“Ol Prinsipol blong Gospel blong Mi”
Wan prinsipol blong gospel i wan gaedlaen we i stanap long doktrin, blong mekem man i yusum gud fasin blong save mekem joes.
Long Jeneral Konfrens blong Jos Ia blong Jisas Kraes blong Ol Lata-dei Sent long manis Oktoba 1849, Elda Jon Teila blong Kworom blong Olgeta Twelef Aposol i bin askem blong oli openem nesen blong Franis blong oli prijim gospel blong Jisas Kraes long hem. Seves blong hem i tekem tu blong editim fas ofisol pepa blong Jos long kantri ia. Elda Teila i rere mo i pablisim wan atikol long 1851 blong ansarem plante sem kwestin we oli bin stap askem hem abaot Jos. Mo kolosap long en blong pepa blong hem, Elda Teila i raet abaot wan taem ia:
“Sam yia i pas, long Nauvu, wan man we i harem mi, wan memba blong Palamen, i bin askem Josef Smit olsem wanem nao hem i mekem blong rul ova long plante pipol olsem, mo semtaem, holemtaet wan oda i stap; hem i talem tu se i no posibol blong olgeta oli mekem sem samting long wan nara ples. Josef Smit i talem se i isi nomo blong mekem hemia. ‘?Olsem wanem?’ naes man ia i ansa: ‘long mifala, hem i had tumas.’ Josef Smit i ansa: “mi tijim olgeta ol prinsipol we oli stret, mo olgeta nomo oli rulum o kontrolem olgeta.’”1
Mi prea se bae Tabu Spirit bae i givim instraksen mo i leftemap yumi taem bae mi tokbaot bigwan impoten rol ia blong ol prinsipol insaed long gospel ia we i kambak, gospel blong Jisas Kraes.
Ol Prinsipol
Lod i talemaot long Profet Josef Smit tru long revelesen se: “ol elda, ol pris mo ol tija blong jos ia bae oli mas tijim ol prinsipol blong gospel blong mi, we oli stap long Baebol mo long Buk blong Momon, we i holem ful gospel.”2 Hem i bin talem tu se Ol Lata-dei Sent, bae oli mas “tijim olgeta stret moa long saed blong fasin, long saed blong prinsipol, long saed blong doktrin, long saed blong loa blong gospel, long saed blong evri samting we i abaot kingdom blong God, we i nid blong oli andastanem.”3
Blong talem stret, wan prinsipol blong gospel i wan gaedlaen we i stanap long doktrin, blong mekem man i yusum gud fasin blong save mekem joes. Ol prinsipol oli defren long ol bigfala trutok blong gospel, mo oli givim ol daereksen mo ol standet blong folem taem yumi stap go fored long kavenan rod ia.
Eksampol: ol tri fasfala Toktok blong Bilif, oli talemaot ol stamba pat blong doktrin blong gospel ia, we i kambak, blong Jisas Kraes: huia i Godhed long nambawan toktok blong bilif, ol risal we i kamaot from Foldaon blong Adam mo Iv, we oli stap long nambatu toktok blong bilif, mo ol blesing we oli posibol blong kasem tru long Atonmen blong Jisas Kraes, insaed long nambatri toktok blong bilif.4 Mo nambafo toktok blong bilif i putumaot ol fasfala prinsipol—ol gaedlaen ia blong stap praktisim fet long Jisas Kraes, mo stap sakem sin—mo fasfala prishud odinens we i mekem se Atonmen blong Jisas Kraes i wok gud insaed long laef blong yumi.5
Tok blong Waes i wan nara eksampol blong wan prinsipol we i stap olsem wan gaedlaen. Plis, teknot long wan fas ves insaed long seksen 89 blong Doktrin mo Ol Kavenan:
“we oli givim olsem wan prinsipol wetem wan promes, we i stret long paoa blong olgeta we oli no strong mo olgeta sent ia we oli no strong nating aot long evri sent, we oli, mo oli save singaotem olgeta ia, ol sent.
