Kam mo Kam Pat
Mifala i stap invaetem evriwan long ol pikinini blong God, raon long wol, blong joenem mifala long bigfala wok blong Hem.
Ol dia brata mo sista blong mi, ol dia fren blong mi. Evri wik, ol memba blong Jos Ia blong Jisas Kraes blong Ol Lata-dei Sent raon long wol, oli stap wosipim Papa long Heven we yumi lavem tumas, God mo King blong yunives, mo Pikinini blong Hem we Hem i Lavem Tumas, Jisas Kraes. Mifala i stap tingting hevi long laef mo ol tijing blong Jisas Kraes—wan sol ia nomo we i no gat sin we i bin laef ia, we i Smol Sipsip blong God we i no gat mak. Mifala i stap tekem mo kakae sakramen blong tingbaot sakrifaes blong Hem, mo luksave se Hem i stap long medel blong laef blong mifala.
Mifala i lavem Hem mo ona long Hem. From lav ia blong Hem we i dip mo i no save finis, Hem i bin safa mo ded from yu mo mi. Hem i bin brekem ol get blong ded, i brekem ol fanis we oli seperetem ol fren mo olgeta we yumi lavem olgeta,1 mo i givim hop long olgeta we oli lusum hop, i hilim ol sikman, mo mekem ol prisena oli kam fri.2
Long Hem, mifala i stap dediketem hat, laef mo evri dei tingting blong mifala. From risen ia: “Yumi tokbaot Kraes, yumi glad long Kraes, yumi prij long saed blong Kraes … blong mekem se ol pikinini blong yumi oli save gat save long wanem ples oli save lukluk long hem blong kam klin aot long ol sin blong olgeta.”3
Stap Praktis blong Stap Wan Disaepol
Be, blong stap wan disaepol blong Jisas Kraes, i minim moa bitim blong stap toktok mo prij abaot Kraes. Sevya Hemwan i bin putumbak Jos blong Hem blong helpem yumi long rod ia blong kam moa olsem Hem. Jos Ia blong Jisas Kraes blong Ol Lata-dei Sent, i setap long wan wei blong givim ol janis blong praktisim ol stamba poen blong stap olsem wan disaepol. Taem mifala i tekpat insaed long Jos, mifala i stap lanem blong luksave mo tekem aksen folem ol kwaet toktok blong Tabu Spirit. Mifala i stap developem fasin blong stap oltaem blong help wetem lav mo sore, mo fasin blong stap kaen long ol narawan.
Hemia wok blong laeftaem, mo i nidim praktis.
Ol top man blong ron, oli stap spendem plante aoa blong praktisim ol stamba step blong spot blong olgeta. Ol nes, ol netwok man, ol nuklia enjinia, mo iven mi, taem mi kompit long kuk insaed long kijin blong Hariet, mi kam blong save mo gat skil ia nomo, from mi praktis long skil ia.
Olsem wan kapten blong plen, plante taem, mi trenem ol paelot blong yusum wan flaet masin—wan top masin we i mekem olsem se yu stap flae rilwan. Masin ia i no helpem ol paelot blong lanem ol stamba skil blong flae, be tu, i letem olgeta oli gat eksperiens mo oli save handelem ol taem we oli no ting long ol, we oli save fesem taem oli stap long stia blong ril plen.
Ol semfala prinsipol ia i semmak long ol disaepol blong Jisas Kraes.
Blong stap aktiv mo tekpat insaed long Jos Ia blong Jisas Kraes mo ol defren janis we hem i givim, bae i helpem yumi blong rere gud moa from ol jenis blong situesen long laef, i nomata se oli wanem kaen o se oli series o no. Olsem ol memba blong Jos, oli leftemap tingting blong yumi blong draonem yumi long ol toktok blong God tru long ol profet blong Hem, blong bifo mo tedei. Tru long prea we i tru mo i hambol, long Papa blong yumi long Heven, yumi save lan blong haremsave voes blong Tabu Spirit. Yumi save akseptem ol koling blong givim seves, tij, mekem plan, givhan mo helpem man. Ol janis ia oli letem yumi groap long spirit, maen mo fasin blong yumi.
