Lokol Pej

Ol Eksepsen blong Ol Standet blong Dresap we Oli Anaonsem blong Ol Yang Misinari we oli Ol Man

Niusrum

Long Jun long yia ia, Jos Ia blong Jisas Kraes blong Ol Lata-dei Sent, i bin anaonsem ol eksepsen (oli alawem wanwan taem) blong standet blong dresap blong ol yang man we oli stap olsem ol misinari.

Ol eksepsen ia, we Fas Presidensi mo Kworom blong Olgeta Twelef Aposol oli bin apruvum, i givim ol Eria Presidensi paoa blong stretem dresap blong ol misinari long sam spesifik ples blong kam antap mo holemtaet gud fasin, sefti, gud wok mo fasin blong go kolosap long man, mo kalja, mo semtaem save ripresentem Lod mo Jos blong hem, long wan stret fasin.

“Dresap blong ol misinari oli bin stap stretem wetem taem folem ples, stael mo kastom,” Elda Dieter F. Uchtdorf, wan memba blong Kworom blong Olgeta Twelef Aposol mo semtaem jeaman blong Misinari Eksekutiv Kaonsel i talem. “Ol eksepsen ia, oli gogohed folem fasin ia nao. Long evri samting we yumi lukluk long olgeta, yumi stap kipim i stap nambawan, misinari koling ia blong ripresentem Jisas Kraes, blong lukaotgud long helt mo sefti blong ol misinari, mo hamas ol manples oli folem kalja blong olgeta.”

Anda long gaedlaen we oli apdeitem, oli tokbaot bigwan bakegen dresap blong ol misinari, we i wan waet sot mo nektae, mo long sam eria, i gat wan ful sut kot. Antap long hemia, long ol tijing eria we oli apruvum, ol yang man (we oli save gud olgeta olsem ol elda) bae oli save werem wan waet o blu sot, wetem nektae o oli save tekemaot nektae. Ol eksepsen ia, bae Ol Eria Presidensi nao oli disaed long ol, mo ol misinari bae oli kasem notis we i kam long misin presiden blong olgeta sapos ol eksepsen ia i blong eria blong olgeta.

Evri elda bambae oli gohed blong werem wan waet sot mo nektae, mo long sam eria, wan kot taem oli stap go long tempol, Sandei wosip, lidasip mo son konfrens, ol misinari trening senta, ol seves blong baptaes mo ol nara miting blong Jos.

“Ol klos blong ol misinari, oltaem bae oli mas gud, gat respek, mo stap long wan standet taem ol misinari oli stap mekem stamba tingting blong olgeta blong stap tijim ol pipol abaot gospel blong Jisas Kraes,” Elda Uchtdorf i talem.

Anaonsmen ia i folem wan dresap standet jenis long Disemba 2018 blong ol yang woman we oli stap givim seves olsem ol misinari.