Ol Pua Smolwan
Yumi nidim evriwan long wanwan wod mo branj—olgeta we maet oli strong mo olgeta we maet oli stap traehad. I gat nid blong evriwan.
Taem mi bin wan smol boe, mi tingbaot we mi stap ron long trak wetem papa blong mi mo mitufala i stap luk ol man mo woman long saed blong rod we oli stap long ol hadtaem o oli nidim help. Oltaem papa blong mi i stap talem toktok ia “Pobrecito,” we i minim “ol pua smolwan.”
Long ol taem ia, mi intres blong stap wajem papa blong mi taem bae hem i helpem fulap long ol pipol ia, speseli taem bae mifala i travel i go long Meksiko blong luk bubuman mo bubuwoman blong mi. Fulap taem bae hem i faenem wan man we i stap long nid mo afta bae hem i go toktok long olgeta long praevet mo givim help we oli nidim. Afta, mi bin faenemaot se hem i stap helpem olgeta blong enrol long skul, pem sam kaekae, o help long sam wei blong gud laef blong olgeta. Hem i stap givhan long “wan pua smolwan” we i krosem rod blong hem. Long ol yia blong mi we mi stap groap, mi no save tingbaot wan taem we mifala i no bin gat wan man we i stap stap wetem mifala from oli nidim wan ples blong stap long hem, taem oli stap traem blong kam blong save dipen long olgetawan. Taem mi stap wajem ol eksperiens ia, hem i krietem wan spirit blong gat sore insaed long mi long olgeta man mo woman raon long mi, mo olgeta we oli stap long nid.
Long Prijim Gospel blong Mi hem i talem se: “Ol pipol oli raonem yu. Yu stap pasem olgeta long rod, visitim olgeta long ol hom blong olgeta, mo wokbaot long medel blong olgeta. Evriwan long olgeta oli ol pikinini blong God, ol brata mo sista blong yu. … Plante long ol pipol ia oli stap lukaotem wan stamba tingting long laef. Oli stap gat wari long fiuja mo ol famli blong olgeta” (Prijim Gospel blong Mi: Wan Gaed long Misinari Seves [2018], 1).
Truaot long ol yia we mi stap givim seves insaed long Jos, mi bin traem blong lukaotem olgeta we oli nidim help long tugeta saed blong laef, long bodi mo spirit. Fulap taem bae mi harem voes blong papa blong mi i stap talem, “Pobrecito,” ol pua smolwan.
Long Baebol, yumi faenem wan gudfala eksampol blong stap kea long wan pua smolwan:
“Long taem blong prea, long tri klok long aftenun, Pita mo Jon, tufala i stap wokbaot blong go insaed long yad blong ol laen blong Isrel long haos blong God.
“Nao i gat wan man i stap long ples ya we i no save wokbaot, from we taem hem i bon, leg blong hem i nogud. Mo evri dei, ol fren blong hem oli stap karem hem i kam, oli putum hem long doa ya blong haos blong God, we nem blong hem ‘Doa we i Flas Gud’. Nao hem i stap askem mane long ol man we oli stap go insaed long haos ya.
“Taem hem i luk Pita mo Jon, we tufala i stap kam blong go insaed long yad ya blong haos blong God, hem i askem long tufala blong tufala i givim sam samting long hem.
“Nao Pita mo Jon, tufala i lukluk stret long man ya, mo Pita i talem long hem se, ‘Yu lukluk stret long mitufala.’
“Nao hem i lukluk long tufala, i ting se bambae i kasem sam samting long tufala.
“Be Pita i talem long hem se, ‘Mi mi no gat mane nating, be wan samting we mi mi gat, bambae mi givim long yu. Long nem blong Jisas Kraes, man Nasaret, mi mi talem long yu. !Yu girap, yu wokbaot!
“Nao hem i holem raet han blong hem, i givhan long hem blong i stanap. Nao wantaem nomo, leg blong hem i kam gud” (Ol Wok 3:1–7; oli ademap italik).
Taem mi stap ridim stori ia, mi laekem tumas wei we oli yusum toktok ia, lukluk stret. Toktok ia, lukluk stret i minim blong mekem wan man i lukluk stret i go long ol ae mo tingting blong hem, o blong lukluk gud wetem wan tingting, (lukluk “fasten,” Dictionary.com). Taem Pita i bin lukluk man ia, hem i bin lukluk hem defren mo i no semmak olsem ol narawan i lukluk man ia. Pita i bin luk moa long man ia bitim we hem i no save wokbaot mo i luk moa bitim ol wiknes blong hem, mo i bin luk se bilif blong hem i stret blong hem i kam oraet, mo i go insaed long tempol blong kasem ol blesing we hem i bin stap lukaotem.
Mi bin luksave se Pita i bin holem raet han blong man ia mo leftemap hem. Taem hem i helpem man ia long wei ia, Lod i bin hilim hem mo “leg blong hem i kam gud” (Ol Wok 3:–7). Lav blong Pita long man ia, mo from hem i wantem tumas blong helpem hem, i mekem paoa blong man ia we i no gat paoa, i kam moa bigwan.
