testemoni blong olgeta abaot Sevya mo Buk blong Momon.”

Elda Schmeil i bin bon i kam long wol ia long 16 Epril 1971, long Ponta Grossa, Parana, Brasil, mo papa mo mama blong hem i Bruno mo Erica Schmeil, we tufala i ol konvet long Jos. Hem i bin groap long Kuritiba, Brasil, mo kolosap long semfala taem we papa mo mama blong hem oli kasem koling blong prisaed ova long Brasil Kampinas Misin, hem tu, hem i aot blong givim seves long Yuta Ogden Misin.

Taem oli bin stap long Yunivesiti blong Yuta, Elda Schmeil i mitim Alessandra Machado Louza, wan studen long Brigham Yang Yunivesiti, long taem blong wan divosen. “Taem mitufala i mit blong fas taem, Alessandra i no wantem save nating long mi,” hem i talem. Be long hem, i lavem hem nao long fas taem i luk hem.

Tufala i mared long Sao Paolo Brasil Tempol long Julae 1994, mo tufala i finisim stadi blong tufala long Yunaeted Stet. Tufala i bin gobak long Brasil blong 20 yia bifo tufala i muv i go long Kolorado, YSA, mo afta long Florida, YSA. Elda mo Sista Schmeil, tufala i gat tu pikinini.

Elda Schmeil i gat wan digri long akikteja stadi long Yunivesiti blong Yuta long 1995, mo i kasem wan masta blong bisnis administresen long Ohaeo Yunivesiti long 2010. Hem i bin wok blong Walmart Brasil olsem vaes presiden mo daerekta blong wan bisnis blong salem graon, i bin wok olsem jif operesen ofisa long Scopel, olsem jeneral maneja long Cia City, mo laswan olsem hed blong bisnis blong salem graon blong JBS S.A.

Elda Schmeil i bin stap olsem wan Eria Seventi, stek presiden, kaonsela long wan stek presidensi, bisop, presiden blong kworom blong ol elda, mo wod Yang Man presiden.