Wan Gudfala Fandesen Agensem Taem we I Stap Kam
Long ol yia we oli stap kam, bae ol niufala wok ia we yumi mekem long Sol Lek Tempol, bae oli muvum yumi mo givim insperesen long yumi.
Histri blong Sol Lek Tempol
Bae yumi gobak i go long wan hot aftenun long 24 Julae 1847, samples 2 klok aftenun. Afta wan wokbaot we i had we i had, wetem 148 memba blong Jos we oli pat blong fas grup blong go Wes, Brigham Yang, we tetaem ia i Presiden blong Kworom blong Olgeta Twelef Aposol, i bin sik mo i no strong from i kasem maonten fiva, nao hem i go insaed long Sol Lek Vale.
Tu dei afta, taem hem i stap kam oraet long sik blong hem, Brigham Yang i bin lidim sam memba blong Kworom blong Olgeta Twelef Aposol mo sam moa pipol blong go lukluk ples. Wiliam Kleiton i raetem: “Samples 1.2 kilometa long Not blong kamp, mifala i kasem wan naes flat ples olsem tebol, i level gud o i gat smol hil i go daon long Wes saed.” 1
Taem oli luklukgud ples ia wetem grup, Brigham Yang i stop wantaem, mo i stikim stik blong hem long graon, i singaot se “Ples ia nao bae Tempol blong God blong yumi i stanap long hem.” Wan long ol kompanion blong hem, Elda Wilfod Wudrof i talem se toktok ia i “go tru long hem olsem laetning,” mo hem i pusum wan branj i go long graon blong makem stret ples ia we Presiden Yang i mekem wetem stik blong hem. Oli jusum 16 hekta blong yusum long tempol, mo oli bin disaed se taon ia, bae oli putum i “skwea gud long Not, & Saot, Is & Wes” wetem tempol we i stap long medel blong ples ia. 2
Long Epril 1851 jeneral konfrens, ol memba blong Jos, evriwan i bin vot blong sapotem wan mosen blong bildim wan tempol “we i tekem nem blong Lod.” 3 Tu yia afta, long 14 Febwari 1853, oli dediketem ples ia tru long Hiba J. Kimbol, long wan pablik seremoni we plante taosen Sent oli kam long hem, mo oli bin brekem graon blong statem fandesen blong tempol. Sam manis afta, long 6 Epril, ol putum ol bigfala hevi konaston blong tempol, mo oli dediketem wetem ol bigfala seremoni we i gat wan kala gad mo ban mo wan maj we ol lida blong Jos oli bin lidim stat long olfala tabenakol i go kasem graon blong tempol; ples ia oli givim ol toktok mo prea long wanwan long ol konaston ia. 4
Long seremoni blong brekem graon, Presiden Yang i talem bakegen se hem i bin gat wan visen taem hem i purumbut long graon ia taem oli bin stap lukluk raon long vale ia, mo i talem: “mi bin save long tetaem ia, olsem mi save tedei, se hemia i graon ia blong stanemap wan tempol long hem—hemia mi luk long fored blong mi.” 5
Ten yia afta, Brigham Yang i givim tingting blong wan profet long Oktoba 1863 Jeneral Konfrens: “Mi wantem luk se, tempol ia, bae oli bildim long wan wei we bae i stap strong tru long mileniom. Hemia i no wan tempol ia nomo we bae yumi bildim; bae i gat plante handred long olgeta we bae oli bildim mo dediketem i go long Lod. Tempol ia, bae oli save long hem olsem fasfala tempol we ol Lata-dei Sent oli bildim antap long ol bigfala hil. … Mi wantem tempol ia, i stanap olsem wan hae bilding we i soemaot bilif, strong fasin blong gogohed, mo wok blong olgeta Sent blong God long ol bigfala hil.” 6
Taem mi lukbak long sot histri ia, i mekem mi sapraes long lidasip blong Brigham Yang—faswan, we i talem stret se, folem hamas i posibol, mo wetem ol wei blong bildim haos long tetaem mo ples, i talem se bae oli bildim Sol Lek Tempol long wan wei we bae i stap truaot long Mileniom mo, nambatu, i talem profesi abaot hamas moa tempol bae i stap raon long wol, we namba i go kasem ol handred.
