OI Prea blong Fet
Taem yumi stap prea wetem fet, bae yumi stap olsem wan pat insaed we i mas stap insaed long wok blong Lod taem Hem i stap mekem wol ia i rere from Seken Kaming blong Hem.
Prea blong Elda Maynes long stat blong sesen blong fas sesen blong jeneral konfrens ia, i gat ansa. Insperesen i bin kam long yumi tru long ol gudfala mesej mo naes miusik. Promes ia, blong Presiden Russel M. Nelson se bae konfrens ia bae i nambawan tru mo bae yumi no save fogetem, i stat blong i kamtru finis.
Presiden Nelson i putum se yia ia i “wan taem blong makem 200 yia stat long taem we God Papa mo Pikinini we Hem i Lavem Tumas, Jisas Kraes, Tufala i bin kamkamaot long Josef Smit long wan visen.” Presiden Nelson i bin invaetem yumi blong mekem wan plan blong yumiwan blong mekem yumi rere from histri konfrens ia, mo hem i talem se hemia bae i wan “mak blong jenis insaed long histri blong Jos, mo pat blong yumi, i impoten.” 1
Olsem mi, maet yu bin harem mesej ia mo yu bin askem yuwan: ?Long wanem wei nao pat blong mi i impoten?” Maet yu bin ridim mo stap prea abaot ol taem ia blong Restoresen. Maet, i bitim bifo, yu bin ridim ol stori blong olgeta ia plante taem finis, taem we God Papa i bin presentem Pikinini blong Hem we Hem i Lavem Tumas. Maet yu bin rid abaot ol taem ia we Sevya i bin toktok long ol pikinini blong Papa blong yumi long Heven. Mi save se mi bin mekem evri samting ia mo moa.
Mi faenem ol refrens, long riding blong mi, long saed blong prishud blong God, mo stat blong ol dispensesen. Tingting blong mi i stap daon taem mi luksave se hamas mi rere miwan from konfrens ia, i wan mak blong jenis insaed long histri blong miwan. Mi bin filim ol jenis insaed long hat blong mi. Mi filim niufala tangkyu. Mi filim, wetem glad, se oli invaetem mi blong tekpat long selebresen ia blong Restoresen ia we i stap gogohed.
Mi traem tingting long wanem ol narawan oli stap filim, from se oli rere gud; oli moa glad, gat moa hop, mo gat moa strong tingting blong wok long eni ples we Lod i nidim olgeta blong wok long hem.
Ol bigfala taem we yumi stap ona, oli stat blong las dispensesen ia we oli talem long profesi, taem ia we Lod i stap mekem rere Jos blong Hem mo ol pipol blong Hem, olgeta ia we oli stap tekem nem blong Hem, blong akseptem Hem. Olsem pat blong wok blong yumi rere blong Hem i kam, bambae Hem i leftemap wanwan long yumi, blong mekem se yumi save kam antap long ol jalenj mo janis long saed blong spirit we i no olsem eni samting we yumi bin luk long histri blong wol ia.
Long Septemba 1840, Profet Josef Smit wetem ol kaonsela blong hem long Fas Presidensi oli bin talemaot toktok ia: “Wok blong Lod long ol las dei ia, i wan bigbigfala wok, mo i bitim wanem we man long wol ia bae oli andastanem. Ol glori blong hem, toktok i no save tokbaot, mo i bigwan tumas. Hem i stamba toktok we i stap mekem hat blong ol profet mo ol stret mo gud man i laef, hemia stat long kriesen blong wol i kam i gotru long evri jeneresen we oli win i kam kasem tedei; mo i tru, i dispensesen blong taem blong evri wok blong God i kamtru; taem ia we evri samting we oli blong Kraes Jisas, nomata oli stap long heven o long wol, bae oli kam tugeta long Hem, i taem we bae oli putumbak evri samting, olsem we evri tabu profet oli talem, stat long stat blong wol; from se, tru long hemia, ol promes we God i mekem long ol papa bifo i kam, bae oli hapen wetem glori, mo semtaem bae yumi luk paoa blong Hem we I Hae Evriwan i kamaot we i bigwan, i gat glori mo i nambawan.”