“Luk, i tru, olsem ia nao Lod i talem long yufala: “From ol nogud samting mo ol plan we oli stap mo bambae oli stap long hat blong ol man we oli stap mekem ol sikret samting long ol las dei, mi bin wonem yufala, mo mi wonem yufala fastaem, taem mi givim long yufala tok blong waes tingting ia tru long revelesen.”6
Instraksen we i kam long insperesen ia, we i folem fas toktok ia i givim ol gaedlaen we oli stap gogo, blong gudlaef blong bodi mo spirit, mo i testifae abaot ol spesifik blesing we oli kam, dipen long hamas yumi fetful long prinsipol ia.
Blong stap lanem, andastanem, mo stap laef folem ol prinsipol blong gospel i mekem fet blong yumi long Sevya i kam strong moa, i mekem yumi givim moa yumi long Hem, mo yumi invaetem plante blesing mo presen long saed blong spirit insaed long laef blong yumi. Ol prinsipol blong stret mo gud fasin oli helpem yumi tu blong luk i go bitim ol samting we yumiwan nomo i laekem, mo wantem, taem yumi givim bigfala lukluk ia blong trutok we i no save finis taem yumi gotru long ol defren situesen, jalenj, desisen, mo eksperiens blong laef long wol ia.
Ol Eksampol blong Tedei blong Stap Tijim Ol Stret Prinsipol
Toktok ia we i kam long Profet Josef Smit, abaot fasin blong stap tijim ol stret prinsipol, maet i wan we hem i yusum plante long ol tijing blong hem. Mo yumi faenem ol strong eksampol blong insperesen paten ia blong givim instraksen we i stap long ol toktok we ol wokman blong Lod oli stap talem tedei.
Prinsipol blong No Gat Samting I Pulumaot Ae
Presiden Dallin H. Oaks i bin toktok long jeneral konfrens long 1998, abaot ol diuti blong olgeta we oli holem Aronik Prishud, long saed blong fasin blong stap rere mo stap blesem mo pasem sakramen. Hem i tokbaot prinsipol blong no gat samting i pulumaot ae, mo talem se wan we i holem Aronik Prishud, bae i neva wantem eni samting long wei we hem i luk, o fasin blong hem, bae i pulumaot ae blong eni memba blong Jos long wosip blong hem, mo long taem ia blong hem i riniu ol kavenan blong hem. Presiden Oaks i talemaot bigwan tu ol prinsipol blong fasin blong gat oda, stap klin, gat respek, mo hae respek.
I gud blong luk se, Presiden Oaks i no givim, long ol yang man, wan longfala lis blong ol samting blong mekem, mo blong no mekem. Be, hem i eksplenem prinsipol ia, mo i wantem luk se ol yang man mo papa mo mama blong olgeta, wetem ol tija, oli save mo oli mas yusum jajmen blong olgeta mo insperesen blong olgeta nomo blong folem gaedlaen ia.
