Elda Alvin F. Meredith III

Jeneral Atoriti Seventi

Long las yia blong hae skul long Tenesi, YSA, oli bin jusum Alvin F. Meredith olsem spotman blong skul; wan grup blong ol Kristin studen spotman oli jusum hem.

I no longtaem afta, koj blong hem i talemaot long hem abaot stet lidasip blong grup ia i mekem se hem i no kwalifae from se oli no bin luksave Jos Ia blong Jisas Kraes blong Ol Lata-dei Sent olsem wan Kristin jos.

Koj blong hem, “wan rili gud Kristin man,” i askem oganaesesen ia blong sendem wan i go long skul blong mit wetem yangfala spotman ia. Ripresentativ blong oganaesesen i kam long hae skul ia mo i eksplenem ol 10 poen blong doktrin we hem i bin filim se oli ol risen blong karemaot Ol Lata-dei Sent spotman ia. Taem hem i luk Baebol long basket blong man ia, Elda Meredith i askem sapos tufala i save gotru long samfala ves.

“Mitufala i lukluk long wanwan long ol 10 poen ia, mo mifala i go long Ol Kronikel, mo Jemes, mo Buk blong Revelesen mo Korin,” Elda Meredith i talem. “Bilif blong mi i fesem jalenj, mo tru long faea blong jalenj ia, bilif blong mi i kam strong moa mo i neva muvmuv stat long tetaem ia i kam.”

Alvin Frazier “Trip” Meredith III i bon i kam long wol ia long Jatanuga, Tenesi, YSA, long 22 Julae 1970. Papa mo mama blong hem i, Alvin mo Mary Meredith. Hem i bin mared Jennifer Denise Edgin long 1998 long Sol Lek Tempol. Tufala i gat sikis pikinini.

Elda Meredith i bin graduet wetem wan digri long saekoloji long Brigham Yang Yunivesiti long 1994, mo i kasem masta blong bisnis administresen long Yunivesiti blong Jikago long 2001. Hem i wok wetem GE Capital, Boston Consulting Group, mo wetem Asurion.

Taem hem i bin wan yang man, Elda Meredith i bin stap long Yuta Sol Lek Siti Misin. Long taem we oli bin singaotem hem i kam wan Jeneral Atoriti Seventi, hem i bin stap olsem presiden blong Yuta Sol Lek Siti Saot Misin. Mo tu, hem i bin stap olsem wan Eria Seventi, wan stek presiden, wan kaonsela long wan misin presidensi, bisop, mo wan Sandei Skul tija.