Ol Konfrens Taem blong Stap Tingbaot
Olsem we Presiden Russel M. Nelson i bin promesem, jeneral konfrens ia, bae yumi no save fogetem long plante wei.1 Hemia samfala taem blong konfrens blong stap tingbaot.
Niu Simbol
Presiden Nelson i bin anaonsem wan niu simbol blong Jos (luk long pej 73). Simbol ia, i tekem nem blong Jos we i stap insaed long wan rektangol, we i ripresentem wan kona ston. Antap long hem, i gat wan Kristus statiu i stap andanit long wan ark, we i rimaenem yumi abaot Sevya, mo emti tumb blong Hem.
Tu Handred Yia Ofisol Toktok
Presiden Nelson i ridim “Restoresen blong Gospel blong Jisas Kraes we i Fulwan: Tu Handred Yia Ofisol Toktok I Go long Wol,” we i stap invaetem ol pipol long evri ples blong lanem se gospel ia blong Jisas Kraes we oli tokbaot insaed long Niu Testeman, i stap bakegen long wol tedei. Ofisol translesen, bae oli save faenem long insaed kova long fored blong namba ia, long 12 lanwis. Ol memba we oli stap wet yet long wan ofisol translesen, bae oli save faenem ol fasfala translesen blong ofisol toktok ia insaed long toktok blong Presiden Nelson (luk long pej 91).
Tabu Miting
Oli bin holem wan “tabu miting o tabu asembli” long Sandei moning, olsem pat blong tu handred yia selebresen blong Fas Visen. Long taem blong tabu miting ia, Presiden Nelson i bin lidim Ol Sent long wan Hosana Singaot, wan wei blong presem God we oli yusum nomo long ol spesel taem olsem ol dedikesen blong tempol (luk long pej 92).
Nambatu Wol Dei blong Livim Kakae
Blong wan nambatu taem long naen dei, Presiden Nelson i bin invaetem wol blong livim kakae mo prea “se wol sik we i stap naoia, bae oli save kontrolem, olgeta we oli givim kea oli gat proteksen, ekonomi i kam strong moa, mo ol laef oli kam nomol bakegen” (pej 74). Nambatu wol dei ia blong livim kakae, i bin tekem ples long Gud Fraedei, long namba 10 Epril 2020.
Ol Niu Tempol
Presiden Nelson i bin anaonsem ol plan blong bildim eit niu tempol raon long wol (luk long pej 115). I gat 167 tempol we oli open naoia, raon long wol.
Ol Yut Spika
Long Satedei naet sesen, i bin gat toktok we i kam long tufala yangfala, Laudy Ruth Kaouk mo Enzo Serge Petelo, we tufala i bin tokbaot olsem wanem prishud i stap blesem ol yut (luk long ol pej 56 mo 58). Hem i kolosap 20 yia nao we ol yut spika oli no bin toktok long jeneral konfrens.
Miusik we I Givim Paoa
Ol miusik namba blong konfrens ia, oli bin rekodem finis. Ol Sent raon long wol oli bin endem konfrens ia taem oli bin singsing “Tangkyu, Papa God, Yu givim Profet” wetem ol kwaea we oli kamaot long Gana, Niu Silan, Meksiko Siti, Saot Koria, Jemani, mo Brasil (luk long pej 2).