Elda Clark G. Gilbert

Jeneral Atoriti Seventi

Plante oli save Elda Clark G. Gilbert olsem Presiden blong BYU–Pathway Worldwide, mo olsem foma presiden blong Brigham Yang Yunivesiti—Aedaho. Plante oli save hem tu from ol niu divelopmen blong onlaen hae edukesen program long tufala skul ia.

Elda Clark i talem se hemia i hapen from seves blong hem long Jos—blong helpem ol yang man long insaed siti blong Boston, Masajusets, YSA—blong stap mekem hemwan i rere blong kasem ol janis blong skul i go long plante moa pipol. Seves janis ia i kam taem hem i bin bisi blong graduet long skul, mo stap kea long wan yang famli.

“Ol yang man ia, oli no bin oltaem gat plante sapot. Oli kam pat blong laef blong mifala, mo mifala i kam blong lavem olgeta,” hem i talem. “Mi bin lanem blong lisin long Lod, mo mi bin save se Hem i stap insaed long laef blong olgeta. Mi bin save harem Hem i talem long mi wanem mi bin nidim blong mekem blong olgeta.”

Elda Gilbert i talem se Lod i bin tijim hem abaot ol nid blong ol nara pipol. “I no we Hem i bin stap mekem mi mi rere from edukesen, be Hem i bin stap soem long mi wanem Hem i save mekem long laef blong ol pipol long wan level we i dip, mo i blong wanwan long olgeta.”

Clark Gordon Gilbert i bon i kam long wol ia long namba 18 Jun 1970 long Oklan, Kalifonia, YSA. Papa mo mama blong hem i, Paul mo Susan Gilbert. Hem i groap long Foeniks, Arisona, YSA. Afta we hem i bin stap givim seves long Japan Kobe Misin, hem i maredem Christine Calder long 1994 long Sol Lek Tempol. Tufala i gat eit pikinini.

Elda Gilbert i kasem wan digri long intanasonol rilesen long 1994 we i kam long Brigham Yang Yunivesiti,wan masta digri long Esia stadi long 1995 long Stanford Yunivesiti, mo wan dokta blong bisnis administresen long 2001 long Harvard Yunivesiti. Hem i bin wok olsem wan asisten profesa long Harvard Business Skul, i wan asosiet akademik vaes presiden long BYY–Aedaho, mo presiden mo jif eksekutiv ofisa blong Deseret News mo Deseret Dijitol Media.

Hem i bin wan Eria Seventi long taem blong koling blong hem, nao Elda Gilbert i stap olsem presiden blong kworom blong ol elda, kaonsela long wan stek Yang Man presidensi, mo stek presidensi, mo bisop.