Bae oli helpem yumi blong rere blong mekem mo kipim ol kavenan ia we bae oli blesem yumi long laef ia, mo long laef we i stap kam.
!Kam Joenem Mifala!
Mifala i stap invaetem evriwan long ol pikinini blong God, raon long wol, blong joenem mifala long bigfala wok blong Hem. !Kam mo luk! Iven long taem blong jalenj ia wetem KOVID-19, kam joenem mifala onlaen. Mit wetem ol misinari blong mifala onlaen. !Faenemaot yuwan se Jos ia i abaot wanem! Taem we hadtaem ia i pas, mitim mifala insaed long hom blong mifala, mo long ol ples blong wosip!
!Mifala i stap invaetem yu blong kam mo help! Kam mo givim seves wetem mifala, blong givhan long ol pikinini blong God, blong stap folem ol step blong Sevya mo mekem wol ia i kam wan moa gud ples.
Kam mo Kam Pat! Bae yu mekem mifala i kam strong moa. Mo bae yu kam gud moa, kaen moa, mo hapi moa tu. Fet blong yu bae i gro bigwan moa mo i stanap strong moa—bae yu gat moa paoa blong stanap agensem ol hadtaem mo ol tes blong laef we yu no ting long olgeta.
!Mo olsem wanem nao bae yu stat? I gat plante wei we hemia i posibol.
Mi stap invaetem yu blong ridim Buk blong Momon. Sapos yu no gat wan kopi, yu save ridim long ChurchofJesusChrist.org4 o daonlodem ap blong Buk blong Momon. Buk blong Momon i wan nara testeman blong Jisas Kraes mo i wan kampani blong Ol mo Niu Testeman. Mifala i stap lavem evriwan long ol tabu skripja ia mo stap lan aot long olgeta.
Mifala i stap invaetem yufala blong spendem sam taem long ComeuntoChrist.org blong faenemaot wanem nao ol memba blong Jos oli stap tijim mo bilivim.
Invaetem ol misinari blong visitim yu onlaen o long hom blong yu taem i posibol—oli gat wan mesej blong hop mo hiling. Ol misinari ia oli ol impoten boe mo gel we oli stap givim seves long plante ples raon long wol mo wetem tae mo mane blong olgeta nomo.
Insaed long Jos Ia blong Jisas Kraes, bae yu faenem wan famli blong ol pipol we oli no defren tumas long yu. Bae yu faenem ol pipol we oli nidim help blong yu, mo oli wantem help taem yu traehad blong kam bes blong yuwan—man o woman ia we God i krietem yu blong kam.
Sevya I Akseptem Evriwan
Maet bae yu tingting: “Mi bin mekem ol mistek long laef blong mi. Mi no sua se bae mi save filim se mi blong Jos Ia blong Jisas Kraes. God bae i no save intres long wan olsem mi.”
Jisas we i Kraes, nomata Hem i “king blong olgeta king,”5 i Mesaea, “Pikinini blong God we i stap laef,”6 Hem i kea bigwan abaot wanwan mo evri pikinini blong God. Hem i kea, i nomata posisen blong man o woman—se hem i pua o rij, se hem i no stret evriwan, mo i pruvum se hem i stret. Long taem blong laef blong Hem long wol ia, Sevya i bin givhan long evriwan: long olgeta we oli hapi mo gat evri ting, long olgeta we oli harem nogud mo oli lus, long olgeta we oli nomo gat hop. Plante taem, ol pipol we Hem i wok mo givhan blong olgeta, oli no ol pipol we oli haeman, oli naes o gat fulap mane. Plante taem, ol pipol we Hem i bin leftemap, oli no gat samting blong givimbak long hem, be oli gat fasin blong talem tangkyu, wan hambol hat, mo oli wantem gat fet.
Sapos Jisas i bin spendem laef blong Hem long wol blong givhan “long olgeta ia we oli moa daon,”7 ?bae Hem i no lavem olgeta tedei? ?I no gat wan ples long Jos ia blong evriwan long ol pikinini blong God? Iven olgeta we oli filim se oli no klin inaf, oli fogetem olgeta o oli stap olgetawan?