Wok blong Mekem Sol Lek Tempol I Niu Bakegen
Olsem Brigham Yang, ol profet blong yumi tedei oli lukluk ova long Sol Lek Tempol mo evri narawan wetem bigfala kea. Truaot long ol yia, Fas Presidensi i bin, wanwan taem, kaonsel wetem Prisaeding Bisoprik long meksua se fandesen blong Sol Lek Tempol i strong nomo i stap. Taem mi bin stap long Prisaeding Bisoprik, long rikwes blong Fas Presidensi, mifala i bin luklukbak long bilding blong Sol Lek Tempol, mo insaed tu oli bin skelem mo yusum ol niufala tul blong skelem ol etkwek mo fasin blong bildim haos.
Hemia sam pat blong riviu we oli bin givim long Fas Presidensi long tetaem ia: “Folem plan mo wei we oli bildim Sol Lek Tempol, oli bin yusum bes enjinia, man blong wok, mo samting blong bildim haos ia, wetem ol fenija mo nara risos we i bin stap long tetaem ia. Stat long dedikesen blong hem long 1893, tempol i bin stanap strong mo i stap olsem wan saen blong bilif mo hop, mo tu olsem wan laet long ol pipol. Oli bin lukaot gud blong mekem tempol ia i open, i klin, mo oli lukaotgud long hem i stap. Granit ston aotsaed mo ol bim insaed long floa, mo hemia we oli sapot long saed, oli stap long gud kondisen. Ol niufala stadi oli konfemem se ples ia we Brigham Yang i bin jusum blong tempol i stap long hem, i gat gudfala graon, mo i save holemtaet gud bilding.” 7
En blong riviu i talem se i gat ol nomol wok blong fiksim mo mekem tempol i gud moa blong kipim tempol i stap niu mo i apdeit, mo hemia i tekem tu ol wok blong mekem long aotsaed vranda, mo ol graon, mo ol lektrik sistem we i nomo fit mo ol ples blong mekem baptaes. Be tu, oli bin rekomendem tu se i mas gat wan stadi we i seperet mo i fulwan, blong mekem tempol stat long fandesen i go antap, i strong moa agensem etkwek.
Tempol Fandesen
Olsem we yufala i save tingbaot, Presiden Brigham Yang hemwan i bin wok, long evri ditel blong bilding blong fasfala tempol fandesen, we i bin helpem gud wok blong tempol ia stat long taem we hem i bin finis, 127 yia i pas nao. Ol niufala wok we oli putum i go, i blong tempol i fesem etkwek, bae i yusum teknoloji ia we wan nara fandesen i fas long hemia we i stap, we oli no bin tingting long hemia bifo. Hemia oli tekem se i las teknik, we i top enjinering wantaem blong proteksen agensem etkwek.
Teknoloji ia, we i jes kamaot, i stat long fandesen blong tempol stret, mo i protektem hem agensem damej we etkwek i save mekem. Blong talem stret, wanem i raonem bae i mekem tempol i strong moa blong stanap strong, iven sapos graon mo ol samting raon long hem oli gotru long wan bigfala etkwek.
Blong mekem tempol i kam niu bakegen, bae oli yusum teknoloji ia tu we Fas Presidensi i bin anaonsem long las yia. Anda long daereksen blong Prisaeding Bisoprik, ol wok ia oli bin stat sam manis i pas, long Jenuware 2020. Oli ting se bae i tekem fo yia blong evri wok i finis.
Meksua se Yu Gat Wan Fandesen blong Yuwan
Taem bae mi stap lukluk ol nekis fo yia blong laef blong naes, hae mo sapraes Tempol ia long Sol Lek, mi gat visen se hem i moa olsem wan taem blong kam niu bakegen be i no wan taem blong klosem doa. Long wan semmak wei, yumi save askem yumiwan: “?Olsem wanem nao, bigfala wok ia blong mekem Sol Lek Tempol ia i kam niu bakegen, i givim insperesen long yumi blong go tru long wan rod blong kam niu bakegen, blong bildimbak yumi, blong bon bakegen, blong kasem niu paoa, o putumbakyumi long stret rod long saed blong spirit?”
Spos yumi luk insaed long yumiwan bakegen, bae yumi faenem se, yumi tu, wetem ol famli, i nidim blong oli klinim gud yumi, mekem yumi kam niu bakegen, !mekem yumi kam strong moa agensem etkwek! Yumi save statem kaen rod ia taem yumi askem:
“?Fandesen blong mi i luk olsem wanem?”
“?Wanem i stap insaed long ol tik, strong konaston we oli pat blong fandesen blong miwan, we testemoni blong mi i stanap long hem?”
“?Wanem nao oli ol fandesen samting we oli mekem fasin blong mi long saed blong spirit mo filing, we bae i letem mi mo famli blong mi blong stap strong mo no muv, iven we bae i save stanap strong taem i gat ol taem we graon i muvmuv mo ples i rafraf, we bae i hapen long laef blong yumi?”
