Lokol Pej
Ol Simpol Blesing blong Wan Fet we I No Muvmuv
I no longtaem afta long divos, Sista Fineone Fisi’ihoi Mork mo ol yangfala pikinini blong hem oli bin muvaot long Niu Kaledoni i go long Niu Silan, mo i hop blong gat wan niu laef.
Hem i stap lukaotem haos blong hem olsem wan singgel mama; hemia i wan niu jalenj blong Sista Mork, be hem i bin lan blong dipen bigwan long Papa long Heven blong kasem sapot long ol taem we oli had, mo hem i save se famli blong hem bae i kasem blesing folem fet blong olgeta mo folem hamas oli stap obei.
Faenens problem blong hem i go daon smol taem we bigfala boe blong hem, Michael, i bin finisim skul mo i stat wok. Michael i lukluk blong pem rent blong haos; hemia i mekem se Sista Mork i save lukluk moa long ol nara pikinini blong hem. Hem i iven statem wan seving blong diposit from wan haos. Long en, hem mo boe blong hem oli save muvum famli blong olgeta i go long wan haos blong olgeta long Mangere Is, Saot Oklan.
Sam yia afta, i taem blong Michael blong go long wan misin; hem i no wantem go from se hem i stap wari long mama blong hem. ?Olsem wanem nao bae hem i pem niu haos ia from mane blong hem i sot? I wan bigfala wari tu long Sista Mork, be hem i bin save se i moa impoten blong stap obei long tingting blong Papa long Heven.
Hem i talem long boe blong hem: “Sapos yu rere blong go long wan misin, yu go. Lod bae i lukaot long mifala.”
Sam manis afta, tingting ia i kamaot long ol toktok blong wan blesing we Presiden blong Oklan Niu Silan Papatoetoe stek i bin givim, we i setem apat Michael olsem wan misinari blong Jos Ia blong Jisas Kraes Ia blong Ol Lata-dei Sent. Oli singaotem Michael blong mekem wok long Kot D’ivoa Abijan Misin, long Wes Afrika.
Sista Mork i talem: “Mi tingbaot i klia. Presiden Moroni Westerlund i bin blesem boe blong mi blong hem i mas fetful mo i wok strong, mo afta hem i talem long boe: ‘No wari long mama blong yu. Lod bae i lukaot long hem mo bae i blesem hem wetem evri nid we hem i gat.’”
Ol toktok blong blesing ia oli bin stap wetem Sista Mork, mo plante taem, ol toktok ia oli tekem kamfot i go long hem long taem we Michael i bin stap longwe. I no bin wan isi taem. Hem i gat tu pikinini yet i go long skul, mo i no gat inaf mane blong kavremap ol samting blong pem long wik, be Sista Mork i bin gat strong tingting blong givim ona long ol hadwok blong boe blong hem blong go long misin, mo hem i stap talem tangkyu mo i stap fetful. Hem i bin mekem ol koling blong hem long Jos, i givim seves long tempol plante taem olsem we hem i save mekem mo i bin pem wan ful taeting.
‘Long sam wei, hem i bin mekem wik afta wik.” Hem i bin luk tu se, nomata long ol faenens hadtaem blong hem, hem i luk se famli blong hem i bin hapi moa.
Afta, long wan manis, wota bil blong Sista Mork i bin hae tumas. Hem i no save from wanem be hem i traem bes blong pemaot bil ia. Long nekis manis blong hem, bil blong wota i hae moa bakegen. Wota bil ia i gohed blong go antap gogo mo i no longtaem afta, hem i no save mekem ol peimen blong ol nara samting from se hem i bin stap traehad blong pem wota bil.
Long wan dei we Sista Mork bae i neva fogetem, hem i bin holemtaet taeting blong hem i stap, mo i pem ol bil blong wik. Afta, hem i luksave se hem i gat 15 dola nomo i stap. Hat blong hem i brokdaon. ?Olsem wanem bae hem i fidim famli blong hem long manis we i stap wetem 15 dola?
Hem i putum gud trak aotsaed long lokol maket mo i talem wan prea long Papa long Heven bifo hem i go insaed. Hem i pem sam vejetebol, we laki nomo, oli stap long spesel praes. Hemia i lego hem wetem 10 dola blong spendem long stoa blong mit, we i stap narasaed doa. Hem i go lukaotem ol jip praes mo faenem tu paket blong 5 dola. Taem hem i stap wet blong go pem, hem i stap tingting long wanem kaekae bae i save stap longtaem.
Hem i stap karem mane long stoa i mekem signol blong oda blong hem, mo taem hem i openem paos blong hem, Sista Mork i sek. Long klia ples long fored blong 10 dola not blong hem . . . i gat wan pepa mane blong 20 dola i stap.
Tingting blong hem i fasfas mekem se hem i nomo pem mit ia. Hem i talem sore long man long stoa, i aot long stoa mo i go spendem taem blong traem faenem se ekstra mane ia i kam wea. Hem i jekem ol risit blong hem blong meksua se hem i no mestem wan bil. Hem i jekem taeting blong hem se i fulwan mo i sef i stap. Hem i meksua se olgeta long maket oli no givim rong jenis blong mane. Mo i go i go olsem kasem taem we hem i no save kasem wan ansa, nao Sista Mork i krae bigwan. Long hat blong hem, hem i bin save se hemia i wan merikel.
Long hom, hem i talem long ol pikinini blong hem abaot eksperiens blong hem. Wetem ol bigfala filing long hat blong hem, hem i bin testifae long olgeta abaot paoa blong fet long God, abaot lav we God i gat long wanwan long yumi, mo abaot ol blesing we oli kam taem wan i stap obei long ol komanmen blong Hem, mo taem yumi stap kipim ol kavenan wetem Hem.
Famli i bin nildaon blong talem tangkyu long Papa long Heven blong lukaotgud long olgeta—semmak olsem we stek presiden blong olgeta i bin promesem se bae Hem i mekem.
Long semfala wik ia, wan fren blong Jos i faenem from wanem wota bil blong hem i hae tumas: wan paep andanit long haos i brok. Fren ia—we i ona blong wan bisnis blong fiksim samting—i riperem paep ia, mo afta, long wan kaen fasin, i no wantem Sista Mork blong pem seves blong hem.
Bil blong wota i kambak long nomol, mo Sista Mork i bin gat gud faenens bakegen, mo long ol manis afta, oli pas long pis kasem taem Michael i kambak hom afta long misin blong hem.