Lokol Pej
Wan Yang Man blong Fiji I Helpem Sam Strenja we Trak I Brokdaon long Saed blong Rod
“Iven long ol hadtaem we yumi stap gotru long hem, hemia . . . i bin putum wan smael long fes blong mi.”
Api Tuitubou i bin stap long rod blong hem blong visitim papa mo mama blong hem kolosap long Suva, Fiji, taem hem i bin luk wan trak, we model blong hem i kolosap semmak long hemia blong hem, i brokdaon i stap long saed blong rod. Api, i wan memba blong Jos Ia blong Jisas Kraes blong Ol Lata-dei Sent; hem i stop mo i bin askem ol man blong trak ia wanem nao trabol blong olgeta.
From se hem i gat ol speapat long haos blong papa mo mama blong hem, we i no stap longwe, hem i stat blong wok long trak blong olgeta, be i no longtaem afta, i faenemaot se problem blong trak ia, i moa bigwan bitim wanem hem i ting long hem. Bae i nidim help blong wan makanik.
Tuitubou i bin lanem se ol niu fren blong hem oli bin askem trak ia long wan famli blong olgeta, mo oli bin ron longwe i kam, aot long vilej blong olgeta long Ra blong go salem ol kaekae blong olgeta long wan maket ples long Suva. From se hem i bin gat speapat i stap, hem i disaed blong i givim long olgeta mo i mekem se i gat wan narawan, we i moa kwalifae, bae i riperem trak ia blong olgeta.
“Afta we mi tingting se oli bin travel longwe finis i kam mo ol sakrifaes we oli bin mekem blong tekem ol kaekae blong garen blong olgeta i kam long maket,” Tuitubou i talem “Mi tingting se, bae mi givim nomo pat ia we oli nidim (from se mi mi gat). Taem mi luk fes blong olgeta, . . . hat blong mi i brok.”
Sam wik afta, Tuitubou i kasem wan visit blong ona blong trak we oli bin riperem. “Oli bin kam wetem wan bag blong maniok mo tu dasen (24) kokonat,” hem i talem. “Fasin blong talem tangkyu we oli kam wetem, i mekem hat i glad tumas.”
Ona blong trak “i bin talem long mi se wanem we hem i tekem i kam, bae i no save kavremap mane blong pat blong trak ia, be hem mo famli blong hem oli talem tangkyu tumas mo oli bin stap prea from mi, mo from famli blong mi,” Tuitubou i talem.
Hem i gohed, “Hem i bin serem hemia wetem famli mo ol fren blong hem long wei we wan strenja i bin helpem nifiu blong hem long rod, mo olsem wanem God i bin putum olgeta long wan raet ples long wan raet taem blong i kam mo helpem olgeta.”
Tuitubou i talem se hem i talem tangkyu se hem i bin save help. “Mi biliv se sapos yumi gat wan janis blong helpem wan man o woman, yumi mas helpem olgeta, from se yu neva save, bae i save tajem wan long wan gudfala wei we bae i blesem yu long wan bigfala wei.”
“Iven long ol hadtaem we yumi stap gotru long olgeta, ol smol samting ia we oli bin hapen, i jes putum wan smael long fes blong mi mo i bin mekem mi mi rere blong mekem moa blong help taem we mi mi save givim help.”
Long Oktoba 2019 Jeneral Konfrens blong Jos Ia blong Jisas Kraes blong Ol Lata-dei Sent, Presiden Nelson i talem: “Ol Lata-dei Sent, semmak olsem ol nara man we oli stap folem Jisas Kraes, oltaem oli stap lukaotem ol wei blong help, leftemap ol narawan, mo lavem ol narawan. Olgeta we oli wantem blong oli singaotem olgeta ol pipol blong Lod, ‘oli wantem tekem hevi samting blong wan narawan, . . . krae sore wetem olgeta we oli krae sore, . . . mo givim kamfot long olgeta we oli nidim.’ Oli lukaotem tru, blong stap laef folem nambawan mo nambatu bigfala komanmen. Taem we yumi lavem God wetem ful hat blong yumi, Hem i tanem hat blong yumi i lukluk long gudlaef blong ol narawan long wan raon we i naes mo i gat klin fasin.” (Russell M. Nelson, “Seken Hae Komanmen Ia”, Liahona, Oktoba 2019).