Ol Niu Koling
Elda Paul V. Johnson
Presidensi blong Olgeta Seventi
Wan long ol impoten lesen we Elda Paul V. Johnson i bin lanem aot long plante yia we hem i bin wok long Jos edukesen, i we, long olgeta we oli stap kipim ol kavenan blong olgeta, Lod i stap kipim ol promes blong Hem—i nomata ol jalenj blong laef.
“I nomata we yumi no save gud ol samting we oli stap mo lukluk long samfala pat blong laef blong yumi, be yumi gat ol promes ia we oli sua,” hem i jes talem. “Yumi no save letem samfala pat blong laef blong yumi oli seksekem yumi mo yumi nomo lukluk long ol promes blong Lod.”1
Tedei, ol pikinini blong wol oli fesem wan wol sik ia, sosaeti we i seraot, mo sosol media we i kavremap evriwan. Be, taem yumi stap laef folem ol kavenan blong yumi, Elda Johnson i talem, Lod i stretem han blong Hem, i soem rod, i givim paoa mo kamfot.
Long namba 3 Epril 2001, oli sastenem Elda Johnson olsem wan memba blong Presidensi blong Olgeta Seventi, mo bae i statem wok ia long namba 1 Ogis 2021. Elda Johnson i bin stap olsem namba 16 Komisina blong Jos Edukesen Sistem stat long 2008 i go kasem 2015, mo i statem wok ia bakegen long 2019.
Paul Vere Johnson i bon i kam long wol ia long namba 24 Jun 1954, long Gensvil, Florida, YSA. Papa mo mama blong hem i Vere mo Winefred Johnson. Afta we hem i groap long Logan, Yuta, YSA, hem i bin givim seves long Nowe Oslo Misin. Afta long misin blong hem, hem i maredem Leslie Jill Washburn long Logan, Yuta Tempol, long 1976. Tufala i gat 9 pikinini mo 40 apupikinini.
Elda Johnson i bin kasem wan digri long saed blong fasin blong lukaot animol l long Brigham Yang Yunivesiti long 1978; hem i kasem wan masta blong edukesen long BYY long 1982, mo wan pepa blong dokta long instraksen teknoloji long Yuta Stet Yunivesiti long 1989.
Hem i bin tijim seminari blong 12 yia long Arisona mo long Yuta bifo hem i stat wok long ol defren kurikulom divelopmen mo ol administretiv posisen blong Jos Edukesen Sistem long Sol Lek Siti.
Elda Johnson, oli sastenem hem olsem wan memba blong Fas Kworom blong Olgeta Seventi long 2 Epril 2005. Hem i bin stap tu olsem wan Eria Seventi, kaonsela long wan stek presidensi, stek hae kaonsela, bisop, mo wod Yang Man presiden.