I No Olsem Pis we Ol Man blong Wol Oli Save Givim
Ol tul we yumi nidim blong krietem wan gudfala dei mo lukaotem wan ekonomi blong gud fasin i kam bigwan, oli givim fulap long olgeta insaed long gospel blong Jisas Kraes.
Bifo long fas Ista taem Jisas i stap endem niufala odinens blong sakramen we Hem i bin serem long Olgeta Twelef, Hem i statem naesfala tata toktok blong Hem mo muv i go long Getsemane, taem we bae oli tanem baksaed, mo krusifaem Hem. Be, Hem i luksave ol wari mo ating fraet we sam long ol man ia oli gat, Jisas i talem hemia long olgeta (mo long yumi):
“Bambae yufala i no letem ol tingting blong yufala i trabol: “Huia i stap biliv long God, i stap biliv tu long mi. …
“Mi no save lego yufala i stap nomo olsem: Bambae mi mi save kambak bakegen long yufala. …
“Mi givim pis long yufala mo pis ia we mi givim long yufala i no olsem pis we ol man long wol oli save givim. Yufala i no letem tingting blong yufala i trabol, yufala i no fraet.”1
Ol hadtaem oli kam long wol ia, mo tu, long ol fetful be sua mesej blong Kraes,i we, Hem, Smol Sipsip we oli givim olsem wan ofring, bae i go olsem “wan sipsip bifo long ol [man] we bae oli kilimded”2 Hem bae laef bakegen, olsem ol man blong sam oli talem, blong stap olsem “sefples mo paoa blong yumi, [man] blong givhan long yumi long [ol taem] blong trabol.”3
Wetem lukluk blong ol had aoa we oli stap kam blong Kraes taem Hem i stap muv i go long kros mo blong ol disaepol blong Hem, oli karem gospel i go long wol long taem ia, go wetem mi naoia, wan semmak mesej blong lata‑dei Jos blong Sevya. Mesej ia i stap long plante ves insaed long Buk blong Momon we i tokbaot ol defren kaen fasin blong agens, we i kam long nogud fasin we i no save finis blong Leman mo Lemyul, mo i go kasem ol las faet we i tekem tu ol handred blong ol taosen soldia. Wan long ol klia risen from wanem yumi tokbaot tumas ol storian blong wo, i from se, olsem we Buk blong Momon oli bin raetem blong ol lata‑dei jeneresen, ol man we oli raet (oli ol ami man olgetawan) we oli givim wan profet woning se faet mo raorao bae i stap olsem wan saen we i klia long saed blong rilesensip blong ol las dei.
Yes i tru, ol tingting blong mi long saed blong lata‑dei raorao i no tru tumas. Kolosap 200 yia i pas, Sevya i givim woning se long ol las dei, ,bae i gat plante “wo mo ol toktok olbaot abaot wo,”4 afta Hem i talem se “pis [bae] oli karemaot long.”5 Sevya, Prins blong Pis, we i tijim wetem paoa se fasin blong raorao i blong devel,6 i mas krae wetem Tabu Papa blong Hem from famli blong man blong dei blong yumi, we oli “no gat lav,” mo oli no save luksave olsem wanem blong laef tugeta long lav.7
Ol brata mo sista. Yumi bin luk plante raorao, kros mo ol toktok we oli no stret raon long yumi. Laki nomo se, jeneresen blong naoia, i no bin gat wan nambatri wol wo blong faetem, mo no eksperiensem wan foldaon blong wol ekonomi olsem wan long 1929, we i lid i go long wan Bigfala Hadtaem blong Mane. Be, yumi stap fesem wan defren kaen Nambatri Wol Wo, i no wan faet blong spolem ol enemi blong yumi, be wan oda blong ol pikinini blong God blong kea moa long wanwan, mo helpem hilim ol soa we yumi faenem long wan wol we i fulap long raorao. Bigfala hadtaem we yumi stap fesem naoia, i no abaot tumas lus blong ol seving blong yumi aotsaed, be moa abaot insaed lus blong gat tras long yumiwan, fet, mo hop mo bigfala lav i foldaon, raon long yumi. Be ol tul we yumi nidim blong krietem wan gudfala dei mo lukaotem wan ekonomi blong gud fasin i kam bigwan, oli givim fulap long olgeta insaed long gospel blong Jisas Kraes. Yumi no save letem— wol i no save letem—rong blong yumi blong no yusum fulwan ol gospel tingting ia mo ol kavenan, blong yusum fulwan long yumi wanwan mo long pablik.