Hem i eksplenem: “Bae mi no givim tingting blong givim ol rul we oli gat ditel, from se, ol situesen long ol wod mo ol branj long wol Jos blong yumi, oli defdefren, mekem se wan spesifik rul we bae oli putum long wan ples, maet bae i no stret long wan narawan. Be, mi bae mi givim tingting blong gat wan prinsipol we i stanap long ol doktrin. Sapos evriwan oli andastanem prinsipol ia, mo oli mekem samting we i go folem prinsipol ia, bae i no nid blong gat ol rul. Sapos i nid blong gat rul o kaonseling long wanwan kes, ol lokol lida oli save givim long olgeta, mo oli go wetem ol doktrin mo ol prinsipol we oli go wetem olgeta.”7
Prinsipol blong Sabat olsem Wan Saen
Long Epril 2015 jeneral konfrens, Presiden Russell M. Nelson i bin tijim yumi se “Sabat i wan glad.”8 Mo tu, hem i eksplenem olsem wanem hemwan hem i bin kam blong andastanem wan besik prinsipol abaot fasin blong ona long Sabat dei:
“?Olsem wanem nao yumi save mekem Sabat dei hem i tabu? Taem mi mi bin yangfala, mi bin stadi long wok blong ol narafala pipol we oli bin putum tugeta wan lis blong ol samting blong mekem, mo ol samting blong no mekem long Sabat. Afta nomo, mi lanem aot long ol skripja se wei we mi mekem mi mo fasin blong mi long Sabat i stap olsem wan saen bitwin mi mo Papa blong mi long Heven. Wetem samting ia we mi andastanem, mi nomo nidim ol lis blong ol samting blong mekem mo blong no mekem. Taem mi mas mekem desisen se wan aktiviti i stret o no long Sabat dei, mi stap askem miwan nomo: ‘?Wanem saen mi wantem givim long God?’ Kwestin ia i mekem ol joes blong mi abaot Sabat dei oli kam klia olsem wota.”9
Simpol be strong kwestin ia blong Presiden Nelson i tokbaot bigwan wan prinsipol we i katemaot evri tu tingting abaot wanem i minim, mo wanem yumi sapos blong mekem blong ona long Sabat dei. Kwestin blong hem i talemsot wan gaedlaen mo wan standet we i save blesem evriwan long yumi long ol defren situesen blong yumi.
Prinsipol Ia blong Wantem blong Letem God I Win
Sikis manis i pas, long jeneral konfrens, Presiden Nelson i tokbaot se hem i glad tumas taem Spirit i lidim hem long wan niu wei blong lukluk long mining blong toktok ia, Isrel. Hem i talem long yumi se sol blong hem i glad tumas taem hem i lanem se “stret nem ia Isrel i tokbaot wan we i wantem letem God i win insaed long laef blong hem.”10 Afta, Presiden Nelson i tokbaot plante impoten nara samting we i kamaot long niu lukluk o tingting ia.
Mesej blong hem, abaot fasin blong wantem letem God i win, i wan gudgudfala eksampol blong stap tijim ol stret prinsipol blong mekem se yumi save rulum yumiwan. Mo semmak olsem we hem i bin mekem long mesej blong hem abaot fasin blong mekem Sabat i wan glad, Presiden Nelson i askem ol kwestin we oli stanap long prinsipol blong i stap olsem ol gaed mo standet blong wanwan long yumi.
“?Yu yu wantem letem God i stap win insaed long laef blong yu? ?Yu yu wantem letem God i paoa ia we i moa strong insaed long laef blong yu?”
Hem i gohed i talem:
“Tingting hamas nao, hamas yu wantem, bae i save blesem yu. Sapos yu no mared mo stap lukaotem hem we i no save finis, tingting blong yu, blong wantem pat blong “Isrel,” bae i helpem yu disaed huia bae yu deit wetem mo long wanem wei.
“Sapos yu yu mared long wan we i brekem ol kavenan blong hem, hamas yu wantem blong letem God i win insaed long laef blong yu bae i letem ol kavenan blong yu wetem God i stap gud nomo. Sevya bae i hilim hat blong yu we i brokbrok. Ol heven bae oli open taem yu stap lukaot blong save olsem wanem blong muv fored. Yu no nid blong stap mestem rod, o askem samting long yuwan.
“Sapos yu gat ol tru kwestin abaot gospel o Jos, taem yu stap jusum blong letem God i stap win, bae yu stap wokbaot blong faenem mo andastanem ol ful trutok we oli no save finis we bae oli lidim laef blong yu, mo bae oli helpem yu blong stap strong long kavenan rod ia.
“Taem yu fesem temtesen—iven sapos temtesen ia i kam taem we yu taed gud, o yu filim se yu stap yuwan o oli no save andastanem yu—traem tingting long paoa blong tingting we yu save pulum i kam long yu taem yu stap jusum blong letem God i win insaed long laef blong yu, mo taem yu stap toktok wetem Hem blong i mekem yu kam strong moa.
