Ol Memori long Saed blong Spirit We I Givim Paoa
Taem ol hadtaem blong yumiwan, o taem ol situesen blong wol we oli bitim kontrol blong yumi, oli mekem rod blong yumi i kam tudak, ol strong memori long saed blong spirit long buk blong laef blong yumi olsem ol ston we i laet we i help blong saenem rod long fored blong yumi.
Eitin yia afta long Fas Visen, Profet Josef Smit i raetem wanwan stori long saed blong eksperiens blong hem. Hem i bin fesem ol fasin blong go agens, kilim man i ded, ol nogud toktok, mo ol nogud fasin, mo oli bin atakem hem nogud. 1 Be yet, hem i gohed blong no fraet mo testifae abaot Fas Visen blong hem: “Mi bin luk wan laet, mo long medel blong laet ia, mi bin luk tufala Man, mo i tru se Tufala i bin toktok long mi; mo nomata ol man oli no laekem mi mo givim hadtaem long mi, mo stap sakem ol rabis toktok long mi from mi stap talem se mi bin luk wan visen, yet i bin tru. … Mi save hemia, mo mi save se God i save hemia, mo mi no save talem se i no tru.” 2
Long olgeta hadtaem ia, memori blong Josef i gobak kolosap tu handred yia from tru lav blong God long hem mo ol samting we i bin hapen blong rere long wol from ‑Restoresen we oli stap tokbaot bifo. Tingting bak long spirituol rod blong hem, Josef i talem: “Mi no save poenem fingga long eni man blong no bilivim histri blong mi. Sapos mi no bin eksperiensem wanem we mi bin go tru long hem, bae mi no save bilivim tu miwan.” 3
Be ol eksperiens ia i ril, mo hem i no save fogetem o tanem baksaed long olgeta, long kwaet fasin, hem konfemem testemoni blong hem taem hem i muv i go long Katej Kalabus. “Mi stap olsem wan smol sipsip we i go blong oli kilimded hem,” hem i talem, “be mi mi kwaet nomo olsem moning blong wan gudfala dei; tingting blong mi i no gat wan rong agensem God, mo agensem evri man.” 4
Ol Eksperiens long Saed blong Spirit we Oli Impoten long Laef blong Yu
I gat wan lesen blong yumi evriwan i lanem long eksperiens blong Profet Josef. Wetem daereksen blong pis we yumi kasem tru long Tabu Spirit, long wan taem i go long narawan, God i mekem sua wetem evri paoa we hem i gat mo long wanwan se Hem i save yumi mo lavem yumi mo se Hem i stap blesem yumi long stret taem mo open nomo. Afta, long ol taem blong hadtaem blong yumi, Sevya i karem olgeta eksperiens ia i kambak long maen blong yumi.
Tingting long laef blong yuwan. Ova long ol yia, mi bin lisin long taosen blong dip spirituol eksperiens we i kam long ol Lata‑dei Sent truaot long wol, oli konfemem long mi i go bitim eni kwestin se God i save mo lavem wanwan long yumi mo se Hem i gat strong tingting ia blong soem Hemwan long yumi. Olgeta eksperiens ia oli kam long ol impoten taem long laef blong yumi, o long wanem we long stat i luk olsem se i no impoten, be oli oltaem folem wan strong spirituol konfemesen we i gud tumas long saed blong lav blong God.
Tingbaot olgeta spirituol eksperiens ia we i givim paoa, i tekem yumi i go long ol ni blong yumi, mo talem olsem Profet Josef i bin talem:“Wanem we mi bin kasem, i kam long heven. Mi save hemia, mo mi save se God i save se mi save hemia.” 5
Ol Fofala Eksampol
Tingtingbak long ol memori we oli makem yu long saed blong spirit, taem mi serem samfala eksampol blong sam nara pipol.