So, long wan wol we “i fulap wetem hariken, mo i no gat kamfot.” olsem Jehova i talem se bae i olsem, ?olsem wanem yumi faenem wanem Hem i singaotem “rod blong … pis”? Yumi faenem taem yumi tanem i go long Hem we i talem, bae Hem i gat sore long mifala “wetem kaen fasin we i no save finis” mo bae i Hem putum pis long ol pikinini blong mifala.8 !Long medel blong ol profesi we i mekem man i fraet mo ol skripja we i no sua we i talemaot se, pis, bae oli tekemaot long wol ia, ol profet mo tu profet blong yumi we yumi lavem tumas, Russell M Nelson i bin tijim se i no nid blong oli tekemaot long yumi wanwan!9 So, long Ista ia, bae yumi traem blong praktisim pis long wan pesonol wei, yusum sore mo hiling pomad blong Atonmen blong Lod Jisas Kraes long yumiwan mo ol famli blong yumi, mo long olgeta raon long yumi. Laki nomo se, wetem sapraes,gudfala filing blong pomad ia oli mekem i posibol long yumi “wetem no mane mo wetem no praes.”10
Kaen help mo hop ia, yumi nidim from se, long kongregesen blong wol tudei i gat plante we oli fesem hadtaem wetem wan kaen jalenj o narawan—long saed blong bodi o filing, tingting o faenens o plante nara kaen. Be plante long olgeta ia we i yumi,, yumi no strong inaf blong winim olgeta yumiwan, from se help mo pis we yumi nidim i no kaen pis we “wol i save givim.”11 No, blong ol problem we oli had, yumi nidim wanem ol skripja oli singaotem “Ol paoa blong heven,”be blong gat akses long ol paoa ia, yumi mas laef folem wanem ol semmak skripja oli singaotem “ol prinsipol blong stret mo gud fasin.”12 Nao. Blong andastanem nomo koneksen ia, bitwin prinsipol mo paoa, i wan lesen ia we famli blong man i neva save lanem; !olsem i nao God blong heven mo wol i talem!13
?Mo wanem nao ol prinsipol ia? Oli bin ripitim insaed long ol skripja, oli bin tijim bakegen mo bakegen long ol konfrens olsem hemia, mo long dispensesen blong yumi, Profet Josef Smit i bin tijim olgeta, folem storian blong hem hem i singaot se “?God blong mi, God blong mi, from wanem yu lego mi mi stap olsem ya?”14 Long kolkol rum blong Libeti Kalabus, oli bin tijim hem se ol prinsipol blong stret mo gud fasin we i tekem tu ol klin fasin olsem blong save wet longtaem, longfala tingting long ol hadtaem, kaen fasin, mo lav we i tru.15 Karemaot ol prinsipol ia, nao bae i tru nomo se bae yumi fesem plante fasin blong no agri, mo fasin blong agens.