“Taem we bigfala tingting blong hat blong yu i blong letem God i stap win, blong yu pat blong Isrel, plante desisen bae oli kam isi moa. !Plante trabol, oli nomo ol trabol! Yu save gud hao blong yu presentem yuwan. Yu save wanem blong wajem mo ridim, weaples blong spendem taem blong yu mo huia blong fren wetem. Yu save wanem yu wantem mekem i kamtru. Yu save kaen man o woman we yu rili wantem kam olsem.”11
Tekem not se, plante impoten desisen mo eksperiens blong laef, bae prinsipol blong wantem letem God i win i save lidim tingting long saed blong: deiting mo mared, gospel kwestin mo wari, temtesen, fasin blong dresap mo mekem gud fes blong yu, wanem blong wajem mo ridim, weaples blong spendem taem, mo hu blong joen wetem, mo plante, plante moa. Ol insperesen kwestin blong Presiden Nelson oli tokbaot bigwan wan simpol prinsipol we i givim daereksen long evri saed blong laef blong yumi, mo i mekem se yumi save kontrolem yumiwan.
Wan Smol Stia
Taem we Josef Smit i bin stap long kalabus long Libeti Kalabus, hem i bin raetem ol leta blong instraksen i go long ol memba blong Jos, mo ol lida blong Jos, blong mekem olgeta oli tingbaot se “wan bigfala sip i save mekem bigfala samting wetem smol stia ia we i mekem hem i fesem gud win mo ol wef.”12
Wan “stia” i wan wil o samting we oli joenem wetem ol tul we oli yusum blong stiarem wan sip o wan bot. Mo “ol tul blong wok wetem win mo wef” i talem se bae oli tanem sip olsem wanem blong hem i balens gud mo i no kapsaet long taem blong hariken.
Long mi mo yu, ol prinsipol blong gospel oli olsem wan stia long sip. Ol stret prinsipol oli mekem se yumi faenem rod blong yumi mo stanap strong, yumi gohed mo no muvmuv, blong mekem se yumi balens gud i stap mo no foldaon long ol lata dei strong win blong tudak mo tingting i fasfas.
Yumi bin gat fulap blesing long jeneral konfrens ia blong lanem abaot ol prinsipol we oli no save finis aot long ol wokman blong Lod we oli kasem raet ia. Naoia, wanwan responsabiliti blong yumi i blong yumi rulum o kontrolem yumiwan folem ol trutok ia we oli stap testifae abaot olgeta.13
Testemoni
Presiden Esra Taf Benson i bin tijim se: “Long ol nekis sikis manis i kam, konfrens edisen blong yufala blong [Liahona] i mas stap long saed blong ol tabu standet wok blong yufala, mo yufala i mas lukluk long hem plante taem.”14
Wetem evri paoa blong sol blong mi, mi stap invaetem yufala blong lanem, laef folem, mo lavem ol prinsipol blong stret mo gud fasin. Ol trutok blong gospel nomo oli save mekem “yumi mekem wetem glad hat, evri samting we i stap long paoa blong yumi; mo afta, bae yumi stanap kwaet, wetem bigfala tras evriwan, blong luk fasin blong God blong sevem man, mo blong Lod i soemaot han blong hem.”15
Mi save se doktrin mo ol prinsipol blong gospel blong Jisas Kraes oli stamba ples ia nomo blong kasem daereksen long laef blong yumi, mo blong kasem glad long laef long wol ia mo long taem we i no save finis. Mo, long Ista Sandei blong glori ia, wetem glad, mi witnes se Sevya blong yumi we i stap laef, i springwota ia we evri trutok oli stap kamkamaot long hem. Mi testifae olsem long tabu nem blong Lod Jisas Kraes, amen.