Taem mi stap givim seves olsem wan Eria Seventi, mi stap putum evri Tiusdei naet blong mekem ol givhan visit wetem ol stek presiden insaed long eria we mi responsibol long hem. Mi invaetem olgeta blong mekem ol apoenmen wetem olgeta we oli nidim wan odinens blong gospel blong Jisas Kraes, o we oli no stap kipim ol kavenan we oli bin mekem. Tru long wok blong givhan we mifala i stap mekem oltaem wetem hat blong mifala, Lod i mekem ol hadwok blong mifala i kam moa bigwan mo mifala i bin save faenem wanwan man, woman mo famli we oli stap long nid. Olgeta ia, oli bin “ol pua smolwan” we oli stap laef long ol defren stek we mifala i stap givim seves long hem.
Long wan taem, mi bin folem Presiden Bill Whitworth, presiden blong Sandi Yuta Kenion Viu Stek, blong mekem ol givhan visit. Hem i bin prea fulap abaot huia nao mifala i mas visitim mo traem blong gat semmak eksperiens olsem Nifae we, “Spirit i lidim [hem, be hem i] no save yet wanem samting bae [hem i] mas mekem” (1 Nifae 4:6). Hem i soem se taem yumi stap givhan, revelesen i mas lidim yumi i go long olgeta we oli stap long nid moa bitim we blong jes go tru nomo long wan lis o visitim wanwan man o woman folem nomol wei blong mekem samting. Paoa blong insperesen i mas lidim yumi.
Mi tingbaot taem mifala i bin go long hom blong wan yangfala kapol, Jeff mo Heather, mo smol boe blong tufala, Kai. Jeff i bin groap olsem wan aktiv memba blong Jos. Hem i wan man blong spot we i save ron gud tumas mo hem i bin gat wan gudfala fiuja long spot. Hem i stat blong go longwe long Jos smosmol taem hem i kam olsem wan yangfala. Afta, hem i bin kasem wan aksiden long trak we i bin jenisim ful rod blong laef blong hem. Taem mifala i go insaed long hom blong olgeta mo mitim tufala, Jeff i askem mifala from wanem mifala i bin kam blong luk famli blong hem. Mitufala i ansa se, i gat samples 3,000 memba we oli stap laef insaed long ol eria blong stek. Afta mi askem hem: “Jeff, aot long evri hom we mitufala i save visitim tedei long naet, talem long mitufala ?from wanem Lod i sendem mitufala long ples ia?”
Wetem hemia, Jeff i stat blong serem ol filing blong hem mo serem wetem mitufala sam wari mo problem we famli blong hem i stap fesem. Mitufala i stat blong serem ol defdefren prinsipol blong gospel blong Jisas Kraes. Mitufala i invaetem olgeta blong mekem sam samting we maet bae oli faenem i had blong mekem fastaem, be sloslo, bae i tekem bigfala hapines mo glad i kam. Afta Presiden Whitworth i givim wan prishud blesing long Jeff blong helpem hem blong winim ol jalenj blong hem. Jeff mo Heather i agri blong mekem wanem we oli bin invaetem olgeta blong mekem.
Samples wan yia afta, mi bin gat spesel janis ia blong luk Jeff i baptaesem waef blong hem, Heather, wan memba blong Jos Ia blong Jisas Kraes blong Ol Lata-dei Sent. Naoia oli stap mekem oli rere blong go insaed long tempol blong sil olsem wan famli blong taem we i no save finis. Visit blong mifala i bin jenisim rod blong laef blong olgeta long saed blong laef mo spirit.
Lod i talemaot se:
“Taswe, stap fetful; stanap long ofis we mi bin putum yu long hem; givhan long olgeta we oli no strong, leftemap ol han we oli hang i kamdaon, mo mekem ol ni ia we oli no strong oli kam strong moa” (Doktrin mo Ol Kavenan 81:5).
“Mo taem yu mekem olgeta samting ia, bambae yu mekem wan bigfala gud long ol narafala man, mo bambae yu leftemap glori blong hem we i Lod blong yu” (Doktrin mo Ol Kavenan 81:4).
Ol brata mo sista. Aposol Pol i tijim wan impoten lukluk insaed long wok blong givhan blong yumi. Hem i tijim se, yumi, yumi “bodi blong Kraes. Mo [wanwan long yumi] i haf bodi blong hem” (1 Korin 12:27) mo i nidim wanwan memba blong bodi blong mekem se ful bodi i save wok gud. Afta hem i tijim wan trutok we i gat fulap paoa, we i bin draon dip insaed long hat blong mi taem mi bin ridim. Hem i talem: “Hem i no olsem. Ol haf blong bodi ya blong yumi we yumi stap ting se oli no gat paoa, be olgeta ya oli mas stap, mo ol haf blong bodi ya blong yumi we yumi stap ting se oli no flas, yumi stap flasem gud olgeta”1 Korin 12:22–23; oli ademap long italik).