Sam yia i pas, wan olfala stek petriak wetem tu paep blong hat we i no wok gud i askem strong blong Dokta Russel M. Nelson i help, nomata se long taem ia i no gat wan wei long saed blong katem man blong nambatu paep blong hat we i nogud. Dokta Nelson, long en i agri blong mekem operesen ia. Hemia i ol toktok blong Presiden Nelson:
“Afta karemaot wanem we i blokem fas paep, mifala i openem namba tu paep.” Mifala i faenem se ful paep be i nogud tumas mekem se i nomo save wok olsem we i sud wok. Taem mi stap lukluk gud long paep ia, wan mesej i kam stret long maen blong mi: Katemdaon nomol saes blong ring. Mi talemaot mesej ia long man we i helpem mi. ‘Mit blong paep ia bae i inaf sapos yumi save katemdaon saes blong ring i kam long nomol saes blong hem.’
“?Be olsem wanem? … Wan pikja i kam klia long maen blong mi, soem olsem wanem bae ol tred i stap—blong foldem long ples ia mo pulum i kam insaed longwe. … Mi stap tingbaot yet pikja ia—fulwan wetem ol laen we bae oli somap tred folem. Ripea i komplit olsem we i stap long maen blong mi. Mifala i testem paep mo fanemaot se lik ia i go daon bigwan. Asisten blong mi i talem, ‘Hemia i wan merikel.’” 6 Petriak ia i laef blong plante yia.
Dokta Nelson i kasem daereksen. Mo hem i save se God i save, se hem i save se hem i bin kasem daereksen.
Kathy mo mi i bin mitim Beatrice Magré blong fas taem long Franis, 30 yia i bin pas. Beatrice i talem long mi i no longtaem i pas abaot wan eksperiens we i jenisim laef blong hem long saed blong spirit, smol taem afta long baptaes blong hem olsem wan smol gel. Hemia i ol toktok blong hem:
“Ol yut long branj blong mifala oli bin travel wetem lida blong olgeta i go long Lakanau solwota, wan aoa mo haf long Bordo.
“Bifo kambak long hom, wan long ol lida i i wantem tekem wan las swim mo daeva i go insaed long ol wef wetem klas blong hem. Taem hem i kambak antap, ol klas blong hem oli lus. … Oli lus long solwota.
“Bae hem i no save draevem trak blong hem from klas blong hem i lus. Bae mifala stap longwe long hom.
“Wan sista i fulap long fet i talem se bae mifala i prea.
“Mi komplen se prea bae i no givim eni samting long yumi, mo i no isi, be mi joenem grup blong prea long pablik taem mifala i stanap ol hip draon dip long wota.
“Taem prea i finis, mi stretem han blong mi blong wasem evriwan. Taem mi stap muvum han blong mi go kam antap long wota, klas blong hem i stap long han blong mi. Wan filing wetem paoa i stikim sol blong mi se God i stap harem ol prea blong yumi.” 7
Fotifaef yia afta, hem i tingbaot hemia olsem i bin hapen yestedei. Beatrice i bin kasem blesing mo hem i save se God i save se hem i save se hem i bin kasem blesing.
Eksperiens blong Presiden Nelson mo Sista Magré oli bin defren, yet long tugeta, i wan memori long saed blong spirit we i makem tufala mo bae tufala i no save fogetem, abaot lav blong God wei bin stap long hat blong tufala.
Ol taem olsem we oli makem laef, oli kam taem yumi lanem abaot gospel we i kambak o taem yumi serem gospel wetem ol narawan.
Pikja ia oli bin tekem long Sao Paulo, Brasil, long 2004. Floripes Luzia Damasio blong Ipatinga Brasil Stek i gat 114 yia. Taem hem i tokbaot taem we hem i jenisim laef blong hem, Sista Damasio i talem se ol misinari long vilej blong hem oli bin givim wan prishud blesing long wan pikinini we i sik bigwan we, wetem merikel, i kam gud. Hem i wantem blong save moa. Taem hem i prea abaot mesej blong olgeta, wan witnes we man i no save tanem bak long hem blong Spirit, i konfemem long mi se Josef Smit i wan tru profet blong God. Long 103 yia, hem i bin baptaes, mo long 104 yia, hem i bin endao. Evri yia afta, hem i travel 14 aoa long bas blong spendem wan wik long tempol. Sista Damasio i bin kasem wan konfemesen we i kam long heven mo hem i save se God i save se hem i save se witnes ia i tru.
