N̄an Un eo
Ekar wōr aō apan̄ kōn nan̄inmej in kōļmenļo̧kjeņ, imaron̄ ke etal wōt im mijen?
Aaet. Aolep ro “ewōr ami ikdeelel n̄an jerbal n̄an Anij … ej kūr kom̧ n̄an jerbal in” (Katak im Bujen Ko 4:3). Ijo jej jerbal ie ejjab lukkuun aorōk in wōt ewi wāween ad jerbal. Im jabdewōt eo ej ļōmņak in mijen naaj aikuj etale ājmour eo aer ilo kōļmenļo̧kjeņ im ānbwin.
Eļan̄n̄e enaaj wōr am̧ ikdeelel n̄an mijen, kōnono ippān bisop eo. Emaron̄ jipan̄ eok jinoe kanni peba ko am̧. M̧ōttanļo̧k jerbal in ekoba bōk kapilōk ippān taktō eo im ro jet retijem̧ļo̧k, barāinwōt ritōl ro an Kabun̄ in im jinen im jemān ajri ro. Kakpilōklōk kein rejjab n̄an etale eļan̄n̄e kwe “kwom̧m̧an” n̄an Irooj ak jipan̄ er kālet kālet ko rem̧m̧an tata n̄an jerbal eo am̧.
Juon kūr n̄an jerbal emaron̄ itok n̄an aolep kōn ikdeelel n̄an jerbal. Ijjitōn̄ eo kwoj bōke n̄an jerbal ilo juon jikin eo ejenoļo̧k ak ilo juon wāween eo ejenoļo̧k emaron̄ pedped wōt ilo elōn̄ jekjek ko. Armej kōn ewōr apan̄ ippāer ikkijeen ājmour (ekoba nan̄inmej in kōmālij) jet iien rej kajjieon̄ kōjekdo̧o̧n meļeļe in ilo iien kanne peba, ļōmņak enaaj jipan̄ er bōk ijjitōn̄ eo rekōņaan. Ak eļan̄n̄e kwoj lukkuun m̧ool kōn bwebwenato in ājmour eo am̧ (ekoba nan̄inmej in kōmālij), Irooj enaaj kōjeraam̧m̧an eok. E ej kōtmene bwe kwon kōm̧m̧ane aolep men kwomaron̄e n̄an kōkm̧anm̧anļo̧k ājmour eo am̧. Im uno ko rellōn̄ kwoj bōki ilo m̧weo remaron̄ wōnm̧aanļo̧k wōt ilo jikin mijen eo am̧.