Mekem se, yumi nidim evriwan long wanwan wod mo branj—olgeta we maet oli strong mo olgeta we maet oli stap traehad. I gat nid blong evriwan i stap blong save mekem ful “bodi blong Kraes” we i impoten tumas, i save wok gud. Fulap taem mi stap tingting long miwan se, huia olgeta ia we oli no stap wetem yumi long ol defdefren kongregesen blong yumi; we bae oli save mekem yumi strong moa mo mekem yumi wan.
Elda D.Todd Christofferson i tijim: “Insaed long Jos, yumi no stap lanem tabu doktrin nomo; yumi stap testem olgeta taem yumi praktisim olgeta. Olsem bodi blong Kraes, ol memba blong Jos oli givgivhan long wanwan long olgeta tru long evri dei blong laef. I no gat wan long yumi i stret evriwan. … Insaed long bodi blong Kraes, yumi mas mekem moa bitim blong lanem ol aedia, mo ol tabu tok, be mas gat ol ril eksperiens taem yumi stap lan blong laef tugeta wetem lav” [Doktrin mo Ol Kavenan 42:45]” (“Why the Church,” Liahona, Nov. 2015, 108–9).
Long 1849, Brigham Yang i gat wan drim, we long drim ia, hem i bin luk Profet Josef Smit i stap lidim wan bigfala grup blong ol sipsip mo nani. Sam long ol animol ia oli bigwan mo naes; sam oli smol mo doti. Brigham Yang i tingbaot we hem i lukluk stret long ae blong Profet Josef Smit mo stap talem: “Josef, yu gat wan grup blong animol we i defren olgeta … we mi luk long laef blong mi; ?bae yu mekem wanem wetem olgeta?” Profet i luk olsem i no wari nating se grup blong animol blong hem i defren mo no stap kwaet, mo i ansa nomo se: “Olgeta evriwan i gat yus blong olgeta long ol ples blong olgeta.”
Taem Presiden Yang i wekap, hem i andastanem se, taem bae Jos i stap karem tugeta ol defdefren “sipsip mo nani,” hem i responsabiliti blong hem blong karem olgeta evriwan i kam insaed mo letem wanwan long olgeta i luksave hamas paoa oli save gat taem oli tekem ples blong olgeta insaed long Jos. (Oli stretem aot long atikol ia: Ronald W. Walker, “Brigham Young: Student of the Prophet,” Ensign, Feb. 1998, 56–57.)
Ol brata mo sista. Stamba tingting blong toktok blong mi i bin kam long mi taem mi stap tingting strong abaot wan we i no strong naoia long Jos Ia blong Jisas Kraes. Mi wantem blong toktok long wanwan long olgeta blong smol taem. Elda Neal A. Maxwell i bin tijim se “fulap taem ol kaen man o woman olsem oli stap stap kolosap long—be oli no tekpat fulwan long—Jos. Bae oli no kam insaed long japel, be bae oli no aot long doa blong japel tu. Hemia hem i olgeta we oli nidim Jos mo Jos i nidim olgeta, be, haf blong olgeta i ‘laef long wol be [i] no gat God’ [Mosaea 27:31]” (“Why Not Now?,” Ensign, Nov. 1974, 12).
Mi wantem ripitim invitesen blong Profet blong yumi we yumi lavem tumas, Russell M. Nelson, taem hem i bin toktok fastaem long ol memba blong Jos. Hem i talem: “Nao, long wanwan memba blong Jos ia, mi talem: Gohed blong stap long rod blong kavenan. Komitmen blong yu blong folem Sevya taem yu mekem ol kavenan wetem Hem, mo afta, blong gohed blong holem ol kavenan ia, bambae i openem doa long evri blesing long saed blong spirit, mo blong kasem spesel janis ia we i stap long ol man, woman, mo pikinini long evri ples.”
Afta hem i askem strong se: “Nao, sapos yu bin aot long rod ia finis, mi stap invaetem yu, wetem evri hop insaed long hat blong mi, blong yu kambak, plis. Nomata wanem wari blong yu, nomata wanem jalenj blong yu, i gat wan ples blong yu insaed long ples ia, insaed long Jos blong Lod. Yu mo ol jeneresen we oli no bon i kam long wol yet, bambae oli gat blesing from ol aksen blong yu naoia long kambak long rod ia blong kavenan.” (“As We Go Forward Together,” o Liahona, Apr. 2018, 7; oli ademap long italik).
Mi talem witnes blong mi abaot Hem, Masta Tija mo Sevya blong yumi evriwan. Mi invaetem wanwan long yumi blong lukaotem ol “pobrecitos,” “ol pua smolwan” ia long medel blong yumi we oli stap long nid. Hemia i hop mo prea blong mi, long nem blong Jisas Kraes, amen.