Oli gohed blong talem: “Mifala i filim se yumi rere blong go fored mo joenem ol paoa blong yumi blong bildimap Kingdom ia, mo stanemap Prishud we i fulwan mo gat glori. Wok ia we oli mas mekem i hapen long ol las dei i wan bigfala wok evriwan, mo bae i nidim evri aksen blong paoa, skil, talen, mo eni samting we Ol Sent oli save mekem, blong mekem se wok ia i rol i go wetem bigfala glori mo paoa ia we profet Daniel i bin tokbaot [luk long Daniel 2:34–35, 44–45]; mo bae i nidim blong Ol Sent oli kam wanples, blong mekem ol kaen wok ia we oli bigwan olsem oli hapen.” 2
Plante long ol spesifik samting blong wanem bae yumi mekem mo wetaem bae yumi mekem long Restoresen ia we i stap gohed, Lod i no talemaot yet. Be yet, Fas Presidensi, iven long ol fas dei ia, oli bin save se wok ia blong Lod i putum i stap long fored blong yumi, i longwan mo i bigwan olsem wanem. Hemia samfala eksampol blong wanem we yumi save finis se bae i tekem ples:
Tru ol Ol Sent, Yes, Lod bae i givim presen ia we i Gospel blong Hem i go long “evri kantri, famli, lanwis mo pipol.” 3 Teknoloji mo ol merikel bae oli gohed blong plei wan pat—semmak olsem wanwan “man blong pulum man” 4 we i givhan wetem paoa mo fet we i kam antap moa.
Yumi, olsem wan pipol, bae i yunaet moa long medel blong faet. Bae yumi kam tugeta, long paoa long saed blong spirit, blong ol grup mo ol famli we oli fulap long laet ia blong gospel.
Iven, wan wol ia we i no biliv bae i luksave Jos Ia blong Jisas Kraes Ia blong Ol Lata-dei Sent mo luksave paoa blong God we i stap long hem. Ol fetful mo strong disaepol bae oli no fraet, oli gat tingting i stap daon mo nomo haed blong tekem nem blong Kraes long evri dei laef blong olgeta.
?Olsem wanem nao, wanwan long yumi i save wok wetem wan fasin olsem we i strong evriwan mo i bigwan? Presiden Nelson i bin tijim yumi olsem wanem blong kam antap long paoa long saed blong spirit. Taem yumi tekem se, fasin blong sakem sin, i wan janis we yumi tekem wetem glad from yumi gat fet we i stap gro se Jisas Hem I Kraes; taem yumi andastanem mo bilivim se Papa long Heven i harem evriwan long ol prea blong yumi; taem we yumi traehad blong obei mo laef folem ol komanmen, yumi stap gro long paoa ia blong yumi blong gohed blong kasem revelesen we i stap gohed. Tabu Spirit bae i kampani blong yumi oltaem. Wan filing blong laet i stap wetem yumi iven taem we wol ia raon long yumi i stap kam tudak moa.
Josef Smit i wan eksampol blong hao blong groap long paoa ia long saed blong spirit. Hem i bin soem long yumi se prea blong fet i ki ia blong revelesen we i kam long God. Hem i bin prea wetem fet, we i bilivim se God Papa bae i ansarem ol prea blong hem. Hem i bin prea wetem fet, se blong stap bilif long Jisas Kraes nomo bae hem i save kam fri long filing ia se hem i rong from ol sin blong hem. Mo hem i bin prea wetem fet, i bin biliv se hem i nidim blong faenem tru Jos blong Jisas Kraes blong kasem fogivnes ia.
Truaot long seves blong hem olsem profet, Josef Smit i bin yusum ol prea blong fet blong kasem revelesen we i gogohed. Tedei, taem yumi fesem ol jalenj, mo ol narawan we bae oli kam yet, yumi tu, i nidim blong praktisim semfala paten ia. Presiden Brigham Yang i bin talem: “Mi no save eni nara wei blong Ol Lata-dei Sent, be blong evri win we i kamaot long maot blong i wan prea long God blong Hem i soem rod mo daerektem ol pipol blong Hem.” 5
Ol toktok ia, long sakramen prea, oli mas tokbaot evri dei laef blong yumi: “Oltaem tingbaot Hem.” “Hem” i tokbaot Jisas Kraes. Ol toktok afta, “mo obei ol komanmen blong Hem,” i talem wanem i minim blong stap tingbaot Hem. 6 Taem yumi stap tingbaot Jisas Kraes oltaem, yumi save askem long wan saelen prea: “?Wanem nao Hem i wantem mi blong mekem?”
Ol kaen prea olsem, we oli givim wetem fet long Jisas Kraes, i bin hapen long las dispensesen ia. Mo bae i stap long hat blong wanem pat wanwan long yumi bae i plei insaed long wok ia we i stap gogohed blong hapen. Mi bin faenem, olsem yufala, ol gudfala eksampol blong ol kaen prea ia.
Faswan, Josef Smit. Hem i bin askem wetem fet we i olsem hemia blong wan pikinini wanem we Lod i wantem hem blong mekem. Ansa blong hem, i jenisim histri blong wol.
Long mi, wan moa impoten lesen we i kamaot long wanem Josef i bin mekem blong fesem atak blong Setan, i taem Josef i nildaon blong prea.
Mi save, wetem eksperiens, se Setan mo ol wokman blong Hem oli traem blong mekem yumi filim se yumi no mas prea. Taem we Josef Smit i bin yusum evri paoa blong hem blong singaot long God blong mekem hem i fri long paoa ia we i bin traem blong fasem hem, prea blong hem blong kasem help i gat ansa, mo Papa long Heven mo Jisas Kraes, Tufala i kamkamaot.