Ol taem ia, semmak long graon i muvmuv, plante taem i had blong talem fastaem se bae oli hapen, mo sam i strong mo sam i no strong—be yumi faet wetem ol kwestin, o ol tu tingting, yumi fesem hadtaem o samting we i kam agens, yumi wok blong karemaot ol harem nogud blong yumi wetem ol lida, ol memba, doktrin o polisi blong Jos. Bes samting blong difendem yumi agensem ol giaman ia i stap long fandesen blong yumi long saed blong spirit.
?Wanem oli ol konaston long saed blong spirit blong yumiwan o famli blong yumi? Maet oli simpol, klia mo impoten prinsipol blong laef folem gospel—famli prea, skripja stadi, mo Buk blong Momon, go long tempol, mo lanem gospel tru long Kam Folem Mi mo haos naet. Ol nara risos we oli stap help blong mekem fandesen blong yumi i strong moa oli Ol Toktok blong Bilif, famli ofisol toktok, mo “Kraes we I Laef.”
Long mi, ol prinsipol we oli stap long ol kwestin ia we oli toktok raon long ol, olsem pat blong kasem wan tempol rekomen, oli stap olsem wan strong poen blong wan fandesen long saed blong spirit—speseli ol fasfala go kwestin. Mi luk olgeta fo ia olsem ol konaston long saed blong spirit.
Yumi, i tru, i save gud ol kwestin ia, taem we Presiden Russel M. Nelson i bin ridim olgeta long yumi, wan afta wan, long las jeneral konfrens.
-
?Yu yu gat fet long, mo yu yu gat wan testemoni abaot God, Papa we I No Save Finis; abaot Pikinini blong Hem, Jisas Kraes; mo abaot Tabu Spirit?
-
?Yu yu gat wan testemoni abaot Atonmen blong Kraes mo wok blong Hem olsem Sevya mo Ridima?
-
?Yu yu gat wan testemoni long saed blong Kambak blong gospel blong Jisas Kraes?
-
?Yu yu sastenem Presiden blong Jos Ia blong Jisas Kraes blong Ol Lata-dei Sent olsem profet, sia mo reveleta, mo olsem wan man ia nomo long wol ia we i gat atoriti mo i gat raet blong yusum evri prishud ki? 8
?Yu yu save luk olsem wanem yu save tekem ol kwestin ia olsem ol impoten poen insaed long fandesen blong yuwan blong save helpem yu blong bildim mo mekem fandesen ia i kam strong moa? Pol i bin tijim Ol Man Efesas abaot wan jos we oli bin “[bildim antap long fandesen blong ol aposol mo ol profet, we Jisas Kraes Hemwan i jif konaston; mo tru long Hem, ful bilding i fas tugeta mo i gro i kam wan tabu tempol long Lod.]” 9
Wan long ol bigfala glad blong laef blong mi, i blong kam blong save mo kasem insperesen long ol memba blong Jos raon long wol we oli stap olsem ol laef eksampol blong bilif ia long Jisas Kraes mo gospel blong Hem. Oli bin bildim ol strong fandesen blong olgetawan, we i letem olgeta blong save fesem ol strong etkwek wetem wan andastaning we i no muv nomata long hat i soa mo ol sobodi.
Blong soemaot hemia long wan eksperiens blong miwan, mi bin toktok long wan fenerol blong wan naes, strong yang waef mo mama (we i wan famli blong mifala tu). Hem i wan futbol pleya we i strong insaed long Divisen 1 taem hem i bin mitim mo maredem studen hasban blong hem we i stadi blong kam dokta blong tut. Tufala i gat blesing blong gat wan gel we i waes gud. Sista ia i faet wetem strong tingting agensem ol defren kaen kansa blong sikis yia. I nomata long harem nogud we i stap oltaem long saed blong filim mo bodi, hem i bin trastem Papa blong hem long Heven, mo plante taem olgeta we oli stap folem hem long sosol media, oli stap ripitim toktok blong hem ia: “God i stap long evri ditel.”
