Hosana Singaot
Naoia, ol dia brata mo sista. Taem yumi stap makem Fas Visen blong Josef Smit, we hem i luk Papa mo Pikinini, mifala i filim se i stret blong stap glad tugeta taem yumi tekpat long Hosana Singaot.
Tabu singaot ia, i bin hapen faswan long dispensesen ia long dedikesen blong Ketlan Tempol, long 27 Maj 1836. Naoia, oli mekem long dedikesen blong wanwan tempol. Hem i wan tabu ona long Papa mo Pikinini, i simbol blong wanem evriwan i bin mekem taem we Sevya i bin kam insaed long Jerusalem wetem viktri. Hem i talem tru bakegen wanem we yangfala Josef i bin eksperiensem long dei ia, insaed long Tabu Bus—we i soem se Papa mo Pikinini, Tufala i tufala Man we Tufala i gat glori, we yumi stap wosipim mo presem.
Bae mi soem naoia olsem wanem oli mekem Hosana Singaot. Taem mi mekem, mi stap invaetem ol fren blong yumi, long media, blong tritim spesel ona ia wetem tabu fasin mo hae respek.
Wanwan long yumi we i tekpat, i tekem wan klin waet hankijif, i holem wan kona, mo i wevem mo semtaem talem tugeta, “Hosana, Hosana, Hosana long God mo long Smol Sipsip,” ripitim tri taem, folem wetem “Amen, Amen mo Amen.” Be sapos yu no gat wan waet hankijif, bae yu save sakem han blong yu nomo.
Ol brata mo sista. Naoia, mi stap invaetem yufala blong stanap mo tekpat long Hosana Singaot ia, folem wetem “Hosana Antem” mo afta bae oli singsing “Spirit Olsem Faea” long Inglis.1
Taem kondakta i mekem saen, plis joenem mifala blong singsing “Spirit Olsem Faea.”
Hosana, Hosana, Hosana long God mo Smol Sipsip.
Hosana, Hosana, Hosana long God mo Smol Sipsip.
Hosana, Hosana, Hosana long God mo Smol Sipsip.
Amen, Amen, mo Amen.