I no gat wan mak ia blong stret fasin we yu mas kasem blong save kwalifae from gladhat ia blong God. Ol prea blong yu, oli no nid blong oli laod, o oli gat flas toktok, o mas gat stret grama blong i save kasem heven.
Blong talem tru, God i no gat fevret man8—ol samting we wol i tekem se i impoten, oli nating long Hem. Hem i save hat blong yu, mo Hem i lavem yu i nomata long taetol blong yu, mane blong yu, o namba blong man we oli stap folem yu long Instagram.
Taem yumi stap tanem hat blong yumi long Papa blong yumi long Heven, mo kam kolosap long Hem, bae yumi filim se Hem i stap kam kolosap long yumi.9
Yumi evriwan i ol stret spirit pikinini blong Hem.
Iven olgeta we oli sakemaot Hem.
Iven olgeta ia, we olsem ol stronghed pikinini, we oli no wantem folem rul, oli kam kros wetem God mo Jos blong Hem, oli pakemap basket blong olgeta, mo oli aot tru long doa mo taltalemaot se oli stap ronwe mo neva stap kambak.
Taem wan pikinini i ronwe long hom, maet hem i no luk papa mo mama we i wari we oli stap luk tru long windo. Wetem sofsof hat, oli luk boe o gel blong olgeta i go—oli hop se pikinini blong olgeta bae i lanem samting aot long eksperiens ia, mo maet oli luk laef wetem ol niu ae—mo long en, kambak hom.
I semmak wetem Papa long Heven we i gat lav. Hem i stap wet blong olgeta oli kambak.
Sevya blong yu, wetem wota blong ae blong lav mo sore, i stap wet se yu kambak. Iven taem yu filim se yu stap longwe long God, bambae Hem i luk yu; bae Hem i gat lav mo sore long yu mo bae i ron blong holem yu long han blong Hem.10
Kam mo kam pat.
God I Letem Yumi Lan Aot long Ol Mistek blong Yumi
Yumi ol man we i stap wokbaot long rod ia blong laef ia, we yumi stap lukaotem mining mo bigfala trutok. Plante taem, yumi stap luk nomo rod we i stap long fored—yumi no save luk we ol kona long rod oli go wea. Papa blong yumi long Heven i no givim evri ansa long yumi. Hem i wantem luk yumi faenemaot plante samting yumiwan nomo. Hem i wantem yumi biliv—iven taem we i had blong mekem olsem.
Hem i wantem yumi blong stretem solda blong yumi, mo save mekem desisen—gat bakbun i strong—mo tekem wan nara step i go fored.
Hemia i wei blong lanem samting mo groap.
?Yu yu rili wantem se bae oli talemaot evri samting long yu long ditel? ?Yu yu rili wantem se bae oli talemaot evri ansa long kwestin? ?Evri rod bae i stap long map?
Mi biliv se plante long yumi bae i taed kwik long kaen heven ia we i lidim evri ditel blong laef. Yumi lanem ol moa impoten lesen blong laef tru long ol eksperiens. Taem yumi lanem samting aot long ol mistek blong yumi. Tru long fasin blong sakem sin, mo luksave, yumiwan nomo, se “nogud fasin i neva bin fasin blong stap glad.”11
Jisas Kraes, Pikinini blong God, i bin ded blong mekem se ol mistek blong yumi bae oli no save blokem rod blong yumi mo stopem gud progres blong yumi. From Hem, yumi save sakem sin, mo ol mistek blong yumi oli save kam ol ston blong wokbaot blong kasem hae glori.
Yu no nid blong wokbaot long rod ia yuwan. Papa blong yumi long Heven i no lego yumi stap wokbaot olbaot long tudak.
From hemia nao, long spring blong 1820, Hem i bin kamaot wetem Pikinini blong Hem, Jisas Kraes, long wan yang man, Josef Smit.
!Tingbaot hemia blong wan smol taem! !God blong yunives ia, i kamaot long man!