Long wan long ol sosol media toktok blong hem, hem i raetem se wan i bin askem hem: “?Hao nao yu stil gat fet wetem evri harem nogud we oli raonem yu?” Hem i ansa wetem strong tingting: “From se fet i wanem i tekem mi tru long ol tudak taem ia. Blong gat fet i no minim se bae i no gat nogud samting i hapen. Blong gat fet, i letem mi blong biliv se i gat laet bakegen. Mo laet ia bae i saen i bigwan moa from se mi bin wokbaot tru long tudak. Nomata se hamas tudak mi bin witnesem ova long ol yia, mi bin witnesem plante laet moa. Mi bin luk ol merikel. Mi filim ol enjel oli stap. Mi kam blong save se Papa blong mi long Heven i bin stap karem mi long han blong hem. Bae mi no save gotru long ol samting ia sapos laef i bin isi. Fiuja blong laef ia, oli no save, be bilif blong mi, oli save. Sapos mi jusum blong no gat fet o bilif, nao mi jusum blong wokbaot long tudak nomo nao. From se sapos i no gat fet, i gat tudak nomo i stap.” 10
Testemoni blong hem, we i no muvmuv, long fet long Lod Jisas Kraes—tru long ol toktok mo aksen blong hem— i bin wan insperesen long ol narawan. Iven we bodi blong hem i no strong hem i bin leftemap ol narawan oli kam strong moa.
Mi stap tingting long plante memba blong jos, we oli faet olsem hem, we oli wokbaot evri dei wetem fet, oli traehad blong stap tru, mo stap ol strong disaepol blong Sevya blong yumi, Jisas Kraes. Oli lan abaot Kraes. Oli prij abaot Kraes. Oli traehad blong kam olsem Hem. I nomata se ol dei blong laef blong olgeta i fesem graon we i no muv o i seksek, oli save se fandesen blong olgeta i strong mo i no muv.
Oli olgeta sol we oli strong, we oli andastanem dip mining blong ol toktok ia “Ol tijing blong Jisas oli stamba blong yumi,” mo “ansa i stap finis long ol tijing blong Hem.” 11 Mi mi glad we i bitim mak, blong wokbaot wetem olgeta ia we oli rere long wan fandesen long saed blong spirit, we i inaf blong oli karem nem ia Ol Sent mo oli strong mo gat tras inaf blong fesem plante long ol hadtaem blong laef.
Mi no ting se mifala i save talem tumas hamas i impoten blong gat wan fandesen olsem long laef blong yumi wanwan. Iven taem oli smol, ol Praemeri pikinini blong yumi oli kasem tijing ia taem oli stap singsing long stret trutok ia:
Waes man i bildim haos blong hem antap long ston,
Mo ol ren i kam i folfoldaon. …
Mo ol ren i kamdaon, mo bigfala wota i ron.
Mo haos antap long ston i stanap strong. 12
Ol skripja oli kam sapotem strong fandesen doktrin ia. Sevya i bin tijim ol pipol long Ol Amerika se:
“Mo sapos yufala i mekem ol samting ia, oltaem bae mi blesem yufala, from yufala i bildim yufala long strong ston blong mi.
“Be huia long yufala we bae i mekem kolosap lelebet o moa long samting ia, oli no bildimap olgeta long strong ston blong mi, be oli bildimap olgeta antap long wan fandesen blong sanbij; mo taem we ren i foldaon, mo ol wota oli kam antap, mo ol win oli blo, mo kilim olgeta, bae oli foldaon, mo ol get blong hel oli open rere blong tekem olgeta.” 13
Hem i tru hop blong ol lida blong Jos se ol bigfala wok ia blong mekem Sol Lek Tempol i kam niu, bae i tekpat blong mekem tingting blong Brigham Yang i kamtru, blong “wantem luk se, tempol ia, bae oli bildim long wan wei we bae i stap strong tru long mileniom.” Long ol yia we oli stap kam, hem i prea blong mi se ol niufala wok ia we yumi mekem long Sol Lek Tempol, bae oli muvum yumi mo givim insperesen long yumi, olsem wanwan man, woman, mo famli, blong yumi tu—long parabol toktok— “yumi bildim yumi long wan wei we bae yumi stap strong tru long mileniom.”
Bae yumi mekem olsem taem yumi stap mekem wok we Aposol Pol i givim blong “stap putumgud plante gudgudfala samting blong [yumi], we i olsem fandesen blong laef blong [yumi], we i save stap strong oltaem, blong yumi] save kasem laef ya we i prapa wan.” 14 Hem i strong prea blong mi se, fandesen blong yumi long saed blong spirit bae i strong gud mo i no muvmuv, se testemoni blong yumi abaot Atonmen blong Jisas Kraes mo abaot rol blong Hem olsem Sevya mo Ridima blong yumi bae i kam, long yumi, olsem jif konaston blong yumi, we mi stap testifae abaot Hem long nem blong Hem, we i Jisas Kraes, amen.