Hemia i wan spirituol memori long fas misin blong mi i go long Franis 48 yia i pas.
Taem mitufala i stap noknok long ol doa, kompanion blong mi mo mi i bin lego wan Buk blong Momon wetem wan olfala woman. Taem mitufala i gobak long apatmen blong woman ia afta wan wik i pas, hem i openem doa. Bifo eni toktok i kamaot, mi filim wan paoa long saed blong spirit, we man i save tajem. Bigfala filing ia i gohed taem Sista Alice Audubert i invaetem mitufala insaed mo talem long mitufala se hem i bin ridim Buk blong Momon mo save se i tru. Taem mitufala i lego apatmen blong hem long dei ia, mi prea, “Papa long Heven, plis helpem mi blong neva fogetem wanem we mi jes filim.” Mi neva fogetem.
Long wan semmak taem olsem, long wan doa semmak olsem ol handred nara doa, mi bin filim paoa blong heven. Mi save se God i save se mi save se wan windo blong heven i bin open.
I blong Wanwan mo Wan I No Save Tanem Baksaed long Hem
Ol spirituol taem ia i olsem oli kam long ol defren taem mo long ol defren wei, stret nomo blong wanwan long yumi.
Tingbaot ol gudfala eksampol blong yu insaed long ol skripja. Olgeta we oli lisin long Aposol Pita “i bin gat hol long [ol] hat blong olgeta.” 8 Abis wan woman blong Ol Man blong Leman, i bin bilivim ol “naesfala visen blong papa blong hem.” 9 Mo wan voes i kam long maen blong Inos. 10
Fren blong mi Clayton Christensen i tokbaot wan eksperiens long wan taem blong ridim Buk blong Momon wetem plante prea long wei ia: “Wan naes, wom, spirit we i gat lav … I raonem mi mo stikim sol blong mi, i raonem mi long wan filing blong lav we mi neva ting se mi save filim, [mo ol filing ia oli gohed naet afta naet].” 11
I gat ol taem we ol filing blong spirit oli go daon long hat blong yumi olsem faea, laetemap sol blong yumi. Josef Smit i eksplenem se samtaem yumi kasem “kwik tingting we i mekem yumi sek” mo sam taem “waes we i flo i kam.” 12
Presiden Dallin H. Oaks, long ansa blong hem long wan man we i talem se hem i neva gat kaen eksperiens olsem, hem i talem, “Ating ol prea blong yu oli bin ansarem bakegen mo bakegen, be yu bin gat ol tingting blong yu oli stap long wan saen o wan voes we i laod tumas mekem se yu ting se yu no bin kasem ansa.” 13 Sevya Hemwan i tokbaot bigfala fet blong ol pipol we oli bin kasem [blesing] wetem faea mo wetem Tabu Spirit, [be oli] no bin save. 14
?Olsem Wanem Nao Yu Stap Harem o Lisin Gud long Hem
Yumi bin harem Presiden Nelson i no longtaem i pas i talem: “Mi invaetem yu blong tingting dip mo plante taem abaot ki kwestin ia: ?Olsem wanem yu harem Hem? Mi invaetem yu blong tekem ol step blong harem Hem moa gud mo moa plante.” 15 Hem i bin ripitim invitesen ia long moning ia.
