Ol Promes blong Profet

I Kam long Elda Daniel G Hamilton

Eria Seventi

Long stat blong naesfala Epril 2020 Jeneral Konfrens, mi bin stap tingting abaot, wanem ia, mining blong ol toktok ia, Ol Promes blong Profet.

?Yu yu harem ol promes ia? ?Yu yu stap klemem ol promes ia?

Aot long tufala ves long Doktrin mo Ol Kavenan, yumi kasem plante lukluk insaed long Ol Promes blong Profet.

Faswan, Seksen 1:38 i stap tijim se, taem we ol wokman blong Lod, ol profet blong Hem, oli stap toktok, hem i semmak olsem we Lod Hemwan i stap toktok: “. . . nomata oli kamaot tru long voes blong miwan o tru long voes blong ol wokman blong mi, i semmak.”

Nambatu, Seksen 82:10 i ademap strong selestial komitmen ia: “Mi, Lod, mi mas mekem folem promes blong mi taem yufala i mekem wanem mi talem; be taem yufala i no mekem wanem we mi talem, yufala i no gat promes.”

I nomata we tufala ves ia oli bin kasem mo raetemdaon olsem ol seperet revelesen, sapos oli stap ridim tugeta, mesej blong tufala i tekem niu andastaning, mining mo paoa.

Sapos yumi putum tugeta olgeta prinsipol we oli stap long tufala ves ia, oli talem gud long yumi se, taem we ol Profet, Sia, mo Reveleta we oli stap laef oli talem, “Mi promesem,” nao Lod i mas mekem promes ia, sapos yumi stap laef folem wanem i nidim blong yumi laef folem blong mekem se ol blesing blong promes ia oli save hapen.¹

I gat ol trifala step ia blong stap klemem, Ol Promes blong Profet.

Yumi mas lukaotem ol spesifik promes ia.
Yumi mas luk wanem i nid blong mekem blong kwalifae from ol promes ia.
Yumi mas laef long wan wei blong save klemem ol promes ia.

I gat naen Promes blong Profet we oli bin kamaot long taem blong Epril 2020 Jeneral Konfrens.

Presiden Russell M. Nelson: “Mi bin promesem bifo se sapos yumi mekem bes blong yumi blong stretem nem blong Jos blong Lod, bae Hem i kapsaetem paoa mo blesing blong Hem long hed blong ol Lata-dei Sent, ol kaen blesing ia we yumi neva luk bifo. Mi mekem promes ia bakegen tedei.²”

“Mi promes se, taem yufala i putum moa taem long wok blong tempol mo famli histri, bae yu kasem moa paoa mo kam antap long fasin blong save harem mo lisin gud long Hem.”³

Insaed long semfala toktok ia, profet blong Lod i ademap: “?Wanem bae i hapen taem yu stap harem wetem moa tingting mo hat; lisin gud mo mekem folem wanem Sevya i bin talem, mo wanem Hem i stap talem long yu naoia tru long ol profet blong Hem? Mi promesem yufala se bae yufala i gat blesing blong kasem moa paoa blong fesem ol temtesen, ol hadtaem, mo ol wiknes. Mi promesem yufala ol merikel insaed long mared, famli rilesensip, mo evri dei wok. Mo mi promes se paoa blong yu blong filim glad, bae i kam antap moa, iven sapos ol trabol oli kam fulap long laef blong yu.”⁴

Taem hem i stap klosem konfrens, Presiden Nelson i livim promes ia i stap wetem yumi: “Mifala i stap prea se bae yufala i stat niu bakegen wetem tru hat mo tingting, blong harem, blong lisin gud, mo blong mekem folem ol toktok blong Sevya. Mi promes se, afta long hemia, fraet bae I go daon, mo fet i kam antap.”⁵

Elda Neil L. Andersen: “Mi promesem yu se taem yu luksave mo lukaotem wetem kea, ol taem ia long saed blong Spirit we i givim paoa long laef blong yu, plante moa bae i kam long yu.”⁶

Elda Ulisses Soares, taem hem i bin stap tokbaot Buk blong Momon, i talem: “Mi promes se, taem yu stap prea mo oltaem stadi long ol toktok blong buk ia, bae yu save tekpat long ol promes mo ol rij blesing insaed long laef blong yu. Mi talem tru bakegen promes ia we i stap long ol pej blong buk ia: se sapos ‘yufala i askem God, Papa we i no Save Finis, long nem blong Kraes, sapos ol samting ia oli no tru; mo sapos bae yufala i askem wetem wan tru hat, wetem wan tru tingting blong wantem save, wetem fet long Kraes,’ wetem sore, ‘bae hem i soemaot trutok blong ol samting ia long yufala, tru long paoa blong Tabu Spirit.’”⁷

Elda Ronald A Rasband: “Mi promes se taem yu folem ol kaonsel we i kam tru long insperesen blong dia profet blong yumi, Presiden Russell. M. Nelson, ol kaonsela blong hem, Ol Aposol, mo ol nara lida blong Jos, mo taem yu folem tijing blong ol profet blong bifo we oli tokbaot finis dei blong yumi, bae yu fulap, dip insaed long hat mo sol blong yu, wetem spirit mo wok blong Restoresen. Mi promes bae yu luk han blong God long laef blong yu, harem ol smol voes blong Hem, mo filim lav blong Hem.”⁸

Mi talemaot bigfala tangkyu blong mi from rod we ol Profet, Sia mo Reveleta we oli stap laef, oli stap soem long yumi. Hem i gud tumas blong gat lidasip blong olgeta we i kam tru long insperesen, mo eksampol blong givim ful tingting mo taem long Lod Jisas Kraes.

Mi talem witnes blong mi se Papa long Heven i stap harem mo i stap ansarem ol prea blong yumi. Taem we Ol Profet, Ol Sia, mo Ol Reveleta oli mekem ol promes long yumi, olgeta promes ia, bae God i givim ona long olgeta sapos yumi stap laef long wan wei we yumi save klemem olgeta. Mi witnes bakegen moa se Jisas Hem i Kraes, we i minim Mesaea ia mo Sevya ia blong wol we yumi stap wet long hem longtaem i kam. !Hem i stap laef!