Long tingting ia, bae mi tok smol long saed blong fasin blong no gat, long sam ples, ol prinsipol blong stret mo gud fasin long taem blong yumi. Rul blong mi, i we, mi mi open long laef mo mi glad man oltaem, mo i gat plante samting i gud mo naes long wol blong yumi. Yes, yumi gat moa blesing long ol samting blong wol ia bitim eni nara jeneresen long histri, be I tru se, long kalja blong naoia mo plante taem tumas insaed long Jos, yumi luk ol laef we oli stap long trabol, wetem plante tingting we oli no folem standet we i lid i go long ol kavenan we oli brok mo ol hat we i brok. Tingbaot ol rabis toktok we i semmak long fasin blong brekem loa long saed blong seks, we tugeta i stap oltaem long ol muvi mo long televisen, o ol toktok blong abius long saed blong seks long wokples olsem we yumi stap rid fulap abaot long taem blong yumi tedei. Long saed blong kavenan blong stap klin evriwan, plante taem, wanem we i tabu, plante taem oli tekem se i wan nomol samting olbaot, mo wanem we i tabu, naoia oli mekem se man i nomo gat respek long hem. Long eniwan we i kasem temtesen blong wokbaot o tekem aksen long ol wei ia—“olsem we wol i givim,” olsem blong talem—no tingting se hemia bae i lid i go long ol eksperiens we i gat pis; mi promesem yu long nem blong Lod, se bae i no save hapen. “Fasin nogud i neva bin fasin blong stap glad,”16 wan profet blong bifo i talem. Taem danis i en, man we flu long paep i mas karem mane blong hem, mo long plante taem, mane i ol wota blong ae mo ol rigret.17
Maet yumi stap luk ol nara wei blong abius o rabis fasin. Hamas yumi mas tekem gud kea olsem ol disaepol blong Lod Jisas Kraes blong no tekpat long kaen fasin olsem. I no gat enitaem we bae yumi mas gilti long eni kaen abius o kontrol wetem fos, o fos long rabis wei—yumi no mas gat eni rong long abius blong bodi, blong tingting, blong filing, o long eni nara kaen wei. Mi tingbaot se mi bin interes tumas long wan taem we Presiden Gordon B. Hinckley i toktok long ol man insaed long Jos long saed blong olgeta we hem i singaotem olgeta se oli “ol rabis man long ol hom blong olgetawan bakegen.”18
“Olsem wanem i nogud tumas mo prapa rabis tumas blong gat fasin ia blong abiusum waef,” hem i talem. “Eni man long Jos ia we i abiusum waef blong hem, we i daonem hem, i tok nogud o swea long hem, i praktisim wan rul we i no stret mo i no gud ova long hem, hem i no klin inaf blong holem prishud. … [Hem] we i no klin inaf blong holem wan tempol rekomen.”19 Wan i moa nogud semmak, hem i talem, i eni kaen abius long pikinini—o eni nara kaen abius.20
Be long plante nara wei, ol fetful man mo woman, mo tu, ol pikinini, oli stil gat rong ia blong stap taltalem ol toktok we i no kaen, iven i prapa spolem fulwan, olgeta we oli sil tugeta tru long wan tabu odinens insaed long tempol blong Lod. Evriwan i gat raet blong kasem lav, blong filim pis, mo blong faenem sefti long hom. Plis, bae yumi traem blong holemtaet envaeromen ia i stap long hom Promes blong stap olsem wan man blong mekem pis, i we, bae yu gat Tabu Spirit oltaem olsem kompanion blong yu, mo ol blesing bae oli kamkam long yu, “we bae yu no traehad from,” blong oltaem mo oltaem.21 I no gat man i nidim wan sap tang o ol toktok we oli no kaen blong “singsing long singsing blong lav we i pemaot man.”22
Bae mi finis long ples we mi bin stat. Tumoro i Ista, wan taem blong ol prinsipol blong stret mo gud fasin blong gospel blong Jisas Kraes mo Atonmen blong Hem blong “pasem ova long yumi,” —pas ova long ol agens mo raorao, pas ova long fasin blong no gat hop mo sin, mo long en, pas ova long ded. Hem i wan taem blong promes strong bakegen se bae yumi stap tru long Smol Sipsip blong God, Hem we i “[pemaot] ol sobodi blong yumi, mo karem harem nogud blong yumi”23 from strong tingting blong Hem blong finisim wok blong sevem man long bihaf blong yumi.
Nomata long fasin blong tanem baksaed mo sobodi, long medel blong ol nogud tritmen mo fasin we i prapa spolem man, mo semtaem tekem evri hip blong ol sin mo harem nogud blong famli blong man, nao, Pikinini blong God we I Stap Laef i bin lukluk i kamdaon long longfala rod blong laef long wol ia, i luk yumi long wiken ia, mo i talem: “Pis ia we mi livim wetem yufala, pis ia we mi givim long yufala i no olsem pis we ol man long wol oli save givim. Yufala i no letem tingting blong yufala i trabol, yufala i no fraet.”24 !Yufala i gat wan Ista we i fulap long blesing, glad mo i gat pis! Oli no talem hamas moa samting yumi save kasem, we Prins blong Pis i bin pem praes from finis, Hem we mi lavem wetem evri hat, Hem we hemia i Jos blong Hem, mo Hem we mi wan strong witnes blong Hem, Hem we i Lod Jisas Kraes, amen.