Hemia i bin faswan long plante nara taem we Josef i bin luk God mo ol narawan long heven. Plante long ol toktok we ol tabu pipol ia oli talem long hem, oli stap long ol skripja blong Jos Ia blong Jisas Kraes blong Ol Lata-dei Sent. Yufala i save luk olgeta. Eniwan i save ridim olgeta, mo lan, blong olgetawan, mesej we God i gat blong yumi tedei.
Mifala i stap invaetem yufala blong stadi long olgeta yufalawan.
Josef Smit i bin yang taem hem i bin kasem ol revelesen ia. Plante long olgeta oli kam bifo hem i kasem 30 yia.12 Hem i no bin gat tumas eksperiens, mo long sam pipol, maet i luk se hem i no kwalifae inaf blong stap olsem profet blong Lod.
Be yet, Lod i bin singaotem hem nomo—i folem wan paten we yumi faenem truaot long ol tabu skripja.
God i no bin wantem blong faenem wan man we i stret evriwan blong putumbak gospel ia.
Sapos Hem i bin mekem, bae Hem i stap wet yet.
Josef i no bin olsem yu mo mi. I nomata se hem i bin mekem ol mistek, God i bin yusum Josef blong mekem ol bigfala stamba tingting blong Hem.
Presiden Thomas S. Monson, plante taem i bin ripitim ol toktok blong advaes ia: “Huia Lod i singaotem, Lod i mekem hem i kwalifae.”13
Aposol Pol i toktok wetem Ol Sent long Korin se: “Ol brata mo sista. Yufala i traem tingbaot. ?Taem we God i singaot yufala, yufala i wanem man? I no gat plante long yufala, we long fes blong ol man, yufala i waes man, no yufala i gat paoa, no yufala i haeman.”14
God i stap yusum olgeta we oli no strong mo olgeta we oli tok stret blong mekem ol stamba tingting blong Hem oli kamtru. Trutok ia, i stap olsem wan testemoni se hemia i paoa blong God, i no hemia blong man, we i stap mekem wok blong Hem long wol i kamtru.15
Lisin Gud long Hem, Folem Hem
Taem we God i bin kamaot long Josef Smit, Hem i presentem Pikinini blong Hem, Jisas Kraes, mo talem: “!Lisin gud long Hem!”16
Josef i bin spendem haf laef blong hem we i stap blong lisin gud long Hem mo stap folem Hem.
Olsem wetem Josef, wok blong yumi olsem disaepol i stat wetem desisen blong yumi blong harem mo folem Sevya Jisas Kraes.
Sapos yu wantem blong stap folem Hem, pulum fet blong yu i kam wan ples, mo tekem kros blong Hem long yu.
Bae yu faenem se yu blong Jos blong Hem—wan ples we i gud mo evriwan i welkam, wan ples we yu save joen long bigfala wok ia blong stap disaepol mo gat hapines.
Hem i hop blong mi se, long 200 yia ia blong Fas Visen, taem yumi stap lukbak mo lan abaot Restoresen blong Jos Ia blong Jisas Kraes, bambae yumi luksave se hemia i no jes wan taem long histri. Yu mo mi i plei wan impoten pat long bigfala stori ia we i stap gohed.
?Nao, wanem i pat blong yu mo mi?
Hem i blong lan abaot Jisas Kraes. Blong stadi long ol toktok blong Hem. Blong harem Hem mo folem Hem taem yumi wok strong long bigfala wok ia. !Mi stap invaetem yufala blong kam mo kam pat!
Yu no nid blong yu stret evriwan. Yu nid nomo blong wantem developem bilif blong yu mo kam kolosap long Hem evri dei.
Pat blong yumi i blong lavem mo wok blong God, mo lavem mo wok blong ol pikinini blong God.
Taem yu mekem olsem, bae God i save raonem yu wetem lav, glad blong Hem mo soem rod tru long laef ia, iven taem ol situesen oli had mo plante moa.
Abaot hemia, mi testifae mo livim blesing blong mi wetem yufala wetem bigfala tangkyu mo lav long wanwan long yufala, long tabu nem blong Sevya blong yumi, we i Masta blong yumi—long nem blong Jisas Kraes, amen.