Atak blong Setan blong traem stopem stat blong Kambak blong Gospel i bin strong ia from se prea blong Josef i bin impoten tumas. Yu mo mi, i gat wan smol pat blong plei long wok we i gogohed, blong putumbak gospel. Yet, enemi blong Restoresen bae i traem blong stopem yumi blong stap prea. Eksampol blong fet blong Josef mo strong tingting blong hem, i save mekem yumi kam strong moa long ol wok we yumi wantem mekem. Hemia i wan long ol plante risen from wanem, insaed long ol prea blong mi, mi talem tangkyu long Papa long Heven from Profet Josef.
Inos, insaed long Buk blong Momon, i wan nara eksampol long prea blong fet blong mi taem mi stap traem blong mekem pat blong mi insaed long wok blong Restoresen ia we i stap gogohed. Nomata wanem pat blong yu, yu save yusum hem olsem tija blong tingting blong yu.
Olsem Josef, Inos i bin prea wetem fet. Hem i bin tokbaot eksperiens blong hem long wei ia:
“Mo sol blong mi i bin hanggri; mo mi bin nildaon long fored blong Meka blong mi, mo mi bin prea long hem wetem wan strongfala prea mo bin askem hem strong from sol blong miwan; mo long fuldei mi bin prea long hem; yes, mo taem we naet i bin kam mi bin stap blong leftemap voes blong mi laod mekem se i bin kasem ol heven.
“Mo wan voes i bin kam long mi, i talem se: ‘Inos, mi mi fogivim ol sin blong yu, mo bae mi blesem yu.’
“Mo mi, Inos, mi bin save we God i no save giaman; taswe, hem i bin tekemaot ol rong blong mi.
“Mo mi bin talem se: Lod, ?yu mekem samting ia olsem wanem?
“Mo hem i bin talem long mi se: ‘From fet blong yu long Kraes, we yu yu neva bin harem o luk hem. Mo plante yia bae i pas i go bifo hem i soemaot hemwan long bodi blong mit mo bun; taswe, yu go stat, fet blong yu i bin mekem yu klin.” 7
Lesen ia we i bin blesem mi, i stap long ol toktok ia: “From fet blong yu long Kraes, we yu yu neva bin harem o luk hem.”
Josef i bin gat fet long Kraes blong go long bus blong ol tri, mo tu, blong prea blong kam fri long ol paoa blong Setan. Hem i no bin luk yet Papa mo Pikinini, be hem i bin prea wetem fet, wetem evri paoa blong hat blong hem.
Eksperiens ia blong Inos i bin tijim mi semfala bigfala lesen ia. Taem mi prea wetem fet, mi gat Sevya olsem loya blong mi we i toktok long Papa, mo mi save filim se prea blong mi i kasem heven. Ol ansa oli kam. Oli kasem blesing: I gat pis mo glad, iven long ol hadtaem.
Mi tingbaot se, olsem niufala memba blong Kworom blong Olgeta Twelef Aposol, mi bin nildaon long prea wetem Elda David B. Haight. Hem i bin gat yia we mi gat naoia, wetem ol jalenj we miwan mi stap fesem naoia. Mi tingbaot voes blong hem taem hem i stap prea. Mi no bin openem ol ae blong mi blong luk, be i saon olsem we hem i bin stap smael. Hem i toktok wetem Papa long Heven wetem glad long voes blong hem.
Mi save harem, long maen blong mi, hapines taem hem i bin talem: “Long nem blong Jisas Kraes.” Long mi, i saon olsem we Elda Haight i filim se Sevya i akseptem, long tetaem ia, mesej ia we hem i bin prea from. Mo mi sua se bae oli akseptem wetem wan smael.
Paoa blong yumi blong plei wan bigfala impoten pat long bigfala wok ia blong Restoresen we i gogohed, bae i gohed taem yumi stap groap long fet blong yumi long Jisas Kraes olsem Sevya mo groap long fet blong yumi long Papa long Heven olsem Papa blong yumi we i gat lav. Taem yumi stap prea wetem fet, bae yumi stap olsem wan pat insaed we i mas stap insaed long wok blong Lod taem Hem i stap mekem wol ia i rere from Seken Kaming blong Hem. Mi prea se bae yumi evriwan i faenem glad ia blong mekem wok we Hem i stap invaetem wanwan long yumi blong mekem.
Mi testifae se Jisas Kraes i stap laef. Hemia i Jos mo kingdom blong Hem long wol ia. Josef Smit hem i profet blong Restoresen ia. Presiden Russel M. Nelson i profet blong Lod long wol tedei. Hem i stap holem evri ki blong prishud insaed long Jos Ia blong Jisas Kraes Ia blong Ol Lata-dei Sent. Long nem blong Jisas Kraes, amen.