Yumi harem Hem long ol prea blong yumi, long ol hom blong yumi, long ol skripja, long ol singsing blong yumi, taem yumi tekpat long sakramen wetem klin fasin, taem yumi talemaot fet blong yumi, taem yumi givim seves long ol narawan, mo taem yumi atendem tempol wetem ol nara man we i biliv. ol spirituol taem we i givim paoa oli kam taem yumi lisin gud long jeneral konfrens mo taem yumi kipim gud ol komanmen. Mo ol pikinini, ol eksperiens ia oli blong yu tu. Tingbaot, Jisas “I bin tij mo givhan long ol pikinini … mo [ol pikinini] oli toktok … ol bigfala mo naesfala samting.” 16 Lod i talem:
“[Save ia oli] Spirit blong mi i givim long yufala, … mo sapos i no tru long paoa blong mi, bambae yufala i no save kasem olgeta save [ia];
“Taswe, yufala i save testifae se yufala i bin harem voes blong mi, mo yufala i save ol toktok blong mi.” 17
Yumi save “harem Hem” from ol blesing blong Atonmen blong Sevya we i no gat nara samting i semmak long hem.
No mata se yumi no save jusum taem blong kasem ol strong taem olsem, Presiden Henry B. Eyring i givim kaonsel ia blong rere long yumi: “Tedei long naet mo tumoro long naet, maet yu prea mo tingting hevi, mo askem kwestin ia: ?God i sendem wan mesej we i blong miwan nomo? Mi bin luk han blong Hem long laef blong mi o long laef blong [famli] blong mi?” 18 Fet, fasin blong stap obei, tingting i stap daon, mo tru tingting i openem windo blong heven. 19
Wan Eksampol
Maet yu tingting long ol memori blong yu long saed blong spirit long wei ia. Wetem prea oltaem, wan strong tingting blong kipim ol kavenan blong yumi, mo presen blong Tabu Spirit, yumi faenem wei blong yumi tru long laef. Taem ol wanwan hadtaem, tu tingting, o tingting i foldaon i mekem rod i tudak, o taem kondisen blong wol we oli bitim kontrol blong yumi, i lidim yumi blong kwestinim fiuja, ol strong memori long saed blong spirit we oli kamaot long buk blong laef blong yumi, oli olsem ol ston we i laet i help blong saenem rod long fored, talem long yumi se God i save yumi, lavem yumi, mo sendem pikinini blong Hem, Jisas Kraes, blong helpem yumi gobak hom. Mo taem wan man i putum long saed ol memori ia we i givim paoa mo i lus mo konfius, yumi tanem olgeta i go long Sevya taem yumi serem fet blong yumi mo ol memori wetem olgeta, helpem olgeta luk save olgeta naesfala spirituol taem ia we oli bin wan taem holem kolosap long olgeta.
Sam eksperiens oli tabu mekem se yumi holemtaet olgeta long spirituol memori blong yumi mo no save serem olgeta. 20
“Ol enjel oli toktok tru long paoa blong Tabu Spirit, taswe, oli talemaot ol toktok blong Kraes.” 21
“Ol enjel oli [no stop] blong givhan long ol pikinini blong ol man.
“From luk, oli stap andanit long paoa blong [Kraes], blong givhan folem … ol komanmen blong hem, soem olgetawan long olgeta we oli gat strongfala fet mo wan strong tingting long evri kaen fasin olsem blong God.” 22
Mo “Spirit ya blong Givhan, we hem i Tabu Spirit, … we bae i save tijim yufala long evri samting, mo bae hem i save mekem yufala i tingbaot olgeta samting ya bakegen.” 23
Holemtaet ol tabu memori ia. Bilivim olgeta Raetemdaon olgeta. Serem olgeta wetem famli blong yu. Trastem se oli kam long yu long Papa blong yu long Heven mo Pikinini blong Hem we Hem i Lavem. 24 Letem olgeta i karem longfala tingting i kam long ol tu tingting blong yu mo save ia blong andastanem ol had taem blong yu. 25 Mi promesem yu se taem yu luk save mo lukaotem wetem kea ol spirituol taem ia we i givim paoa long laef blong yu, plante moa bae i kam long yu. !Papa long Heven i save yu mo lavem yu!
Jisas Kraes, gospel blong Hem i bin kambak, mo taem yumi stap fetful, mi witnes se bae yumi blong Hem blong oltaem, long nem blong Jisas Kraes, amen.